Kapingamarangi - II Timothy - 1

1:1  Mai baahi o Paul, tangada agoago-hagau ni Jesus Christ mai i-di hiihai o God, ne-hagau belee hagadele di mouli dela gu-hagababa-mai gi gidaadou, dela i tadau baahi i tadau buni-anga gi Jesus Christ,

1:2  ang-gi Timothy, dagu dama-daane hagalabagau. God tadau Damana mo Jesus Christ tadau Dagi, gi-dugu-adu gi di-goe tumaalia, di aloho, mo-di noho i-di aumaalia.

1:3  Au e-danggee ang-gi God dela e-hai-hegau ginai au i-di manawa madammaa, gadoo be ogu damana-mmaadua. Au e-danggee ang-gi Mee i-nia madagoaa huogodoo i dogu maanadu mai goe i-lodo agu dalodalo i-di boo mo-di aa.

1:4  Au e-langahia-eau o halidangi, gei au e-hiihai huoloo belee heetugi-adu gi-di-goe, gii-dohu dogu tene.

1:5  Au e-mamaanadu di hagadonu e-donu dela i do baahi, e-hai be-di hagadonu o do dinana-madua go Lois, mo do dinana go Eunice. Au e-donu bolo ma go di hagadonu hua dela i do baahi.

1:6  Go di mee deenei, dela e-haga-langahia ko-au adu gi-di-goe bolo goe gi-benabena-ina di wanga-dehuia dela ne-dugu-adu go God i dogu madagoaa ne-dugu ogu lima gi oo nua.

1:7  Idimaa, di Hagataalunga o God dela ne-dugu-mai gi gidaadou, la-hagalee belee hai gidaadou gi-mmaadagu. Dono Hagataalunga la-ne-haga-honu gidaadou gi-nia mogobuna, mo-di aloho, mo-di hagakono di manawa.

1:8  Goe hudee langaadia di-haga-modongoohia-aga tadau Dagi, be e-langaadia i-di-au dela e-galabudi i-di gili o Christ. Heia-hua goe gi-hagaduadua i-di gili di Longo-Humalia, gei God gaa-hai goe gi-maaloo oo lodo i-di hagaduadua deelaa.

1:9  Mee ne-haga-mouli gidaadou, ge ne-gahi-mai gidaadou gii-hai nia dama ni-aana donu, ge hagalee ne-hidi-mai nia mee ala ne-hai go gidaadou, gei mai-hua i dana hai dela gu-haga-noho mo dono dumaalia dehuia. Mee gu-dugu-mai tumaalia deenei mai i Jesus Christ i-mua taamada o-nia mee huogodoo.

1:10  Gei dolomeenei tumaalia deenei gu-gila-mai i-di hanimoi o tadau Dangada Hagamouli go Jesus Christ. Mee gu-hagalawa di mogobuna o-di made, gei gu-haga-modongoohia-mai di mouli dee-odi mai i-di Longo-Humalia.

1:11  Malaa, God ne-hilihili au belee hai tangada agoago-hagau, mo tangada agoago e-hagadele di Longo-Humalia.

1:12  Gei di-maa go di mee deenei dela e-hagaduadua-iei au, gei au e-daahi-hua go dogu hagadagadagagee, i-di-au e-iloo dagu Dangada dela e-hagadonu, gei au e-donu bolo ma go Mee dela e-mee di-benebene ana mee ala ne-haga-ingoo-mai gi-di-au, gaa-dae-loo gi-di laangi deelaa.

1:13  Haga-mau-dangihi-ina goe gi-nia helekai e-donu ala guu-lawa dagu hagi-adu gi-di-goe gi-kawe-ai. Gei gii-mau hogi ang-gi di hagadonu mo-di aloho dela gu-i gidaadou i tadau buni-anga gi Jesus Christ.

1:14  Goe benabena-ina tuhongo humalia dela gu-dugu-adu gi-di-goe mai i-di mogobuna o-di Hagataalunga-Dabu, dela e-mouli i tadau lodo.

1:15  Goe gu-iloo bolo digau ala e-noho i Asia, digau huogodoo mo Phygelus mo Hermogenes, la-gu-diiagi au.

1:16  Dimaadua gi-dumaalia ang-gi digau di hale o Onesiphorus, i mee e-logo ono madagoaa nogo haga-tenetene au. Mee hagalee langaadia i dogu noho i-lodo di hale-galabudi.

1:17  Dono dau i Rome, geia ga-daamada ga-halahala au, gaa-dae-loo gi dono gidee-Ia au.

1:18  Dimaadua gi-dumaalia ang-gi mee i-di Laangi Aamua deelaa. Goe hogi gu-iloo-hua nia hai humalia huoloo a-mee nogo hai-mai gi-di-au i Ephesus.