LinVB - III John

Chapter 1

1:1  Ngáí Mokóló, ôná Gáyo, ndeko óyo nalingí na bolingí bwa sôló.

1:2  Wa bolingo, nakolíkya ’te makambo ma yŏ mánso mazalí kotámbola malámu ; nzóto ya yŏ ézala kolóngónú lokóla molímo mwa yŏ.

1:3  Nasepélí míngi áwa bandeko bayéí koyébisa ngáí ’te ozalí na boyambi bwa sôló mpé ozalí kolanda nzelá ya bosôló.

1:4  Koyóka ’te bána ba ngáí bakolandaka nzelá ya bosôló ezalí koyókisa ngáí esengo enéne mpenzá.

1:5  Wa bolingo, ozalí sôló moto wa boyambi na mánso okosálaka mpô ya bandeko, atâ bazalí bampaya.

1:6  Bangó mŏ kó bayébísí bato ba Eklézya áwa ndéngé okolingaka bato. Bŏ ebongí na moto wa Nzámbe, ópésa bangó bínso bisengélí na bangó o mobémbo.

1:7  Bakeí mobémbo mpô ya kosakola Nkómbó ya Mokonzi ; epái ya bapagáno bakozwaka elóko té.

1:8  Bísó tosengélí koléndisa bato baye mpô tósálisa bangó o mosálá mwa bosangeli bo­sôló.

1:9  Nakomélákí Eklézya mwâ monkandá, kasi Diotréfes, moto óyo azalí kowéla esíká ya lokúmu, abóyí koyóka bísó.

1:10  Yangó wâná, ntángo nakoyâ nakopálela yě átíka makambo ma yě ; azalí bobélé kotóngo bísó té, abóyí mpé koyamba bandeko. Sókó basúsu balingí koyamba bangó, apekísí bangó, mpé abengání bangó o Eklézya.

1:11  Wa bolingo, ósála lokóla bato babé té, kasi sálá lokóla bato balámu. Moto akosálaka malámu azalí moto wa Nzámbe ; óyo akosálaka mabé amóní naíno Nzámbe té.

1:12  Bánso, ná Nzámbe wa bosôló bakokúmisaka Demétrio. Bísó mpé tokúmísí yě, mpé oyébí malámu ’te tozalí koloba sé makambo ma sôló.

1:13  Nazalí naíno na makambo míngi ma koyébísa yŏ, kasi nakokoma mangó na ekomeli mpé na mái ma bokomi té.

1:14  Nazalí na elíkyá ’te nakomóno yŏ nokí, bôngó tókoka kosolola bísó na yŏ.

1:15  Bobóto bózala na yŏ ! Báníngá ba yŏ batíndélí yŏ mbóte. Yŏ mpé pésá mbóte na báníngá ba bísó mŏ kó mŏ kó.