Pohnpeian - Jeremiah - 14

14:1  KAUN-O ketin mahsanihong ie duwen apwal en lehk en pihl,

14:2  “Nsensuwed laud kipedier Suda, eh kahnimw kan sosohralahr, towe kan wonohnpene nanpwel wie sengiseng, oh Serusalem wie weriwer pekipeki sawas.

14:3  Me kepwehpwe kan kin ilakih nair lidu kan re en idipildo, re kin kohla ni pwarer en pihl akan, ahpw re sohte kin diar pihl; re kin pwurodo sohte pilen nair sah kan. Re ahpw kin mwoahtohtala oh namenekla, re ahpw kin koaduhpwaldi masarail kan.

14:4  Soumwet kan kin serenpahtou; re kin koaduhpwaldi moangarail kan pwehki eh solahr keteu, oh pwehki mehkoaros mengdier nansapw.

14:5  Tie kan me kin neitik nansapw kin kesehla wah kan pwehki eh sohte dihpw.

14:6  Ahs lawalo kan kin uh pohn dohl akan, oh esiesingek kehlail duwehte kidi en wel kei; re solahr kak kilang wasa pwehki solahr kanarail kisin mwenge.

14:7  Nei aramas akan ahpw likwerih ie, patohwan, ‘Maing KAUN, mehnda ma dipat akan kedikedipei kiht, a komwi ketin sewesei kiht duwen me komwi ketin inoukidahr. Se patohwan sohpeisangkomwiher pak tohto; se patohwan dipadahr ong komwi.

14:8  Ihte komwi me Israel kak koapworopworki, komwihte me kapitkitala ni ahnsoun at apwal. Dahme likamwete komwi mehn liki men nan sahpwet, likamwete mehn keiru men me kin kommoaldi pwohngte pwong?

14:9  Dahme likamwete komwi aramas emen me weid, likamwete sounpei men me sohte kak sawas? Ahpw, Maing KAUN, mehlelete pwe komwi ketin ieiang kiht! Kiht me sapwellimomwi aramas; komw dehr ketin likidmelieikitala.’ ”

14:10  KAUN-O eri mahsanih duwen aramas pwukat, “Irail kin mwahuki tangasang ie, oh re sohte pahn kaunda pein irail. Ihme I sohte kin kupwurperenkin irail. I pahn kupwukupwure sapwung kan me re wiadahr oh kaloke irail pwehki diparail kan.”

14:11  KAUN-O ahpw ketin mahsanihong ie, “Ke dehr peki rehi sawasepen aramas pwukat.

14:12  Mehnda ma re pil kaisihsol, I sohte pahn tehk ar likwer en peksawas. Oh mehnda ma re pil meirongkihong ie meirong isihs oh meirong en wahnsahpw, I sohte pahn pil kupwurperenkin irail. Ahpw I pahn kemeirailla nan mahwen, oh kemehkinirailla lehk lapalap oh soumwahu.”

14:13  I ahpw uhd patohwan, “Maing KAUN, Wasa Lapalahpie, komw mwahngih duwen soukohp akan ar kin patopatohwanohng aramas akan me dene sohte mahwen de lehk lapalap pahn pweida, pwehki sapwellimomwi inou me dene popohl pahn kin poatopoat reht nan sahpwet.”

14:14  KAUN-O ahpw ketin sapeng, mahsanih, “Soukohp akan kin kinehda kokohp pwukat ni mwarei. I sohte kadarirailwei, de pil kihong irail koasoandi kan, I pil sohte mahseniong irail. Kaudiahl kan me re koasoakoasoia duwe sohte kohsang rehi, kokohp mwahl ekei me re pein kinehda.

14:15  Ngehi, KAUN-O, I ndaiong uhk met dahme I pahn wiahiong soukohp pwukat me I sohte kadarowei, re ahpw wiewia kokohp ni mwarei oh ndinda me mahwen oh lehk lapalap sohte pahn lel sahpwet-I pahn kemehkinirailla mahwen oh lehk lapalap.

14:16  Aramas akan me re ndindaiong kokohp pwukat pil pahn mehla nan mahwen oh mehkihla lehk lapalap. Kahleparail kan pahn lekdekiong nan ahl akan en Serusalem, oh sohte me pahn sarepiraildi. Met pahn pweiong irail koaros-pil ong arail pwoud kan, nair seri kan, pwutak oh serepein kan. Re uhdahn pahn ale pweinen ar suwed.”

14:17  KAUN-O ketin mahsanihong ie I en kasalehiong aramas akan duwen ei nsensuwed, oh I en ndaiong irail: “Pilen mesei kat en kereker ni rahn nipwong, I sohte pahn tokedihsang ei sengiseng; pwehki nei aramas akan ar soahnehr, oh ar ohla kan me laud.

14:18  Ni ei kin keidwei nan mohs akan, I kin kilang kahlap en aramas akan me mehkilahr mahwen; ni ei kin pedolong nan kahnimw kan, I kin kilang aramas akan ar pahn mehkilahr duhpek. Samworo kan oh soukohp kan kin wiewiahte ar doadoahk, ahpw re sohte wehwehki dahme re wiewia.”

14:19  Maing KAUN, ia duwe, komwi uhdahn sohpeisangehr Suda? Komwi ketin kalahdeki mehn Saion? Dahme komwi ketin kalipwelipwehkinkitada, me kahrehda se solahr kak mwahula? Se kasikasik popohl, ahpw sohte mehkot mwahu me pwarodohng kiht; se koapworopworki at ohla kan en mwahula, ahpw ihte kamasepwehk mwuledek me lelohng kiht.

14:20  Maing KAUN, se dipadahr ong komwi, se sakarkihda dipat, oh dipen at pahpa kahlap ako.

14:21  Komwi ketin tamanda sapwellimomwi inou kan, oh komwi dehr ketin sohpeisang kiht; komwi dehr ketin kanamenekihala Serusalem, wasahn mwoalomwi lingan. Komwi ketin dadaur sapwellimomwi inou ong kiht.

14:22  Sohte emen rehn dikedik en eni kan en wehi kan kak kamwerehdi keteu; pahnlahng pil sohte kak pein kamwerehdi keteu. Se koapworopworkilahr komwi, Maing KAUN, at Koht, pwehki komwihte me kin ketin wiahda soahng pwukat.