Geez - Joshua - 16

16:1  ወኮነ ፡ ደወሎሙ ፡ ለደቂቀ ፡ ዮሴፍ ፡ እምነ ፡ ዮርዳንስ ፡ ዘመንገለ ፡ ኢያሪኮ ፡ እምነ ፡ ጽባሒሁ ፡ ወየዐርግ ፡ እምነ ፡ ኢያሪኮ ፡ ላዕለ ፡ አድባር ፡ ዘውስተ ፡ ገዳም ፡ ውስተ ፡ ቤቴል ፡ ሉዛ ።

16:2  ወይወፅእ ፡ ውስተ ፡ ቤቴል ፡ ወየኀልፍ ፡ ላዕለ ፡ ደወለ ፡ ከሮንቲ ።

16:3  ወየኀልፍ ፡ ላዕለ ፡ ደወሎሙ ፡ ሰብዐቱ ፡ አፍላግ ፡ በውስተ ፡ ደወሎሙ ፡ ለቤቶሮን ፡ ዘታሕትየ ፡ ወይከውን ፡ ሞጻእቶሙ ፡ ላዕለ ፡ ባሕር ።

16:4  ወተወርሱ ፡ ደቂቀ ፡ ዮሴፍ ፡ ኤፍሬም ፡ ወምናሴ ።

16:5  ወኮነ ፡ ደወሎሙ ፡ ለኤፍሬምኒ ፡ በበ ፡ ሕዘቢሆሙ ፡ ወኮነ ፡ ደወለ ፡ ርስቶሙ ፡ እምነ ፡ ጽባሒሃ ፡ ለአጣሮት ፡ ወኤሮኅ ፡ ወቤቶሮን ፡ እንተ ፡ ላዕሉ ፡ ወጋዛራ ።

16:6  ወየኀልፍ ፡ ደወሎሙ ፡ ላዕለ ፡ ባሕር ፡ እምነ ፡ መስዓ ፡ ለቴርማ ፡ ወየኀልፍ ፡ ላዕለ ፡ ጽባሕ ፡ ዲበ ፡ ቴናታ ፡ ወውስተ ፡ ኤላስ ፡ ወየኅልፍ ፡ እምነ ፡ ጽባሕ ፡ ውስተ ፡ ኢያኖከ ።

16:7  ወውስተ ፡ መራኮ ፡ ወአጣሮት ፡ ወአዕጻዳቲሆን ፡ ወይበውእ ፡ ዲበ ፡ ኢያሪኮ ፡ ወይወፅእ ፡ ዲበ ፡ ዮርዳንስ ።

16:8  ወእምነ ፡ [ጣ]ፉ ፡ የሐውር ፡ ደወሎሙ ፡ ላዕለ ፡ ባሕር ፡ ዲበ ፡ ኬልቃና ፡ ወይከውን ፡ ሞጻእቶሙ ፡ ዲበ ፡ ባሕር ፡ ወዝንቱ ፡ ውእቱ ፡ ርስቶሙ ፡ ለሕዝበ ፡ ኤፍሬም ፡ በበ ፡ ሕዘቢሆሙ ።

16:9  ወአህጉርኒ ፡ እለ ፡ ፈለጡ ፡ ለደቂቀ ፡ ኤፍሬም ፡ በውስተ ፡ ማእከለ ፡ ርስቶሙ ፡ ለደቂቀ ፡ መናሴ ፡ ኵሉ ፡ አህጉሪሆሙ ፡ ወአዕጻዳቲሆሙ ።

16:10  ወኢያጥፍኦሙ ፡ ኤፍሬም ፡ ለከናኔዎን ፡ እለ ፡ ይነብሩ ፡ ውስተ ፡ ጋዜር ፡ ወነበሩ ፡ ከናኔዎን ፡ ውስተ ፡ ኤፍሬም ፡ እስከ ፡ ዮም ፡ እስከ ፡ አመ ፡ ዐርገ ፡ ፈርዖን ፡ ንጉሠ ፡ ግብጽ ፡ ወነሥኣ ፡ ወአውዐያ ፡ በእሳት ፡ ወለከናኔዎን ፡ ወለፌሬዜዎን ፡ ወለእለ ፡ ይነብሩ ፡ ውሰተ ፡ ጋዜር ፡ ወግእዎሙ ፡ ወወሀባ ፡ ፈርዖን ፡ ለወለቱ ፡ ሕፄሃ ፡ ኪያሃ ።