Geez - Joshua - 9

9:1  ወሰምዑ ፡ እለ ፡ ይነብሩ ፡ ገባኦን ፡ ኵሎ ፡ ዘገብረ ፡ እግዚአብሔር ፡ ላዕለ ፡ ኢያሪኮ ፡ ወላዕለ ፡ ጋይ ።

9:2  ወገብሩ ፡ እሙንቱሂ ፡ በጕሕሉት ፡ ወመጽኡ ፡ ሠኒቆሙ ፡ ወአስተዳሊዎሙ ፡ ወጾሩ ፡ መሣንቀ ፡ ብሉየ ፡ ዲበ ፡ መታክፊሆሙ ፡ ወዝቀ ፡ ወይን ፡ ብሉየ ፡ ወሥጡጠ ፡ ወጥቁበ ።

9:3  ወብቱክ ፡ ቶታነ ፡ አሣእኒሆሙ ፡ ወብሉይ ፡ አሥእኒሆሙ ፡ ወግቱት ፡ ውስተ ፡ እገሪሆሙ ፡ ወአልባሲሆሙኒ ፡ ብሉይ ፡ ላዕሌሆሙ ፡ ወኅብስተ ፡ ሥንቆሙኒ ፡ ይቡስ ፡ ወሥሕቡብ ፡ ወንቁዝ ።

9:4  ወመጽኡ ፡ ኀቤሁ ፡ ለኢየሱስ ፡ ውስተ ፡ ትዕይንተ ፡ እስራኤል ፡ እስከ ፡ ገልጋላ ፡ ወይቤልዎሙ ፡ ለኢየሱስ ፡ ወለኵሉ ፡ እስራኤል ፡ እምርሑቅ ፡ ብሔር ፡ መጻእነ ፡ ወይእዜኒ ፡ ተማሐሉ ፡ ምስሌነ ።

9:5  ወይቤልዎሙ ፡ ደቂቀ ፡ እስራኤል ፡ ለኮራውያን ፡ እፎ ፡ ንትማሐል ፡ ምስሌክሙ ፡ መሐላ ፡ ዑቁ ፡ ዮጊ ፡ ቅሩባነ ፡ ትነብሩ ።

9:6  ወይቤልዎ ፡ ለኢየሱስ ፡ ንሕነሰ ፡ አግብርቲከ ፡ ንሕነ ፡ ወይቤሎሙ ፡ እምአይቴ ፡ አንትሙ ፡ ወእምአይቴ ፡ መጻእክሙ ።

9:7  ወይቤልዎ ፡ እምነ ፡ ርሑቅ ፡ ብሔር ፡ ጥቀ ፡ መጻእነ ፡ ንሕነ ፡ አግብርቲከ ፡ በስመ ፡ እግዚአብሔር ፡ አምላክከ ፡ እስመ ፡ ሰማዕነ ፡ ዘበእንቲአሁ ፡ ወኵሎ ፡ ዘገብረ ፡ [በግብጻውያን ፤

9:8  ወኵሎ ፡ ዘገብረ ፡] በክልኤቱ ፡ ነገሥተ ፡ አሞሬዎን ፡ እለ ፡ ይነብሩ ፡ ውስተ ፡ ማዕዶተ ፡ ዮርዳንስ ፡ ሴዎን ፡ ንጉሠ ፡ ሔሴቦን ፡ ወአግ ፡ ንጉሠ ፡ ባሳን ፡ ዘይነብር ፡ ውስተ ፡ አስጠሮት ፡ ወውስተ ፡ ኤድራይን ።

9:9  ወሶበ ፡ ሰማዕነ ፡ ይቤሉነ ፡ ሊቃናቲነ ፡ ወኵሉ ፡ ሰብአ ፡ ብሔርነ ፡ ንሥኡ ፡ ሥንቀክሙ ፡ ለፍኖት ፡ ወሑሩ ፡ ተቀበልዎሙ ፡ ወበልዎሙ ፡ አግብርቲክሙ ፡ ንሕነ ፡ ወይእዜኒ ፡ ተማሐሉ ፡ ምስሌነ ፡ መሐላ ።

9:10  ወናሁ ፡ ዝንቱ ፡ ኅብስትነ ፡ እንዘ ፡ ምውቅ ፡ ውእቱ ፡ ነሣእናሁ ፡ እምነ ፡ አብያቲነ ፡ በዕለተ ፡ ወፃእነ ፡ ከመ ፡ ንምጻእ ፡ ኀቤክሙ ፡ ወይእዜሰ ፡ ነቅዘ ፡ ወየብሰ ።

9:11  ወዝንቱኒ ፡ ዝቃተ ፡ ወይንነ ፡ [ዘ]መላእናሁ ፡ [ሐዲሰ ፡] ወይእዜሰ ፡ ዐርቀ ፡ ወበልየ ፡ ወተሠጠ ፡ ወአልባሲነሂ ፡ ወአሥእንነሂ ፡ በልየ ፡ እስመ ፡ ጥቀ ፡ ርሑቅ ፡ ፍኖት ።

9:12  ወነሥኡ ፡ መኳንንት ፡ ሥንቆሙ ፡ ወኢተስእሉ ፡ በኀበ ፡ እግዚአብሔር ።

9:13  ወገብረ ፡ ኢየሱስ ፡ ሰላመ ፡ ምስሌሆሙ ፡ ወተማሐለ ፡ ምስሌሆሙ ፡ ከመ ፡ ያድኅኖሙ ፡ ወመሐሉ ፡ ሎሙ ፡ መላእክተ ፡ ተዓይን ።

9:14  ወኮነ ፡ እምድኅረ ፡ ሠሉስ ፡ መዋዕል ፡ እምድኅረ ፡ ተማሐሉ ፡ ምስሌሆሙ ፡ መሐላ ፡ ሰምዑ ፡ ከመ ፡ እምቅሩብ ፡ እሙንቱ ፡ ወከመ ፡ ኀቤሆሙ ፡ እሙንቱ ፡ ይነብሩ ።

9:15  ወግዕዙ ፡ ደቂቀ ፡ እስራኤል ፡ ወበጽሑ ፡ ውስተ ፡ አህጉሪሆሙ ፡ አመ ፡ ሣልስት ፡ ዕለት ፡ ወእላንቱ ፡ እማንቱ ፡ አህጉሪሆሙ ፡ ገባኦን ፡ ወ [ክ]ፊራ ፡ ወቤሮት ፡ ወአህጉረ ፡ ኢያርም ።

9:16  ወኢተቃተልዎሙ ፡ ደቂቀ ፡ እስራኤል ፡ እስመ ፡ መሐሉ ፡ ሎሙ ፡ ኵሎሙ ፡ መላእክተ ፡ ተዓይን ፡ በእግዚአብሔር ፡ አምላከ ፡ እስራኤል ፡ ወአንጐርጐሩ ፡ ኵሉ ፡ ተዓይኒሆሙ ፡ ለደቂቀ ፡ እስራኤል ፡ ላዕለ ፡ መላእክቲሆሙ ።

9:17  ወይቤልዎሙ ፡ ኵሉ ፡ መላእክት ፡ ለኵሉ ፡ ተዓይን ፡ ንሕነ ፡ መሐልነ ፡ ሎሙ ፡ በእግዚአብሔር ፡ አምላከ ፡ እስራኤል ፡ ወይእዜኒ ፡ ኢንክል ፡ ለኪፎቶሙ ፡ ወኢበምንትኒ ።

9:18  ወከመዝ ፡ ባሕቱ ፡ ንገብር ፡ ናሐይዎሙ ፡ ወንቀንዮሙ ፡ ወኢይከውን ፡ ላዕሌነ ፡ መንሱት ፡ በበይነ ፡ ዘመሐልነ ፡ ሎሙ ።

9:19  ወይቤልዎሙ ፡ መላእክት ፡ አሕየውናክሙ ፡ ወሤምናክሙ ፡ ትሕጥቡ ፡ ዕፀ ፡ ወትቅድሑ ፡ ማየ ፡ ለኵሉ ፡ ተዓይን ፡ ወከመዝ ፡ አዘዝዎሙ ፡ መላአክት ።

9:20  ወጸውዖሙ ፡ ኢየሱስ ፡ ወይቤሎሙ ፡ ለምንት ፡ ተሳለቅሙ ፡ ላዕሌየ ፡ ወትቤሉኒ ፡ ርሑቃን ፡ ንሕነ ፡ ጥቀ ፡ እምኔክሙ ፡ ወናሁ ፡ አድያሚሆሙ ፡ አንትሙ ፡ ለእለ ፡ ይነብሩ ፡ ምስሌነ ።

9:21  ወይእዜኒ ፡ ርጉማነ ፡ ኩኑ ፡ ኢይስዐር ፡ እምኔክሙ ፡ ገብር ፡ ዘየሐጥብ ፡ ዕፀ ፡ ወዘይቀድሕ ፡ ማየ ፡ ሊተ ፡ ወለአምላክየ ።

9:22  ወአውሥአዎ ፡ ወይቤልዎ ፡ ዜና ፡ ዜነውነ ፡ ኵሎ ፡ ዘይቤሎ ፡ እግዚአብሔር ፡ አምላክከ ፡ ለሙሴ ፡ ቍልዔሁ ፡ ከመ ፡ የሀብክሙዋ ፡ ለዛቲ ፡ ምድር ፡ ወከመ ፡ ያጥፍአነ ፡ ወለኵሉ ፡ እለ ፡ ይነብሩ ፡ ውስቴታ ፡ እምቅድመ ፡ ገጽክሙ ፡ ወ[በበይነዝ ፡] ገበርነ ፡ ዘንተ ፡ ነገረ ።

9:23  ወይእዜኒ ፡ ናሁ ፡ ንሕነ ፡ ውስተ ፡ እደዊክሙ ፡ ዘከመ ፡ ፈቀድክሙ ፡ ወዘከመ ፡ ይኤድመክሙ ፡ ትረስዩነ ፡ ረስዩነ ።

9:24  ወአድኀኖሙ ፡ ኢየሱስ ፡ በይእቲ ፡ ዕለት ።

9:25  ወረሰዮሙ ፡ ከማሁ ፡ ወፋርያነ ፡ ዕፀው ፡ ወሐዋርያነ ፡ ማይ ፡ ለኵሉ ፡ ተዓይን ፡ ወለምሥዋዐ ፡ እግዚአብሔር ፡ ወበበይነ ፡ ዝንቱ ፡ ኮኑ ፡ ሰብአ ፡ ገባኦን ፡ ወፋርያነ ፡ ዕፀው ፡ ወሐዋርያነ ፡ ማይ ፡ ለኵሉ ፡ ተዓይን ፡ ወለምሥዋዐ ፡ እግዚአብሔር ፡ እስከ ፡ ዮም ፡ ወእስከ ፡ ዛቲ ፡ ዕለት ፡ ወለመካን ፡ ዘኀርየ ፡ እግዚአብሔር ።