Geez - Joshua - 4

4:1  ወሶበ ፡ ተገምረ ፡ ኵሉ ፡ ሕዝብ ፡ ወዐደው ፡ ዮርዳንስ ፡ ወይቤሎ ፡ እግዚአብሔር ፡ ለኢየሱስ ፤

4:2  ንሣእ ፡ ዐሠርተ ፡ ወክልኤተ ፡ ዕደወ ፡ አሐደ ፡ አሐደ ፡ ብእሴ ፡ እምነ ፡ አሐዱ ፡ አሐዱ ፡ ነገድ ።

4:3  ወአዝዞሙ ፡ ከመ ፡ ይንሥኡ ፡ ሎሙ ፡ እምዝየ ፡ እምነ ፡ ማእከለ ፡ ዮርዳንስ ፡ እምኀበ ፡ ቆማ ፡ እገሪሆሙ ፡ ለካህናት ፡ ዐሥሩ ፡ ወክልኤ ፡ ዕበነ ፡ ከዋዋተ ፡ ወንሥእዎን ፡ ምስሌክሙ ፡ ወዕቀብዎን ፡ በበ ፡ ሰራዊትክሙ ፡ በኀበ ፡ ኀደርክሙ ፡ ህየ ፡ በሌሊት ።

4:4  ወጸውዐ ፡ ኢየሱስ ፡ ዐሠርተ ፡ ወክልኤተ ፡ ዕደወ ፡ እምውስተ ፡ ክቡራኒሆሙ ፡ ለደቂቀ ፡ እስራኤል ፡ አሐደ ፡ አሐደ ፡ ብእሴ ፡ እምነ ፡ አሐዱ ፡ አሐዱ ፡ ነገድ ።

4:5  ወይቤሎሙ ፡ ኢየሱስ ፡ ንዑ ፡ ወአምጽኡ ፡ ቅድሜየ ፡ ወቅድመ ፡ እግዚአብሔር ፡ እምነ ፡ ማእከለ ፡ ዮርዳንስ ፡ ወንሥኡ ፡ እምህየ ፡ አሐተ ፡ አሐተ ፡ እብነ ፡ ወጹሩ ፡ ውስተ ፡ መታክፍቲክሙ ፡ በከመ ፡ ኍለቊሆሙ ፡ ለዐሠርቱ ፡ ወክልኤቱ ፡ ነገደ ፡ እስራኤል ፤

4:6  ከመ ፡ ይኵናክሙ ፡ ተአምረ ፡ ወይንበራክሙ ፡ ለዘላፉ ፡ ከመ ፡ ሶበ ፡ ተስእለከ ፡ ወልድከ ፡ ጌሠመ ፡ ወይቤለከ ፡ ምንት ፡ እማንቱ ፡ እላንቱ ፡ እበን ፡ ለክሙ ፤

4:7  ወንግሮ ፡ አንተ ፡ ለወልድከ ፡ ወበሎ ፡ እስመ ፡ ነጽፈ ፡ ዮርዳንስ ፡ ተከዚ ፡ እምቅድመ ፡ ታቦተ ፡ ሕጉ ፡ ለእግዚአብሔር ፡ ዘኵሉ ፡ ምድር ፡ እንዘ ፡ ተዐዱ ፡ ወይኩናክሙ ፡ እላንቱ ፡ እበን ፡ ተዝካረ ፡ ለክሙ ፡ ለደቂቀ ፡ እስራኤል ፡ እስከ ፡ ለዓለም ።

4:8  ወገብሩ ፡ ከማሁ ፡ ደቂቀ ፡ እስራኤል ፡ በከመ ፡ አዘዞ ፡ እግዚአብሔር ፡ ለአያሱስ ፡ ወነሥኡ ፡ ዐሥሩ ፡ ወክልኤ ፡ እበነ ፡ እምነ ፡ ማእከለ ፡ ዮርዳንስ ፡ በከመ ፡ አዘዞ ፡ እግዚአብሔር ፡ ለኢየሱስ ፡ ሶበ ፡ ተገምሩ ፡ ዐዲወ ፡ ደቂቀ ፡ እስራኤል ፡ ወዐቀብዎን ፡ ምስሌሆሙ ፡ ውስተ ፡ ተዓይኒሆሙ ፡ ወሤምዎን ፡ በህየ ።

4:9  ወአቀመ ፡ ኢየሱስ ፡ ካልኣተ ፡ እበነ ፡ ዐሥሩ ፡ ወክልኤ ፡ ውስተ ፡ ዮርዳንስ ፡ ውስተ ፡ ውእቱ ፡ መካን ፡ ኀበ ፡ ቆማ ፡ እገሪሆሙ ፡ ለካህናት ፡ እለ ፡ ይጸውሩ ፡ ታቦተ ፡ ሕግ ፡ ወሀለዋ ፡ ህየ ፡ እስከ ፡ ዮም ፡ ወእስከ ፡ ዛቲ ፡ ዕለት ።

4:10  ወቆሙ ፡ እልክቱ ፡ ካህናት ፡ እለ ፡ ይጸውሩ ፡ ታቦተ ፡ ሕግ ፡ ማእከለ ፡ ዮርዳንስ ፡ እስከ ፡ ፈጸመ ፡ ኢየሱስ ፡ ኵሎ ፡ ዘአዘዞ ፡ እግዚአብሔር ፡ ለኢየሱስ ፡ ከመ ፡ ይንግሮሙ ፡ ለሕዝብ ፡ ኵሎ ፡ በከመ ፡ አዘዞ ፡ ሙሴ ፡ ለኢየሱስ ፡ ወአፍጠኑ ፡ ዐዲወ ፡ ሕዝብ ።

4:11  ወሶበ ፡ ተገምረ ፡ ዐዲወ ፡ ሕዝብ ፡ ዐደወት ፡ ታቦተ ፡ ሕግሂ ፡ ወእላክቱኒ ፡ እበን ፡ እለ ፡ እምቅድሜሆሙ ።

4:12  ወዐደው ፡ ደቂቀ ፡ ሮቤል ፡ ወደቂቀ ፡ ጋድ ፡ ወመንፈቀ ፡ ነገደ ፡ መናሴ ፡ ርሱያኒሆሙ ፡ ቅድመ ፡ ደቂቀ ፡ እስራኤል ፡ በከመ ፡ አዘዞሙ ፡ ሙሴ ።

4:13  [፬፻-፻]ቅኑታኒሆሙ ፡ ለቀትል ፡ ዐደው ፡ ቅድመ ፡ እግዚአብሔር ፡ ከመ ፡ ይትቃተልዋ ፡ ለኢያሪኮ ፡ ሀገር ።

4:14  ወበይእቲ ፡ ዕለት ፡ አዕበዮ ፡ እግዚአብሔር ፡ ለኢየሱስ ፡ ቅድመ ፡ ኵሉ ፡ ዘመደ ፡ እስራኤል ፡ ወፈርህዎ ፡ ከመ ፡ ሙሴ ፡ አምጣነ ፡ መዋዕለ ፡ ሕያው ፡ ውእቱ ።

4:15  ወይቤሎ ፡ እግዚአብሔር ፡ ለኢየሱስ ፡ እንዘ ፡ ይብል ፤

4:16  አዝዞሙ ፡ ለካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ከመ ፡ ይፃኡ ፡ እምነ ፡ ዮርዳንስ ።

4:17  [ወአዘዞሙ ፡ ኢየሱስ ፡ ለካህናት ፡ ወይቤሎሙ ፡ ፃኡ ፡ እምዮርዳንስ ።]

4:18  ወኮነ ፡ ሶበ ፡ ወፅኡ ፡ ካህናት ፡ እለ ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ እምነ ፡ ማእከለ ፡ ዮርዳንስ ፡ ወኬዱ ፡ በእገሪሆሙ ፡ ውስተ ፡ ምድር ፡ ሮጸ ፡ ማየ ፡ ዮርዳንስ ፡ ወገብአ ፡ ውስተ ፡ መካናቲሁ ፡ ወሖረ ፡ ከመ ፡ ትካት ፡ ወበጽሐ ፡ እስከ ፡ ድንጋጊሁ ።

4:19  ወአመ ፡ አሡሩ ፡ ለሠርቀ ፡ ቀዳሚ ፡ ወርኅ ፡ ወፅኡ ፡ ሕዝብ ፡ እምነ ፡ ዮርዳንስ ፡ ወግዕዙ ፡ ደቂቀ ፡ እስራኤል ፡ ውስተ ፡ ገልጋላ ፡ መንገለ ፡ ሠረቀ ፡ ፀሐይ ፡ እምነ ፡ ኢያሪኮ ።

4:20  ወአቀሞን ፡ ኢየሱስ ፡ ለእልክቱ ፡ እበን ፡ ዐሥሩ ፡ ወክልኤ ፡ ውስተ ፡ ገልጋላ ።

4:21  ወይቤሎሙ ፡ ኢየሱስ ፡ ለደቂቀ ፡ እስራኤል ፡ እንዘ ፡ ይብል ፡ ሶበ ፡ ተስእሉክሙ ፡ ደቂቅክሙ ፡ ወይቤሉክሙ ፡ ምንትኑ ፡ እላንቱ ፡ እበን ፤

4:22  ዜንውዎሙ ፡ ለደቂቅክሙ ፡ ወበልዎሙ ፡ እስመ ፡ እንተ ፡ የብስ ፡ ዐደውናሁ ፡ ለዝንቱ ፡ ዮርዳንስ ።

4:23  እስመ ፡ አይበሶ ፡ እግዚአብሔር ፡ ለማየ ፡ ዮርዳንስ ፡ ቅድሜነ ፡ እስከ ፡ ነዐዱ ፡ በከመ ፡ ገብራ ፡ እግዚአብሔር ፡ ለባሕረ ፡ [ኤ]ርትራ ፡ እንተ ፡ አይበሳ ፡ እግዚአብሔር ፡ አምላክነ ፡ እምነ ፡ ቅድሜነ ፡ እስከ ፡ ኀለፍነ ፤

4:24  ከመ ፡ ያእምሩ ፡ ኵሉ ፡ አሕዛበ ፡ ምድር ፡ ከመ ፡ ጽኑዕ ፡ ውእቱ ፡ ኀይሉ ፡ ለእግዚአብሔር ፡ ወከመ ፡ ትፍርህዎ ፡ አንትሙኒ ፡ ለእግዚአብሔር ፡ አምላክነ ፡ በኵሉ ፡ ግብር ።