Geez - Joshua - 1

1:1  (ኦሪት ፡ ዘኢየሱስ ።)ወኮነ ፡ እምድኅረ ፡ ሞተ ፡ ሙሴ ፡ ገብረ ፡ እግዚአብሔር ፡ ተናገሮ ፡ ለኢየሱስ ፡ ወልደ ፡ ነዌ ፡ ለላእኩ ፡ ለሙሴ ፡ እንዘ ፡ ይብል ፤

1:2  ናሁ ፡ ሞተ ፡ ሙሴ ፡ ቍልዔየ ፡ ወይእዜኒ ፡ ተንሥእ ፡ ወዕድዎ ፡ ለዝንቱ ፡ ዮርዳንስ ፡ አንተ ፡ ወኵሉ ፡ ዝንቱ ፡ ሕዝብ ፡ ውስተ ፡ ምድር ፡ እንተ ፡ እሁበክሙ ፡ አነ ፡ ለክሙ ፡ ለደቂቀ ፡ እስራኤል ።

1:3  ኵሎ ፡ መካነ ፡ ኀበ ፡ ኬደት ፡ እግርክሙ ፡ ለክሙ ፡ እሁበክሙዎ ፡ በከመ ፡ እቤሎ ፡ ለሙሴ ፤

1:4  እምነ ፡ ገዳም ፡ [ወ]አንጢሊባኖን ፡ እስከ ፡ ፈለግ ፡ ዐቢይ ፡ ፈለገ ፡ [ኤ]ፍራጥስ ፡ ኵሎ ፡ ምድሮ ፡ ለኬጥያዊ ፡ ወእስከ ፡ ደኃሪት ፡ ባሕር ፡ ወእምነ ፡ ምዕራበ ፡ ፀሐይ ፡ ይኩንክሙ ፡ ደወልክሙ ።

1:5  ወአልቦ ፡ ሰብአ ፡ ዘይትቃወም ፡ ቅድሜክሙ ፡ በኵሉ ፡ መዋዕለ ፡ ሕይወትከ ፡ ወበከመ ፡ ሀለውኩ ፡ ምስለ ፡ ሙሴ ፡ ከማሁ ፡ እሄሉ ፡ ምስሌከ ፡ ወኢየኀድገከ ፡ ወኢይትዔወረከ ።

1:6  ጽናዕ ፡ ወትባዕ ፡ እስመ ፡ [አንተ ፡] ትከፍሎሙ ፡ ለዝንቱ ፡ ሕዝብ ፡ ምድረ ፡ እንተ ፡ መሐልኩ ፡ ለአበዊሆሙ ፡ ከመ ፡ አሀቦሙ ።

1:7  ወባሕቱ ፡ ጽናዕ ፡ ወትባዕ ፡ ጥቀ ፡ ከመ ፡ ትዕቀብ ፡ ወትግበር ፡ ኵሎ ፡ ሕገ ፡ ዘከመ ፡ አዘዘከ ፡ ሙሴ ፡ ቍልዔየ ፡ ወኢትትገሐሥ ፡ እምኔሁ ፡ ኢለየማን ፡ ወኢለፀጋም ፡ ከመ ፡ ታእምር ፡ ኵሎ ፡ ዘከመ ፡ ተሐውር ።

1:8  ወኢትትኀደግ ፡ መጽሐፉ ፡ ለዝንቱ ፡ [ሕግ ፡] እምነ ፡ አፉከ ፡ ወአንብብ ፡ ቦቱ ፡ መዐልተ ፡ ወሌሊተ ፡ ከመ ፡ ታእምር ፡ ገቢረ ፡ ኵሎ ፡ ዘጽሑፍ ፡ ውስቴቱ ፡ እስመ ፡ ትረትዕ ፡ ፍኖትከ ፡ ወቦቱ ፡ ትጠብብ ።

1:9  ወናሁ ፡ እኤዝዘከ ፡ ትባዕ ፡ ወጽናዕ ፡ ወኢትፍራህ ፡ ወኢትደንግፅ ፡ እስመ ፡ ሀለወ ፡ እግዚአብሔር ፡ ምስሌከ ፡ አምላክከ ፡ ውስተ ፡ ኵሉ ፡ ዘሖርከ ።

1:10  ወአዘዞሙ ፡ ኢየሱስ ፡ ለጸሐፍተ ፡ ሕዝብ ፡ ወይቤሎሙ ፤

1:11  ባኡ ፡ ውስተ ፡ ማእከለ ፡ ትዕይንት ፡ ወአዝዝዎሙ ፡ ለሕዝብ ፡ ወበልዎሙ ፡ አስተዳልው ፡ ለክሙ ፡ ሥንቀ ፡ እስመ ፡ እስከ ፡ ሠሉስ ፡ መዋዕል ፡ ተዐድውዎ ፡ ለዝንቱ ፡ ዮርዳንስ ፡ አንትሙ ፡ ወትበውኡ ፡ ትርከቡ ፡ ምድረ ፡ እንተ ፡ ይሁበክሙ ፡ እግዚአብሔር ፡ አምላከ ፡ አበዊክሙ ፡ ከመ ፡ ትትወረስዋ ።

1:12  ወለሮቤልሂ ፡ ወለጋድሂ ፡ ወለመንፈቀ ፡ ነገደ ፡ መናሴሂ ፡ ይቤሎሙ ፡ ኢየሱስ ፤

1:13  ተዘከሩ ፡ ቃለ ፡ ዘአዘዘክሙ ፡ ሙሴ ፡ ቍልዔሁ ፡ ለእግዚአብሔር ፡ ወይቤለክሙ ፡ ናሁ ፡ አዕረፈክሙ ፡ እግዚአብሔር ፡ ለክሙ ፡ ወወሀበክሙ ፡ ዛተ ፡ ምድረ ።

1:14  ለይንበራ ፡ አንስቲያክሙ ፡ ወደቂቅክሙ ፡ ወእንስሳክሙ ፡ ውስተ ፡ ዛቲ ፡ ምድር ፡ እንተ ፡ ወሀበክሙ ፡ ሙሴ ፡ በማዕዶተ ፡ ዮርዳንስ ፡ ወአንትሙሰ ፡ ዕድው ፡ ቅኑታኒክሙ ፡ ቅድመ ፡ አኀዊክሙ ፡ ኵሉ ፡ ጽኑዓኒክሙ ፡ ወተቃተሉ ፡ ሎሙ ፡ ምስሌሆሙ ፤

1:15  እስከ ፡ አመ ፡ ያዐርፎሙ ፡ እግዚአብሔር ፡ አምላክነ ፡ ለአኀዊክሙ ፡ ከማክሙ ፡ ወይወርሱ ፡ እሙንቱኒ ፡ ምድሮሙ ፡ እንተ ፡ ይሁቦሙ ፡ እግዚአብሔር ፡ አምላክነ ፡ ወተአትው ፡ እንከ ፡ አሐዱ ፡ አሐዱ ፡ እምኔክሙ ፡ ውስተ ፡ ርስቱ ፡ ወተዋረስዋ ፡ አንትሙኒ ፡ ለዛቲ ፡ ምድር ፡ እንተ ፡ ወሀበክሙ ፡ ሙሴ ፡ ቍልዔሁ ፡ ለእግዚአብሔር ፡ በማዕዶተ ፡ ዮርዳንስ ፡ በመንገለ ፡ ምሥራቀ ፡ ፀሐይ ።

1:16  ወአውሥእዎ ፡ ለኢየሱስ ፡ ወይቤልዎ ፡ ንገብር ፡ ኵሎ ፡ ዘአዘዝከነ ፡ ወነሐውር ፡ መካነ ፡ ኀበ ፡ ፈነውከነ ።

1:17  ወበከመ ፡ ተአዘዝነ ፡ ለሙሴ ፡ በኵሉ ፡ ከማሁ ፡ ንትኤዘዝ ፡ ለከሂ ፡ ወባሕቱ ፡ ምስሌከሂ ፡ ለየሀሉ ፡ እግዚአብሔር ፡ በከመ ፡ ሀለወ ፡ ምስለ ፡ ሙሴ ።

1:18  ወብእሲ ፡ ዘኢተአዘዘ ፡ ለከ ፡ ወዘክሕደከ ፡ ወኢሰምዐ ፡ ቃለከ ፡ ዘአዘዝካሁ ፡ ለይሙት ፡ ወይእዜኒ ፡ ጽናዕ ፡ ወትባዕ ።