Geez - Joshua - 8

8:1  ወይቤሎ ፡ እግዚአብሔር ፡ ለኢየሱስ ፡ ኢትፍራህ ፡ ወኢትደንግፅ ፡ ንሥኦሙ ፡ ምስሌከ ፡ ለኵሎሙ ፡ ዕደው ፡ መስተቃትላን ፡ ወተንሥእ ፡ ወዕረግ ፡ ውስተ ፡ ጋይ ፡ እስመ ፡ ናሁ ፡ አግባእክዎ ፡ ውስተ ፡ እደዊከ ፡ ለንጉሠ ፡ ጋይ ፡ ወለሕዝቡሂ ፡ ወለሀገሩሂ ፡ ወለምድሩሂ ።

8:2  ወትገብሮሙ ፡ ለጋይ ፡ ወለንጉሦሙ ፡ ከመ ፡ ገበርካሃ ፡ ለኢያሪኮ ፡ ወንጉሣ ፡ ወበርበረ ፡ እንስሳሆሙ ፡ በርብር ፡ ለርእስከ ፡ ወባሕቱ ፡ ፈኑ ፡ ይዕግትዋ ፡ ለሀገር ፡ እንተ ፡ መንገለ ፡ ከዋላሃ ።

8:3  ወተንሥአ ፡ ኢየሱስ ፡ ወኵሉ ፡ ሕዝብ ፡ ዘመስተቃትላን ፡ ወዐርጉ ፡ ውስተ ፡ ጋይ ፡ ወኀርየ ፡ ኢየሱስ ፡ ሠለስተ ፡ እልፈ ፡ ዕደወ ፡ ጽኑዓነ ፡ ወመስተቃትላነ ፡ ወኀያላነ ፡ ወፈነዎሙ ፡ በሌሊት ።

8:4  ወአዘዞሙ ፡ ወይቤሎሙ ፡ ሑሩ ፡ ከመ ፡ ታእምሩ ፡ ዕግትዋ ፡ ለሀገር ፡ እንተ ፡ መንገለ ፡ ከዋላሃ ፡ ለሀገር ፡ ወኢትርሐቁ ፡ በሕቁ ፡ እምነ ፡ ሀገር ፡ ወንበሩ ፡ ኵልክሙ ፡ ድልዋኒክሙ ።

8:5  ወአንሰ ፡ ወኵሉ ፡ እለ ፡ ምስሌየ ፡ ነሐውር ፡ ኀበ ፡ ሀገር ፡ ወሶበ ፡ ወፅኡ ፡ ሰብአ ፡ ጋይ ፡ ወተቀበሉነ ፡ ከመ ፡ ቀዲሙ ፡ ንጐይይ ፡ እምቅድመ ፡ ገጾሙ ።

8:6  ወሶበ ፡ ወፅኡ ፡ ወዴገኑነ ፡ ናርሕቆሙ ፡ እምነ ፡ ሀገር ፡ ወይብሉ ፡ ነትዑ ፡ እሉሂ ፡ እምቅድመ ፡ ገጽነ ፡ ከመ ፡ ቀዲሙ ፡ ወንሕነሰ ፡ ንጐይይ ፡ እምቅድመ ፡ ገጾሙ ።

8:7  ወእምዝ ፡ እንከ ፡ ተንሥኡ ፡ አንትሙሂ ፡ ወአጥፍእዋ ፡ ለሀገሮሙ ፡ ወያገብኣ ፡ እግዚአብሔር ፡ አምላክክሙ ፡ ውስተ ፡ እደዊክሙ ።

8:8  ወእምከመ ፡ ቦእክምዋ ፡ ለሀገሮሙ ፡ አውዕይዋ ፡ በእሳት ፡ ወግበሩ ፡ በከመ ፡ እቤለክሙ ፡ ናሁ ፡ አዘዝኩክሙ ።

8:9  ወፈነዎሙ ፡ ኢየሱስ ፡ ወሖሩ ፡ ይዕግቱ ፡ ወነበሩ ፡ ማእከለ ፡ ቤቴል ፡ ወማእከለ ፡ ጋይ ፡ እምኀበ ፡ ባሕረ ፡ ጋይ ፡ ወቤተ ፡ ኢየሱስ ፡ ህየ ፡ በይእቲ ፡ ሌሊት ፡ ማእከለ ፡ ሕዝብ ።

8:10  ወጌሠ ፡ ኢየሱስ ፡ በጽባሕ ፡ ወርእዮሙ ፡ ለሕዝብ ፡ ወዐርጉ ፡ ውእቱ ፡ ወሊቃናቲሆሙ ፡ ለእስራኤል ፡ ፍጽመ ፡ ቅድመ ፡ ሕዝብ ፡ ላዕለ ፡ ጋይ ።

8:11  ወዐርጉ ፡ ኵሎሙ ፡ ሕዝብ ፡ መስተቃትላን ፡ ምስሌሁ ፡ ወሶበ ፡ ሖሩ ፡ ወበጽሑ ፡ ቅድመ ፡ ሀገር ፡ እንተ ፡ መንገለ ፡ ጽባሒሃ ። ወእለሂ ፡ ዐገትዋ ፡ ለሀገር ፡ እንተ ፡ መንገለ ፡ ጽባሐ ፡ ባሕር ፡ ወተአኀዝዋ ፡ እንተ ፡ መንገለ ፡ መስዕ ፡ ለጋይ ፡ ወፂኦት ፡ ማእከሎሙ ፡ ወማእከለ ፡ ጋይ ።

8:12  ወነሥአ ፡ ኀምሳ ፡ ምእተ ፡ ብእሴ ፡ ወአንበሮሙ ፡ ይዕግቱ ፡ ማእከለ ፡ ቤትውን ፡ ወማእከለ ፡ ጋይ ፡ መንገለ ፡ ባሕረ ፡ ጋይ ።

8:13  ወአኅደሩ ፡ ኵሉ ፡ ሕዝብ ፡ ተዓይኒሆሙ ፡ እንተ ፡ መንገለ ፡ መስዕ ፡ ዘሀገር ፡ ወጽንፉ ፡ እስከ ፡ ባሕረ ፡ ሀገር ፡ ወሖረ ፡ ኢየሱስ ፡ በይእቲ ፡ ሌሊት ፡ ማእከለ ፡ ውእቱ ፡ ፂኦት ።

8:14  ወሶበ ፡ ሰምዐ ፡ ንጉሠ ፡ ጋይ ፡ ጌሠ ፡ ፍጡነ ፡ ወወፅኡ ፡ ሰብአ ፡ ሀገር ፡ ወተቀበልዎሙ ፡ እንተ ፡ ቅድሜሆሙ ፡ ከመ ፡ ይትቃተልዎሙ ፡ ውእቱ ፡ ወኵሉ ፡ ሕዝብ ፡ ዘምስሌሁ ፡ በጊዜሃ ፡ መንጸረ ፡ አራባ ፡ ወኢያእመረ ፡ ውእቱሰ ፡ ከመ ፡ ዐገትዎሙ ፡ እንተ ፡ መንገለ ፡ ከወላሃ ፡ ለሀገር ።

8:15  ወሶበ ፡ በጽሕዎሙ ፡ ጐዩ ፡ ኢየሱስ ፡ ወኵሉ ፡ እስራኤል ፡ እምቅድመ ፡ ገጾሙ ፡ ወነትዑ ፡ ውስተ ፡ ፍኖተ ፡ ገዳም ።

8:16  ወኄለ ፡ ኵሉ ፡ ሕዝበ ፡ ብሔር ፡ ወተለውዎሙ ፡ ወሰደድዎሙ ፡ ወዴገንዎሙ ፡ እምድኅሬሆሙ ፡ ለደቂቀ ፡ እስራኤል ።

8:17  ወርሒቆሙ ፡ እሙንቱ ፡ እምነ ፡ ሀገር ፡ ሶበ ፡ አልቦ ፡ ዘተርፈ ፡ ወኢመኑሂ ፡ ውስተ ፡ ጋይ ፡ [ወ]ውስተ ፡ ቤቴል ፡ ዘኢተለዎሙ ፡ ወዘኢዴገኖሙ ፡ ለእስራኤል ፡ ወኀደግዋ ፡ ለሀገር ፡ ርኁተ ፡ ወሰደድዎሙ ፡ ለእስራኤል ፡ ወደገንዎሙ ።

8:18  ወይቤሎ ፡ እግዚአብሔር ፡ ለኢየሱስ ፡ አልዕል ፡ እዴከ ፡ በጋይሶ ፡ ዘውስተ ፡ እዴከ ፡ [ላዕለ ፡ ጋይ ፡] እስመ ፡ ውስተ ፡ እዴከ ፡ አግባእክዋ ፡ ወእለሂ ፡ ዐገቱ ፡ ለይትነሥኡ ፡ ፍጡነ ፡ እምነ ፡ መካናቲሆሙ ፡ ወአልዐለ ፡ እዴሁ ፡ ኢየሱስ ፡ በጋይሶ ፡ ላዕለ ፡ ሀገር ።

8:19  ወተንሥኡ ፡ እለሂ ፡ ዐገቱ ፡ ፍጡነ ፡ እምነ ፡ መካናቲሆሙ ፡ ወወፅኡ ፡ ሶበ ፡ አልዐለ ፡ እዴሁ ፡ በጋይሶ ፡ [ወቦኡ ፡ ሀገረ ፡] ወረከብዋ ፡ ወአውዐይዋ ፡ ፍጡነ ፡ በእሳት ።

8:20  ወሶበ ፡ ነጸሩ ፡ ድኅሬሆሙ ፡ ሰብአ ፡ ጋይ ፡ ወርእዩ ፡ ጢሰ ፡ የዐርግ ፡ ውስተ ፡ ሰማይ ፡ እምውስተ ፡ ሀገሮሙ ፡ ኀጥኡ ፡ እንከ ፡ ኀበ ፡ ይጐዩ ፡ ኢለፌ ፡ ወኢለፌ ፡ ወሕዝብኒ ፡ እለ ፡ ጐዩ ፡ ውስተ ፡ ገዳም ፡ ተመይጥዎሙ ፡ ለእለ ፡ ዴገንዎሙ ።

8:21  ወርእየ ፡ ኢየሱስ ፡ ከመ ፡ ረከብዋ ፡ ለሀገር ፡ እለ ፡ ዐገትዋ ፡ [ወአእመሩ ፡] ሶበ ፡ ርእዩ ፡ ጢሰ ፡ የዐርግ ፡ ውስተ ፡ ሰማይ ፡ እምነ ፡ ሀገር ፡ ወእምዝ ፡ ተመይጡ ፡ ወቀተልዎሙ ፡ ለሰብአ ፡ ጋይ ።

8:22  ወእልክቱሂ ፡ ወፅኡ ፡ እምነ ፡ ሀገር ፡ ወተቀበልዎሙ ፡ ወአግብእዎሙ ፡ ማእከለ ፡ ትዕይንቶሙ ፡ ለእስራኤል ፡ ወቀተልዎሙ ፡ ወእልክቱሂ ፡ እምከሓ ፡ ወእሉሂ ፡ እምለፌ ፡ እስከ ፡ ኢያትረፉ ፡ እምኔሆሙ ፡ ነፋጺተ ፡ ዘድኅነ ።

8:23  ወአኀዝዎ ፡ ለንጉሠ ፡ ጋይ ፡ ሕያዎ ፡ ወወሰድዎ ፡ ኀበ ፡ ኢየሱስ ።

8:24  ወሶበ ፡ አኅለቁ ፡ ቀቲሎቶሙ ፡ ለሰብአ ፡ ጋይ ፡ ደቂቀ ፡ እስራኤል ፡ በገዳም ፡ ወበሙራደ ፡ ደብር ፡ በኀበ ፡ ዴገንዎሙ ፡ ወቀተልዎሙ ፡ ለኵሎሙ ፡ በኀፂን ፡ ወአጥፍእዎሙ ፡ ወተመይጠ ፡ ኢየሱስ ፡ በጊዜሃ ፡ ውስተ ፡ ጋይ ፡ ወቀተላ ፡ በኀፂን ።

8:25  ወኮኑ ፡ ኵሎሙ ፡ እለ ፡ ሞቱ ፡ ይእተ ፡ አሚረ ፡ ተባዕቱ ፡ ወአንስቱ ፡ እልፍ ፡ ወዕሥራ ፡ ምእት ፡ ኵሉ ፡ ሰብአ ፡ ጋይ ።

8:26  ወኢሜጠ ፡ ኢየሱስ ፡ እዴሁ ፡ እንተ ፡ አልዐለ ፡ በጋይሶ ፡ እስከ ፡ አጥፍእዎሙ ፡ ለሰብአ ፡ ጋይ ።

8:27  ዘእንበለ ፡ እንስሳ ፡ ወበርበረ ፡ ሀገር ፡ ኵሎ ፡ ዘበርበሩ ፡ ደቂቀ ፡ እስራኤል ፡ ለርእሶሙ ፡ በትእዛዘ ፡ እግዚአብሔር ፡ በከመ ፡ አዘዞ ፡ እግዚአብሔር ፡ ለኢየሱስ ።

8:28  ወአውዐያ ፡ ኢየሱስ ፡ ለሀገር ፡ በእሳት ፡ ወኮነት ፡ ሐመደ ፡ ወረሰያ ፡ ከመ ፡ አልቦ ፡ ዘይነብራ ፡ ለዘላፉ ፡ እስከ ፡ ዮም ፡ ወእስከ ፡ ዛቲ ፡ ዕለት ።

8:29  ወለንጉሠ ፡ ጋይ ፡ ሰቀሎ ፡ ውስተ ፡ ዕፅ ፡ ዘግባ ፡ ወነበረ ፡ ውስተ ፡ ዕፅ ፡ እስከ ፡ ሰርክ ፡ ወሶበ ፡ ዐርበት ፡ ፀሐይ ፡ አዘዘ ፡ ኢየሱስ ፡ ወአውረድዎ ፡ እምውስተ ፡ ዕፅ ፡ ወወገርዎ ፡ ውስተ ፡ ግብ ፡ ውስተ ፡ አንቀጸ ፡ ሀገር ፡ ወገብሩ ፡ ሎቱ ፡ ነፍቀ ፡ አንተ ፡ እብን ፡ ዐባይ ፡ እስከ ፡ ዮም ፡ ወእስከ ፡ ዛቲ ፡ ዕለት ።

8:30  ወሶበ ፡ ሰምዑ ፡ ኵሎሙ ፡ ነገሥተ ፡ አሞሬዎን ፡ እለ ፡ ሀለው ፡ ማዕዶተ ፡ ዮርዳንስ ፡ እለ ፡ ውስተ ፡ አድባር ፡ ወእለ ፡ ውስተ ፡ ገዳም ፡ ወእለ ፡ ውስተ ፡ ኵሉ ፡ ሐይቀ ፡ ባሕር ፡ ዐቢይ ፡ ወእለ ፡ ውስተ ፡ አንጢሊባኖን ፡ ወኬጤዎን ፡ ወከናኔዎን ፡ ወፌሬዜዎን ፡ ወኤዌዎን ፡ ወአሞሬዎን ፡ ወጌርጌሴዎን ፡ ወኢያቡሴዎን ፤

8:31  ተጋብኡ ፡ ኅቡረ ፡ ከመ ፡ ይፅብእዎሙ ፡ ለኢየሱስ ፡ ወለኵሉ ፡ እስራኤል ።

8:32  ወነደቀ ፡ ኢየሱስ ፡ ምሥዋዐ ፡ ይእተ ፡ አሚረ ፡ ለእግዚአብሔር ፡ አምላከ ፡ እስራኤል ፡ በደብረ ፡ ጌባል ፤

8:33  በከመ ፡ አዘዞሙ ፡ ሙሴ ፡ ቍልዔሁ ፡ ለእግዚአብሔር ፡ ለደቂቀ ፡ እስራኤል ፡ በከመ ፡ ጽሑፍ ፡ ውስተ ፡ ሕገ ፡ ሙሴ ፡ ምሥዋዐ ፡ ዘእብን ፡ መብሐት ፡ ዘኢተወቅረ ፡ ወዘኢተገብረ ፡ በኅፂን ፡ ወአዕረገሂ ፡ ቍርባነ ፡ ለእግዚአብሔር ፡ ወመሥዋዕተ ፡ መድኀኒት ።

8:34  ወጸሐፎ ፡ ኢየሱስ ፡ ውስተ ፡ እብን ፡ ለዝክቱ ፡ ዳግም ፡ ኦሪት ፡ ሕገ ፡ ሙሴ ፡ ዘጸሐፈ ፡ በቅድሜሆሙ ፡ ለኵሉ ፡ ደቂቀ ፡ እስራኤል ።

8:35  ወኵሉ ፡ እስራኤል ፡ ወመኳንንቲሆሙ ፡ ወጸሐፍቶሙ ፡ የሐውሩ ፡ እምፀጋም ፡ ወእምየማን ፡ ቅድመ ፡ ታቦት ፡ ወካህናትሰ ፡ ወሌዋውያን ፡ ይጸውሩ ፡ ታቦተ ፡ ሕጉ ፡ ለእግዚአብሔር ፡ ወመንፈቆሙ ፡ ለግዩራን ፡ ወእለሂ ፡ እምፍጥረቶሙ ፡ ጠቃ ፡ ደብረ ፡ ጌባል ፡ ወመንፈቆሙ ፡ ጠቃ ፡ ደብረ ፡ ጋሪዝን ፡ እለ ፡ አዘዞሙ ፡ ሙሴ ፡ ቍልዔሁ ፡ ለእግዚአብሔር ፡ ከመ ፡ ይባርክዎ ፡ ለሕዝበ ፡ እስራኤል ። ወእሙንቱ ፡ ይቀውሙ ፡ ወእምድኅረ ፡ ዝንቱ ፡ አንበበ ፡ ኢየሱስ ፡ ኵሎ ፡ ነገሮ ፡ ለዝንቱ ፡ ሕግ ፡ በረከቶሂ ፡ ወመርገሞሂ ፡ ኵሎ ፡ ዘጽሑፍ ፡ ውስተ ፡ ሕገ ፡ ሙሴ ። ወአልቦ ፡ ቃለ ፡ እምነ ፡ ኵሉ ፡ ዘአዘዞ ፡ ሙሴ ፡ ለኢየሱስ ፡ ዘኢያንበበ ፡ ወዘኢያስምዖሙ ፡ ኢየሱስ ፡ ለኵሉ ፡ ተዓይነ ፡ ደቂቀ ፡ እስራኤል ፡ ለዕደዊሆሙ ፡ ወለአንስቲያሆሙ ፡ ወለደቂቆሙ ፡ ወለግዩራን ፡ እለ ፡ ሖሩ ፡ ምስለ ፡ እስራኤል ፡ (ወለኵሉ ፡ እስራኤል ፡)፡