Kapingamarangi - Joshua - 1

1:1  Muli-hua di made o Moses, tangada hai-hegau Dimaadua, gei Dimaadua ga-helekai gi tangada hagamaamaa Moses go Joshua, di tama a Nun,

1:2  ga-helekai, “Dagu dangada hai-hegau go Moses guu-made. Hagatogomaalia dolomeenei, goe mo digau Israel huogodoo, gaa-hula laa-lodo di monowai Jordan gi-lodo tenua dela e-gowadu ko-Au.

1:3  Au ga-gowadu gi-di-goe mo agu daangada huogodoo nnenua huogodoo ala ga-taele goodou no-lodo, be dagu hai ne-hagi-anga gi Moses.

1:4  Deenei di geinga o di-godou henua, tugi i-di anggowaa i-bahi-i-ngaaga gaa-hana gaa-dau-loo gi-nia gonduu o Lebanon i-bahi-i-ngeia, mai i-di monowai damana go Euphrates i-bahi-i-dua gaa-hana gi tenua o digau Hittite, gaa-dau-loo i-di Tai Damana go Mediterranean i-bahi-i-dai.

1:5  Joshua, deai tangada e-mee di-haga-magedaa goe i-di waalooloo o do mouli ai. Au ga-madalia goe be dagu hai dela nogo madalia Moses. Au ga-hagalee-loo e-diiagi be e-hudu goe gi-daha.

1:6  Goe gi-maaloo mo tee-madagu, idimaa, goe dela ga-dagi nia daangada aanei, i-di nadau hula e-hai-mee gi tenua dela ne-hagababa ko-Au ang-gi nadau maadua-mmaadua.

1:7  Goe gi-maaloo hudee madagu, hagamahi daudalia nia haganoho huogodoo ala ne-gowadu go dagu hege go Moses. Hudee haga-balumee-ina taganoho e-dahi i-nia maa, gei goe gaa-gila humalia i-nia gowaa huogodoo ala e-hana ginai goe.

1:8  Di Beebaa Haganoho e-hai gii-dau i-nia madagoaa huogodoo ma-ga-daumaha goodou. Kuulu-ina ginai boo mo aa. Goe daudalia nia mee huogodoo ala e-hihi no-lodo, gei goe ga-maluagina gei gaa-gila.

1:9  Goe gi-langahia agu helekai ala ne-hai-adu gi-di-goe, bolo goe gi-maaloo gei gi-de-madagu. Hudee madagu be manawa-gee, idimaa, Au go Dimaadua go doo God, ga-madalia goe i-nia gowaa huogodoo ala e-hana ginai goe.”

1:10  Joshua ga-helekai gi-nia dagi o digau Israel

1:11  bolo gii-hula gi-lodo di waahale-laa, ge gi-helekai gi-nia daangada huogodoo, “Hagatogomaalia-ina godou hagangudu, idimaa, i-muli nia laangi e-dolu, gei goodou gaa-hula gi-di baahi i-golo di Monowai Jordan, ga-hai-gowaa gi tenua a Dimaadua dela go di-godou God e-gowadu gi goodou.”

1:12  Joshua ga-helekai gi-nia madawaawa Reuben mo Gad, mo di baahi di madawaawa Manasseh boloo,

1:13  “Goodou gi-langahia Moses, go tangada hai-hegau Dimaadua, dela ne-hai-adu gi goodou bolo Dimaadua, dela go di-godou God, ga-gowadu gi goodou tenua deenei dela i-bahi-i-dua o Jordan e-noho-ai goodou.

1:14  Godou lodo mo godou dama mo godou manu gaa-noho i ginei, gei godou gau-dauwa ala gu-hagatogomaalia ang-gi tauwa, gaa-hula laa-lodo di monowai e-hula i-mua godou duaahina digau Israel e-hagamaamaa digaula,

1:15  gaa-dae-loo gi di-nadau kumi tenua dela i-bahi-i-dai Jordan dela e-wanga go Dimaadua di-godou God gi digaula. Di madagoaa hua nia madawaawa Israel huogodoo gaa-noho i-di aumaalia i-golo, gei goodou la-gaa-mee di-loomoi, gaa-noho i ginei, gaa-noho i-di-godou henua dela i-bahi-i-dua o Jordan, dela go tenua a Moses tangada hai-hegau Dimaadua ne-gowadu gi goodou.”

1:16  Gei digaula ga-helekai gi Joshua, “Gimaadou gaa-hai nia mee huogodoo ala ne-hagi-mai kooe, gaa-hula gi au gowaa huogodoo ala e-hagau ginai gimaadou.

1:17  Gimaadou ga-hagalongo-laa adu gi-di-goe, gadoo be gimaadou ala nogo hagalongo gi Moses. Dimaadua dela go doo God la-gi-madalia goe be dana hai dela nogo madalia Moses.

1:18  Tei dangada dela ma-ga-hai-baahi be hagalee e-hagalongo gi au haganoho de-hilihili, le e-daaligi gii-made. Goe gi-maaloo gei gi-de-madagu!”