Kapingamarangi - Joshua - 10

10:1  Adoni=Zedek, di king o Jerusalem, ne-longono-ia bolo Joshua guu-kumi ge gu-daaligi di guongo go Ai, gei gu-daaligi di king digaula, be-di hai a-maa ne-hai gi Jericho mo dono king. Mee gu-longono-ia labelaa bolo nia daangada o Gibeon guu-hila ang-gi digau Israel, gei guu-noho dalia digaula.

10:2  Nia daangada o Jerusalem la-gu-uli nadau gai i-di mee deenei, idimaa, Gibeon la di guongo damana be nia guongo ala e-llauehe nadau king i-golo, gei e-damana i Ai, gei ono daane la digau e-iloo di-heebagi.

10:3  Malaa, Adoni=Zedek gaa-kae dana hegau gi-di King Hoham o Hebron, di King Piram o Jarmuth, di King Japhia o Lachish, mo-di King Debir o Eglon, e-hai boloo:

10:4  “Lloomoi e-hagamaamaa au e-heebagi gi Gibeon, idimaa, digaula guu-hila ang-gi Joshua mo digau Israel.”

10:5  Nia king dogolima o Amor, nia king o-nia waahale go Jerusalem, Hebron, Jarmuth, Lachish, mo Eglon guu-buni di baahi e-dahi, gu-haganiga di gili o Gibeon belee heebagi gi digaula.

10:6  Nia daane o Gibeon gaa-kae nadau hegau gi Joshua i-di gowaa dela e-noho-ai digau Israel i Gilgal, e-hai boloo, “Goe hudee dugua do hagamaamaa gimaadou! Lloomoi huogodoo e-hagamaamaa gimaadou! Nia king o Amor i tenua gonduu guu-buni hai-baahi belee daaligi gimaadou!”

10:7  Malaa, Joshua mo dana buini dauwa huogodoo mo ana dama-buini mmaaloo ga-hagatanga i Gilgal, gaa-hula.

10:8  Dimaadua ga-helekai gi Joshua, “Goe hudee madagu i digaula. Au gu-gowadu di aali gi-di-goe. Deai tangada e-dahi e-mee di-hai-baahi adu gi-di-goe ai.”

10:9  Joshua mo dana llongo dauwa gu-taele i-di boo deelaa mai Gilgal gi Gibeon, ga-dauwa haga-goboina ang-gi digau Amor.

10:10  Dimaadua guu-hai digau Amor gi-uli nadau gai i-di nadau mmada gi digau-dauwa o Israel. Digau dauwa o Israel gu-daaligi digaula i Gibeon, gu-waluwalu digaula i-di ala dela e-hana i-mehanga nia gonduu i Beth=Horon, ga-heebagi gi digaula gaa-tugi-loo i-bahi-i-ngaaga i Azekah mo Makkedah.

10:11  Di madagoaa digau Amor ne-llele-ia gi-lala i-nia gonduu gi-daha mo digau-dauwa o Israel, Dimaadua gaa-hai dana uwa-hadu-magalillili gii-doo gi-hongo digaula gaa-tugi-loo i Azekah. Nia daangada ala ne-daaligi go di uwa-hadu-magalillili la-gu-dogologo i-nia daangada ala ne-daaligi go digau Israel.

10:12  Di laangi Dimaadua ne-hai digau Israel gi-maaloo i digau Amor, Joshua gu-helekai gi Dimaadua i-mua digau Israel boloo, “Di laa gi-noho-hua i dono lohongo i-hongo Gibeon, di malama gii-noho labelaa i-hongo di gowaa mehanga gonduu o Aijalon.”

10:13  Gei-ogo di laa guu-noho de-ngalungalua, gei-ogo di malama digi menegenege gaa-dae-loo gi digau Israel gu-daaligi nadau hagadaumee. Di mee deenei e-hii i-lodo Di Beebaa go Jashar. Di laa guu-duu de-ngalungalua oodee, digi hana gi-lala i-di laangi dogomaalia deelaa.

10:14  Deai di laangi ne-hai beenei ai, ge deai di laangi gaa-hai maalia ai, bolo Dimaadua ne-hagalongo gi tangada. E-donu bolo Dimaadua nogo heebagi-mai i-di baahi digau Israel!

10:15  Muli di mee deenei, gei-ogo Joshua mo dana buini-dauwa gaa-hula labelaa gi-muli gi di-nadau gowaa nogo noho-ai i Gilgal.

10:16  Nia king dogolima o Amor la-guu-llele guu-pala hagammuni i-lodo di bagungoo i Makkedah.

10:17  Tangada ga-gidee digaula, ga-hagi-anga gi Joshua di gowaa digaula dela e-pala hagammuni-ai,

10:18  gei mee ga-helekai, “Hagadagadaga-ina hunu hadugalaa llauehe gi-di ngudu di bagungoo. Dugua nia madaloohi i-golo,

10:19  gei goodou hudee noho i-golo. Hula hua igolo i-muli godou hagadaumee, daaligidia digaula mai i-muli. Hudee heia digaula gii-dae gi nadau guongo! Dimaadua di-godou God guu-hai goodou gi-aali i digaula.”

10:20  Joshua mo digau Israel gu-daaligi digaula, gei hunu gau i digaula guu-kida nadau gowaa e-pala-ai i-lodo nia abaaba o nadau guongo, digi daaligidia.

10:21  Nia daane a Joshua huogodoo gu-lloomoi gi-muli gi-di gowaa e-noho-iei mee i Makkedah. Tangada i-lodo tenua bolo e-helekai hai-baahi ang-gi digau Israel ai.

10:22  Joshua ga-helekai, “Hugee di ngudu di bagungoo, laha-mai nia king dogolima gi di-au.”

10:23  Di bagungoo la-gu-mahuge, gei nia king o Jerusalem, Hebron, Jarmuth, Lachish, mo Eglon la-gu-laha-mai gi-daha,

10:24  guu-lahi gi Joshua. Joshua ga-hagadagabuli-mai nia daane o Israel huogodoo gi dono baahi, ga-helekai gi-nia dagi-dauwa o Israel ala nogo hula dalia a-mee gi-lloomoi gi-dugua nadau babaawae gi-hongo nia uwa o-nia king. Digaula guu-hai gii-hai be di-maa.

10:25  Joshua ga-helekai gi ana dagi-dauwa, “Goodou hudee mmaadagu be paagege godou manawa. Goodou la-gi-manawa-maaloo mo-di hagamahi, idimaa, deenei di hai a God gaa-hai gi godou hagadaumee huogodoo.”

10:26  Joshua ga-daaligi nia king e-lima aalaa, ga-daudau gi-nua gi-nia laagau dagi-dahi, gaa-dae-loo gi-di hiahi.

10:27  Di laa ga-ulu, gei Joshua ga-hagawaalanga bolo gi-dugu-ia digaula gi-lala, wanga-ina gi-lodo di bagungoo dela nogo pala hagammuni-ai digaula. Digaula guu-pono di ngudu di bagungoo deelaa gi-nia hadugalaa llauehaa, nia maa i-golo dolomeenei.

10:28  Joshua gu-heebagi guu-kumi di waahale go Makkedah mo dono king i-di laangi la-hua deelaa. Mee gu-daaligi digau huogodoo ala i-lodo di waahale gii-mmade, tangada ne-mouli ai. Mee guu-hai gi-di king o Makkedah be dana hai dela ne-hai gi-di king o Jericho.

10:29  I-muli di mee deenei ne-hai, gei Joshua mo ana gau-dauwa ga-hagatanga i Makkedah gaa-hula gi Libnah ga-heebagi gi di waahale deelaa.

10:30  Dimaadua guu-hai labelaa digau Israel gi-maaloo i digaula mo di-nadau king. Digaula digi dugu di-nadau dangada e-dahi hagamouli, gu-daaligi huogodoo digau ala i-lodo di guongo deelaa. Guu-hai gi-di king digaula di-nadau hai dela ne-hai gi-di king o Jericho.

10:31  Nomuli, Joshua mo ana gau-dauwa ga-hagatanga i Libnah gaa-hula gi Lachish, ga-duuli di waahale, ga-heebagi gi digaula.

10:32  Dimaadua guu-hai digau Israel gi-aali i digau Lachish i-di lua laangi o tauwa, gu-hai-hua be-di hai dela ne-hai gi Libnah, digaula digi dugu di-nadau dangada e-dahi hagamouli, gu-daaligi digau huogodoo ala i-lodo di guongo deelaa.

10:33  Di King Horam o Gezer gu-hanimoi bolo e-hagamaamaa a Lachish, malaa, Joshua gu-daaligi di king deelaa mo ana gau-dauwa huogodoo, tangada ne-dubu ai.

10:34  Nomuli, Joshua mo ana gau-dauwa ga-hagatanga i Lachish gaa-hula gi Eglon, ga-duuli di waahale deelaa, ga-heebagi gi digaula.

10:35  Digaula gaa-kumi di guongo deelaa i-di laangi la-hua deelaa, ga-daaligi digau huogodoo gii-mmade, gu-hai-hua be di-nadau hai dela ne-hai gi Lachish.

10:36  Nomuli, Joshua mo ana gau-dauwa ga-hagatanga i Eglon ga-lloo-adu gi-nua gi Hebron, ga-heebagi gi digaula,

10:37  gaa-kumi di guongo. Digaula ga-daaligi di king mo digau huogodoo o-di guongo mono gau ala e-noho i-nia guongo lligi i-di gili di waahale deelaa. Joshua gu-hai-hua di guongo deelaa gi-mooho-hua gi-daha, be dana hai dela ne-hai gi Eglon. Tangada ne-dugu haga-mouli i-di guongo deelaa ai.

10:38  Nomuli, Joshua mo ana gau-dauwa gaa-huli gi-muli gi Debir ga-heebagi gi digaula,

10:39  gaa-kumi di guongo deelaa, mo dono king mo nia guongo ala i-di gili di guongo deelaa. Digaula gu-daaligi digaula huogodoo gii-mmade. Joshua guu-hai gi Debir mo dono king be dana hai ne-hai gi Hebron mo Libnah mo nau king.

10:40  Joshua gu-heebagi gi-nia guongo o tenua hagatau. Gu-daaligi nia king o-nia henua gonduu, nia guongo ala i-bahi-i-dua mo i-bahi-i-dai, ngaadahi mo nia guongo i-lodo tenua maangoo ala i-bahi-i-ngaaga. Mee digi dugu dana dangada hagamouli: digau huogodoo gu-daaligi gii-mmade, gii-hai be nia waalanga Dimaadua, go di God o Israel.

10:41  Joshua gu-daamada guu-hai ana dauwa i Kadesh=Barnea i bahi-i-ngaaga, gaa-dau-adu-loo gi Gaza i tongotai, mo nia gowaa ala i-lodo Goshen, ga-hanadu-loo gi Gibeon.

10:42  Joshua guu-kumi huogodoo nia king mo nadau guongo i-lodo hua tolongo dauwa e-dahi, idimaa, Dimaadua go di God o Israel, nogo heebagi i-di baahi a Israel.

10:43  Nomuli, gei Joshua mo ana gau-dauwa gaa-hula gi-muli gaa-noho i Gilgal.