Kapingamarangi - Joshua - 18

18:1  I-muli digaula ne-kumi tenua hagatau, gei digau Israel gu-dagabuli-mai gi Shiloh, ga-haga-duu di Hale-laa Dimaadua i-golo.

18:2  Di madagoaa deelaa gei nia madawaawa e-hidu o Israel digi wanga nadau gowaa.

18:3  Malaa, Joshua ga-helekai gi digau Israel, “E-waalooloo behee di-godou noho e-tali, dela hagalee hula gii-kae godou gowaa ala ne-gowadu gi goodou go Dimaadua, go di God o godou maadua-mmaadua?

18:4  Gaamai gi-di-au nia daane dogodolu mai nia madawaawa dagi-dahi. Au e-hagau digaula gi-lodo tenua hagatau e-halahala nia gowaa ala e-hiihai ginai digaula belee hai-mee ginai. Gei digaula ga-lloomoi labelaa gi-di-au.

18:5  Gei tenua la-ga-tuu-hidu i digaula: di madawaawa Judah gaa-noho i-lodo nadau gowaa i-bahi-i-ngaaga, nia madawaawa Joseph gaa-noho i nadau gowaa i-bahi-i-ngeia.

18:6  Hihia gi-lala nia hagamodongoohia o-nia gowaa e-hidu, gaamai gi-di-au, gei au gaa-hudu di hadu, ga-halahala di hiihai a Dimaadua adu gi goodou.

18:7  Di madawaawa Levi, la hagalee hai nadau duhongo gowaa madalia goodou, idimaa di-nadau duhongo le e-hai digau hai-mee-dabu ni Dimaadua. Gei nia madawaawa Gad, Reuben, mo Manasseh i-Bahi-i-dua la-guu-lawa di-kae nadau gowaa i-bahi-i-dua Jordan, ala guu-wanga gi digaula go Moses, tangada hai-hegau Dimaadua.”

18:8  Nia daane aanei guu-hula gu-halahala tenua deelaa i-muli Joshua ne-hagamodongoohia gi digaula, “Hula gi-lodo tenua hagatau, halahala-ina nia gowaa aalaa, gaa-lawa lloomoi gi-di-au. Gei au gaa-hudu agu hadu i ginei i Shiloh e-halahala di manawa Dimaadua adu gi goodou.”

18:9  Malaa, nia daane guu-hula gi-lodo tenua hagatau, guu-hihi gi-lala di-nadau hai dela e-duwwe-ai tenua i-nia gunga gowaa e-hidu, guu-hihi gi-lala labelaa nia ingoo o-nia waahale. Nomuli digaula gaa-hula labelaa gi Joshua i Shiloh.

18:10  Joshua gaa-hudu ana hadu ga-halahala-ai di manawa Dimaadua ang-gi digaula, gaa-lawa ga-hagi-anga nia gowaa gi-nia madawaawa Israel ala e-dubu gi-hai-mee ginai.

18:11  Nia guongo o-nia madahaanau o-di madawaawa Benjamin la-ne-belee wanga i-di matagidagi-loo. Di-nadau gowaa la i-mehanga nia gowaa o-di madawaawa Judah mo Joseph.

18:12  Tagageinga i-bahi-i-ngeia e-daamada i Jordan, ga-hanadu laa-nua gi-di mololo o Jericho, ga-hanadu-laa bahi-gi-dai gi-nia gowaa gonduu ga-hanadu-loo gi-di Anggowaa go Beth=Aven.

18:13  Tagageinga gaa-hana labelaa gi-di mololo i bahi-i-ngaaga o Luz (dela e-hagaingoo labelaa bolo Bethel), ga-haneia gi Ataroth=Addar, i-hongo di gonduu dela i baahi-ngaaga Beth=Horon Bahi-lala.

18:14  Tagageinga la-gaa-hana-hua beelaa gi-di baahi dela i-golo, gaa-hana gi-ngaaga, daamada i-di baahi dai o-di gonduu deelaa, gaa-hana gi Kiriath=Baal (be go Kiriath=Jearim), dela go di waahale di madawaawa Judah. Deenei la-go tagageinga i-bahi-i-dai o tenua o Benjamin.

18:15  Tagageinga i-bahi-i-ngaaga e-daamada i-di gili o Kiriath=Jearim, gaa-hana gi-nia Monowai Uwa-aga i-lodo tenua o Nephtoah.

18:16  Gaa-hana gi-lala gi tono di gonduu dela e-mmada-adu gi-di gowaa mehanga gonduu o Hinnom, i mada-ngeia di gowaa mehanga gonduu o Rephaim. Gaa-hana ngaaga laa-lodo di gowaa mehanga gonduu o Hinnom, i-bahi-i-ngaaga nia gonduu baba o Jebus ga-huli-adu gi En=Rogel.

18:17  E-dau i-golo gaa-hana ngeia gi En-Shemesh, gaa-hana-laa gi Geliloth, dela i-baahi i-golo di Ala Nnoonua o Adummim. Tagageinga gaa-hana gi-lala gi-di Hadugalaa o Bohan (Bohan la tama-daane ni Reuben)

18:18  Ga-hana-laa di baahi ngeia o-nia gonduu baba ala i-hongo di gowaa mehanga gonduu o Jordan. Ga-haneia laa-lodo di gowaa baba deelaa,

18:19  gaa-hana ga-diiagi gi-baahi ngeia nia gonduu baba o Beth=Hoglah, ga-odi i-di Tai Mmade, di gowaa dela e-hagaodi ginai di monowai Jordan. Deenei tagageinga dela i-bahi-i-ngaaga o tenua o Benjamin.

18:20  Jordan la-go tagageinga i-bahi-i-dua. Aanei nnagageinga di gowaa o-nia madahaanau o-di madawaawa Benjamin ala e-hai-mee ginai.

18:21  Nia waahale ala e-dau gi-nia madahaanau o-di madawaawa Benjamin: go Jericho, Beth=Hoglah, Emek Keziz,

18:22  Beth=Arabah, Zemaraim, Bethel,

18:23  Avvim, Parah, Ophrah

18:24  Chephar=Ammoni, Ophni, mo Geba. Nia waahale aanei le e-madangaholu maa-lua, mono waahale ala i nadau gili.

18:25  Nia waahale labelaa aanei: go Gibeon, Ramah, Beeroth,

18:26  Mizpah, Chephirah, Mozah,

18:27  Rekem, Irpeel, Taralah,

18:28  Zela, Haeleph, Jebus (be go Jerusalem), Gibeah, mo Kiriath=Jearim. Nia waahale aanei le e-madangaholu maa-haa, mono dama waahale ala i nadau daha. Deenei di gowaa dela ne-hai-mee ginai nia madahaanau o-di madawaawa Benjamin.