CopSahBible2 - Nahum - 1

1:1  ⲡϫⲱⲱⲙⲉ ⲛⲑⲟⲣⲁⲥⲓⲥ ⲛⲛⲁⲟⲩⲙ ⲡϣⲏⲣⲉ ⲛⲉⲗⲕⲉⲥⲁⲓⲟⲥ

1:2  ⲟⲩⲛⲟⲩⲧⲉ ⲛⲣϥⲕⲱϩ ⲡⲉ ⲡϫⲟⲉⲓⲥ ⲉϥϫⲓ ⲕⲃⲁ ϩⲛ ⲟⲩϭⲱⲛⲧ ⲛⲛⲉⲧϯ ⲟⲩⲃⲏϥ ⲁⲩⲱ ⲉϥⲧⲁⲕⲟ ⲛⲧⲟϥ ⲛⲛϥϫⲁϫⲉ

1:3  ⲡϫⲟⲉⲓⲥ ⲟⲩϩⲁⲣϣϩⲏⲧ ⲡⲉ ⲁⲩⲱ ⲟⲩⲛⲟϭ ⲧⲉ ⲧⲉϥϭⲟⲙ ⲁⲩⲱ ⲡⲉⲧⲧⲃⲃⲏⲩ ⲛϥⲛⲁⲧⲃⲃⲟϥ ⲁⲛ ⲡϫⲟⲉⲓⲥ ⲉⲣⲉ ⲧⲉϥϩⲓⲏ ⲙⲙⲟⲟϣⲉ ϣⲟⲟⲡ ϩⲛ ⲟⲩⲥⲛⲧⲉⲗⲓⲁ ⲙⲉⲛ ⲟⲩⲕⲙⲧⲟ ⲁⲩⲱ ⲛⲕⲗⲟⲟⲗⲉ ⲛⲛϣⲟⲉⲓϣ ⲛⲛϥⲟⲩⲉⲣⲏⲧⲉ

1:4  ⲉϥⲉⲡⲉϯⲙⲁ ⲛⲧⲉⲑⲁⲗⲁⲥⲥⲁ ⲉϥⲧⲣⲉⲥϣⲟⲟⲩⲉ ⲁⲩⲱ ⲛⲉⲓⲉⲣⲱⲟⲩ ⲧⲏⲣⲟⲩ ⲛϥⲧⲣⲉⲩⲱϣⲙ ⲁ ⲧⲃⲁⲥⲁⲛ ⲥⲃⲟⲕ ⲙⲛ ⲡⲕⲁⲣⲙⲏⲗⲟⲥ ⲁⲩⲱ ⲛϯⲟⲩⲱ ⲙⲡⲗⲓⲃⲁⲛⲟⲥ ⲁⲩⲕⲓⲙ

1:5  ⲛⲧⲟⲩⲓⲏ ⲁⲩⲛⲟⲉⲓⲛ ϩⲁ ⲧϥϩⲏ ⲁⲩⲱ ⲁ ⲛⲃⲟⲩⲛⲟⲥ ⲕⲓⲙ ⲡⲕⲁϩ ⲧⲏⲣϥ ⲁϥϩⲟⲡϥ ϩⲁ ⲧϥϩⲏ ⲙⲛ ⲟⲩⲟⲛ ⲛⲓⲙ ⲉⲧⲟⲩⲏϩ ⲛϩⲏⲧϥ

1:6  ⲛⲓⲙ ⲡⲉⲧⲛⲁϣⲁϩⲉⲣⲁⲧϥ ⲙⲡⲉⲙⲧⲟ ⲉⲃⲟⲗ ⲛⲧⲉϥⲟⲣⲅⲏ ⲁⲩⲱ ⲛⲓⲙ ⲡⲉⲧⲛⲁϣⲧⲉⲓ ⲟⲩⲃⲉ ⲉⲧⲟⲣⲅⲏ ⲙⲡⲉϥϭⲱⲛⲧ ⲡⲉϥϭⲱⲛⲧ ⲃⲱⲗ ⲉⲃⲟⲗ ⲛϩⲉⲛⲁⲣⲭⲏ ⲁⲩⲱ ⲙⲡⲉⲧⲣⲁ ⲁⲩⲟⲩⲱϣϥ ϩⲁ ⲧϥϩⲏ

1:7  ⲟⲩⲭⲥ ⲡⲉ ⲡϫⲟⲉⲓⲥ ⲛⲛⲉⲧϩⲩⲡⲟⲙⲟⲛⲏ ⲉⲣⲟϥ ϩⲙ ⲡⲉϩⲟⲟⲩ ⲛⲧⲉⲩⲑⲗⲓⲯⲓⲥ ⲉϥⲥⲟⲟⲩⲛ ⲛⲛⲉⲧⲣϩⲟⲧⲉ ϩⲏⲧϥ

1:8  ⲁⲩⲱ ϩⲛ ⲧϥϩⲓⲏ ⲙⲙⲟⲟϣⲉ ⲉⲧⲛⲁϣⲱⲥ ϥⲛⲁⲉⲓ ⲉϫⲛ ⲟⲩⲟⲛ ⲛⲓⲙ ⲉⲧⲧⲱⲟⲩⲛ ⲉϩⲣⲁⲓ ⲉϫⲱϥ ⲁⲩⲱ ⲛⲉϥϫⲓⲛϫⲉⲉⲩⲉ ⲡⲕⲁⲕⲉ ⲛⲁⲡⲱⲧ ⲛⲥⲱⲟⲩ

1:9  ⲉⲧⲉⲧⲛⲙⲟⲕⲙⲕ ⲉϩⲟⲩⲛ ⲉⲡϫⲟⲉⲓⲥ ⲛⲧⲟϥ ϥⲛⲁⲉⲓⲣⲉ ⲛⲟⲩⲥⲛⲧⲉⲗⲓⲁ ⲛϥⲛⲁϫⲓ ⲕⲃⲁ ⲁⲛ ⲛⲥⲡⲥⲛⲁⲩ ϩⲓ ⲟⲩⲥⲟⲡ ϩⲛ ⲟⲩⲑⲗⲓⲯⲓⲥ

1:10  ϫⲉ ⲥⲉⲛⲁϣⲱϥ ϣⲁ ⲧⲉⲩⲥⲛⲧⲉ ⲛⲑⲉ ⲛⲟⲩⲙⲁ ⲛϣⲟⲛⲧⲉ ⲁⲩⲱ ⲥⲉⲛⲁⲟⲩⲟⲙⲟⲩ ⲛⲑⲉ ⲛⲟⲩⲥⲙⲓⲗⲁⲝ ⲉϣⲁⲥϭⲗⲟⲙⲗⲙ ⲁⲩⲱ ⲛⲅⲣ ⲑⲉ ⲛⲟⲩⲙⲁ ⲛⲕⲁϣ ⲉϥⲟⲃⲉ ⲉⲙⲁⲧⲉ

1:11  ⲉⲣⲉ ⲟⲩⲗⲅⲓⲥⲙⲟⲥ ⲛⲏⲩ ⲉⲃⲟⲗ ⲛϩⲏⲧⲕ ⲉϩⲟⲩⲛ ⲉⲡϫⲟⲉⲓⲥ ⲉⲕϣⲟϫⲛⲉ ⲉϩⲛⲡⲉⲑⲟⲟⲩ ⲉⲩϯ ⲟⲩⲃⲏⲕ

1:12  ⲛⲁⲓ ⲛⲉⲧⲉⲣⲉ ⲡϫⲟⲉⲓⲥ ϫⲱ ⲙⲙⲟⲟⲩ ⲉϥⲁⲣⲭⲏ ⲉϫⲛ ϩⲛⲙⲟⲟⲩ ⲉⲛⲁϣⲱⲟⲩ…