Site uses cookies to provide basic functionality.

OK
TITUS
1 2 3
Prev Up Next
Chapter 3
Titu Kekchi 3:1  Chajultica ajcuiˈ chiruheb nak cheˈpa̱ba̱nk chiru li acuabej. Ut cheˈpa̱ba̱nk ajcuiˈ chiruheb chixjunileb li cuanqueb saˈ xcuanquil. Ut se̱bak xchˈo̱leb chixba̱nunquil li cha̱bil cˈanjel.
Titu Kekchi 3:2  Ut chaye ajcuiˈ reheb nak incˈaˈ teˈxyoˈob a̱tin chirixeb li ras ri̱tzˈin ut incˈaˈ teˈcuechˈi̱nk. Kˈunakeb ban xchˈo̱l ut cha̱bilakeb. Ut cheˈcua̱nk saˈ usilal riqˈuineb chixjunileb li ras ri̱tzˈin.
Titu Kekchi 3:3  La̱o junxil incˈaˈ us li kanaˈleb nak xocuan chak. Xkakˈet ra̱tin li Dios ut incˈaˈ xo-abin chiruheb li cuanqueb xcuanquil. Xkaqˈue kib chi balakˈi̱c. Xkaba̱nu chak li ma̱usilal li naxrahi ru li kachˈo̱l. Xkanumsi li cutan xba̱nunquil li ma̱usilal. Xocakalin ut xicˈ nakil kib chi kibil kib.
Titu Kekchi 3:4  Abanan quicuulac xkˈehil nak li Dios laj Colol ke quixcˈutbesi chiku li rusilal ut li ruxta̱n.
Titu Kekchi 3:5  Li Dios xoxcol ut xorisi saˈ li kanajter naˈleb. Ma̱cuaˈ xban kayehom kaba̱nuhom chi moco xban lix ti̱quilal li kachˈo̱l. Yal xban lix nimal ruxta̱n li Dios nak coxcol. Cuybil sachbil chic li kama̱c ut acˈobresinbil chic li kayuˈam xban li Santil Musikˈej.
Titu Kekchi 3:6  Xban nak li Jesucristo quicam re kacolbal, numtajenak li kosobtesinquil xban li Dios nak quixqˈue chak li Santil Musikˈej chi cua̱nc kiqˈuin.
Titu Kekchi 3:7  Joˈcaˈin quixba̱nu re nak ta̱ti̱cokˈ li kachˈo̱l xban xnimal rusilal li Dios ut take̱chani li junelic yuˈam li yo̱co chiroybeninquil.
Titu Kekchi 3:8  Li a̱tin aˈin li xinye a̱cue, aˈan li tzˈakal ya̱l. La̱in nacuaj nak ta̱chˈolob li xya̱lal aˈin chiruheb li ac xeˈxpa̱b li Dios re nak teˈxqˈue xchˈo̱l chi cˈanjelac saˈ cha̱bilal. Li xya̱lal aˈin kˈaxal cha̱bil ut ta̱cˈanjelak chiruheb chixjunileb.
Titu Kekchi 3:9  Ma̱tzˈil rix li cˈaˈak re ru chi a̱tinul li ma̱cˈaˈ rajbal ut ma̱cuechˈi rix lix xeˈ xto̱nal li junju̱nk. Ut ma̱cuechˈi rix li chakˈrab li quiqˈueheˈ re laj Moisés. Ma̱cˈaˈ aj e xba̱nunquil aˈan xban nak li cuechˈi̱nc ma̱cˈaˈ na-oc cuiˈ.
Titu Kekchi 3:10  Ut cui junak cui̱nk aj poˈol chˈo̱lej yo̱ chi tacchiˈi̱nc saˈ xya̱nkeb laj pa̱banel, ta̱qˈue xnaˈleb jun sut malaj cuib sut ut cui incˈaˈ na-abin cha̱cuu, incˈaˈ chic texcua̱nk saˈ comonil riqˈuin.
Titu Kekchi 3:11  Nanauman nak li jun aˈan ac xpoˈ xchˈo̱l ut nama̱cob xban nak naraj tixpoˈ xchˈo̱leb laj pa̱banel. Aˈan raylal naxcˈam chak saˈ xbe̱n xjunes rib.
Titu Kekchi 3:12  Tintakla a̱cuiqˈuin laj Artemas malaj ut laj Tíquico. Nak ta̱cuulak a̱cuiqˈuin, tatxic chi junpa̱t Nicópolis. Aran toxina̱tau xban nak nincˈoxla nak us tinnumsi li habalkˈe aran.
Titu Kekchi 3:13  Chaqˈue a̱chˈo̱l chixtenkˈanquileb nak teˈe̱lk aran laj Apolos joˈ ajcuiˈ laj Zenas laj naˈol chakˈrab. Chatenkˈaheb nak teˈxic re nak cua̱nk cˈaˈru reheb ut ma̱cˈaˈ chipaltok reheb.
Titu Kekchi 3:14  Eb li kech aj pa̱banelil tento nak teˈxtzol rib xba̱nunquil li usilal ut teˈxtzol ajcuiˈ xtenkˈanquileb li tenkˈa̱c teˈraj re nak incˈaˈ ta̱cana̱k chi ma̱cˈaˈ rajbal lix pa̱ba̱leb.
Titu Kekchi 3:15  Chixjunileb li cuanqueb cuochben nequeˈxtakla xsahil a̱chˈo̱l. Ut chaqˈue ajcuiˈ xsahileb xchˈo̱l li kech aj pa̱banelil. Nakara kib chi kibil kib xban nak junaj li kapa̱ba̱l. Aˈ taxak li rusilal li Dios chicua̱nk e̱riqˈuin che̱junilex. Joˈcan taxak.