LinVB - Zechariah - 12

12:1  Liloba lya Yawe ona Israel. Liloba lya Yawe oyo atandi etando ya likolo mpe apiki mokili, oyo akeli mpema ya bomoi o kati ya moto.

12:2  Nakokomisa Yeruzalem lokola nkeni eye ekolangwisa mikili minso mizali penepene. Ntango banguna bakozinga Yeruzalem, Yu­da mpe ekoyoka mpasi.

12:3  O mikolo mina nakokomisa Yeruzalem lokola libanga linene liye moto moko te akoki kotombola. Bato bakomeka kotombola lyango, bakozoka mpota enene. Bato ba bikolo binso bya nse bakoyokana ’te babundisa lyango.

12:4  Yawe alobi boye : Mokolo mona nakokimisa farasa, mpe nakobelisa batambwisi ba yango li­gbo­ma. Nakoboma miso ma bato ba farasa ba bikolo biye, kasi nakofungola miso mpo ya kobatela Yuda.

12:5  Mokolo mona bakonzi ba Yuda bakomilobela : « Bokasi bwa bato ba Yeruzalem, nde Nzambe wa ba­ngo, Yawe wa bokasi bonso. »

12:6  Mokolo mona nakokomisa bakonzi ba Yuda lokola móto monene mwa nko­ni, lokola esungi ya móto o kati ya matiti makauka. Epai na epai bakosilisa bato o bikolo binso bizali penepene na bango. Kasi bato ba Yeruzalem bakotikala o esika ya bango.

12:7  Yawe akobikisa liboso bato ba Yuda mpo ’te bato ba libota lya Davidi na bato ba Yeruzalem bamitombola likolo lya bato ba Yuda te.

12:8  Mokolo mona Yawe akobatela mpe bato ba Yeruzalem ; moto akotatabana o ntei ya bango, akokoma lokola Davidi mokolo mona ; mpe bato ba Davidi bakozala lokola Nza­mbe, bakokamba bango lokola anzelu wa Yawe.

12:9  Mokolo mona nakoluka koboma bikolo binso biyaki kobundisa Yeruzalem.

12:10  Kasi nakopesa bato ba libota lya Davidi mpe bato ba Yeruzalem motema malamu mpe nakoyokisa bango mposa ya kosa­mbe­la. Bakobwaka miso epai ya ngai, oyo batuboli na likongo. Bakosala lilaka mpo ya ye lokola mpo ya mwanawayambo.

12:11  Mokolo mona bakosala lilaka linene o Yeruzalem lokola lilaka lya Adad Rimon o esobe ya Megido.

12:12  Bato ba ekolo bakolela, etuka na etuka. Etuka ya Davidi ekolela epai, basi ba bango epai. Etuka ya Natan ekolela epai, basi ba bango epai.

12:13  Etuka ya Levi ekolela epai, basi ba bango epai Etuka ya Simei ekolela epai, basi ba bango epai.

12:14  Bituka binso bikotikala bikolela etuka na etuka, basi ba bango epai.