LinVB - Galatians - 2

2:1  Nsima ya mbúla zómi na ínei nakeí lisúsu o Yerúzalem, elo­ngó na Bárnaba ; tokamátí mpé Títo.

2:2  Nakeí kúná zambí Nzámbe ayébísákí ngáí ’te nákende. Nalakísí bangó Nsango Elámu eye nakosangelaka bapagáno ; kasi nalakísí yangó na bankúmú epái esúsu, zambí nalingákí té ’te mosálá mwa ngáí mwa kala tǒ mwa sikáwa mókende mpámba.

2:3  Kasi Títo, móní­ngá wa ngáí wa mobémbo, atâ azalákí mo-Gréki, basengísí yě té ’te ákátisa nzóto.

2:4  Baye bakótí o likambo bazalákí bandeko ba lokutá ; bakótí na mayéle mpô ya konóngo bonsómí bwa bísó, boye tozwákí na Yézu Krístu, mpô ’te bázóngisa bísó o boómbo.

2:5  Tondimí makambo ma bangó sókí moké té mpô ’te tóbátela bínó o bosôló bwa Nsango Elámu.

2:6  Kasi baye bamónóní lokóla bankúmú bapésákí ngáí etí­ndá yǒ kó té. Sókó bazalí bato banéne sôló tǒ té, etálí ngáí té, mpô Nzámbe akotálaka bilongi bya bato té.

2:7  Bamóní ’te Nzámbe atíndí ngáí násangela bapagáno Nsango Elámu, sé lokóla atíndí Pétro ása­ngela yangó epái ya ba-Yúda.

2:8  Sé Oyo apésí Pétro ngúyá ya kosála mosálá mwa apóstolo o káti ya bato bakátísí nzóto, apésí ngáí ngúyá ya kosála mosálá mwa apóstolo o káti ya bato ba bikólo bisúsu.

2:9  Yakóbo, Pétro na Yoáne, bankúmú baye bazalí lokóla bakonzi ba Eklézya, bandimí ’te Nzámbe akabélí ngáí ngrá­sya êná. Bapésí bísó na Bárnaba mabóko bǒ elembo ya boyókani. Toyókání ’te bísó tokokende epái ya bapagáno, bangó epái ya ba-Yúda.

2:10  Baséngí bobélé ’te tósálisa babóla o káti ya bangó. Nasálákí yangó mpé na motéma mǒkó.

2:11  Kasi ntángo Pétro akómákí o Antiókia, nabóyákí kondimela yě o míso ma bato, mpô asálákí mabé.

2:12  Tálá, libosó ’te bato basúsu ba Yakóbo báyâ, azalákí kolía na bapagáno esíká yǒ kó ; kasi ntángo bangó bayéí, akómí komíbénda mpé atíkí bapagáno, mpô azalákí kobánga ba-Yúda.

2:13  Ba-Yúda basúsu balandí ndakisa ya yě ya moto azángí mpíkó, babéndí mpé Bárnaba ála­nda ndakisa ya bangó.

2:14  Kasi, áwa namóní ’te bazalákí kolanda nzelá ya bosôló bwa Nsango Elámu té, nayébísí Pétro o míso ma bato bánso : « Sókó yǒ mo-Yúda okómí kolanda ezalela ya ba­pa­gáno, mpé otíkí eye ya ba-Yúda, bóníbóní okokí kotínda bapagáno bálanda ezalela ya ba-Yúda ?

2:15  Bísó tobótámí ba-Yúda, tozalí basúmuki té baye babótámí o bikólo bisúsu.

2:16  Nzókandé toyébí ’te moto mǒkó té akokóma na bosémbo o míso ma Nzámbe mpô ya botósi Mobéko, kasi bobélé mpô ya boyambi Yézu Krístu. Yangó wâná bísó mpé toyambí Krístu Yézu mpô ’te, na boyambi Krístu, tókóma bato ba bosémbo o míso ma Nzámbe, kasi mpô ya botósi Mobéko té ; zambí moto mǒkó té akokóma moto wa bosémbo o míso ma Nzámbe mpô ya botósi Mobéko.

2:17  Ntángo tozalákí koluka kokóma bato ba bosémbo mpô ya Krístu emónónókí ’te bísó mpé tozalákí basúmuki. Yangó elakísí ’te Krístu moto abéndí bato o nzelá ya masúmu ? Sókí moké té !

2:18  Mpámba té, sókó natóngí lisúsu ndáko eye nasílí koboma, nandimí ’te nakotósaka mobéko té.

2:19  O maye matálí Mobéko nazalí lokóla moto asílí awéí ; Mobéko mobomí ngáí mpô ’te Nzámbe ápésa ngáí bomoi ; elongó na Krístu nabákémí o kurúse.

2:20  Ngáí nazalí na bomoi lisúsu té, kasi bomoi o nzóto ya ngáí bozalí bwa Krístu. Sókó sikáwa nazalí na bomoi bwa nzóto, ezalí mpô nayambí Mwána wa Nzámbe óyo ali­ngákí ngáí mpé amíkabákí mpô ya ngáí.

2:21  Nabóyí likabo lya Nzámbe té : sókó Mobéko mokokákí kokómisa bísó bato ba bosémbo o míso ma Nzámbe, mbele Krístu awákí sé mpámba ! »