LinVB - Galatians - 6

6:1  Bandeko, atâ bokangí moto mǒkó azalí kosála mabé, ebongí ’te bínó bato bokambámí na Elímo, bótélemisa yě na bobóto. Bínó mpé bómíkéngele, mpô bakokí komeka kokwêisa bínó lokóla.

6:2  Bósálisana na bomemi míkúmbá, bokotósa bôngó mobéko mwa Krís­tu.

6:3  Moto akanísí ’te azalí moto monéne, nzókandé azalí sé moto mpámba, azalí komíkósa.

6:4  Moto na moto átála ezalela ya yě mǒkó : mbele akokí komíkúmisa, kasi sé o káti ya motéma ; ámíkúmisa o míso ma báníngá té ;

6:5  zambí moto na moto asengélí komeme mókúmbá mwa yě.

6:6  Moto azalí koyékola matéya ma Nsango Elámu ákabela molakisi ndámbo ya bilóko bizalí na yě.

6:7  Bómíkósa té ! Bóseke Nzámbe té, zambí bakobúka sé mbuma iye balónákí :

6:8  moto alóní o nzóto ya yě, akobúka sé mbuma ya nzóto, yangó ndé liwá. Oyo alóní o Elímo, akobúka mbuma ya Elímo, yangó ndé bomoi bwa sékô.

6:9  Tólembe té kosála mambí malámu ; sókó totíí moléndé, tokobúka mbuma ntángo mokolo mokokí.

6:10  Bôngó, áwa ntángo etíkálí naíno, tósála bato bánso malámu, libosó mpenzá bandeko ba bísó bakrístu.

6:11  Bótála bóníbóní nazalí kokomela bínó na nkomá inéne, na lobóko la ngáí mǒkó.

6:12  Baye bakotíndaka bínó na makási ’te bókátisa nzóto balingí komílakisa o míso ma bato. Bakosálaka bôngó mpô ’te bányókwama mpô ya kurúse ya Krístu té.

6:13  Zambí baye bakotíndaka bato bákátisa nzóto, bangó mǒ­kó bakotósaka Mobéko té ; balingí bobélé ’te bínó bókátisa nzóto mpô ’te bámíkúmisa na yangó.

6:14  Kasi ngáí nalingí komíkúmisa na likambo lisúsu té : lokúmu la ngáí, sé kurúse ya Mokonzi wa bísó Yézu Krístu. Mpô ya yě nakotálaka mambí ma nsé eye lokóla makúfí o kurúse, mpé nakomítálaka lokóla moto akúfí o míso ma bato ba nsé.

6:15  Kokátisa nzóto tǒ té ezalí sé mpámba ; sé kokóma moto wa sika ezalí na ntína.

6:16  Bobóto na ngolu bózala na bato bánso bakolandaka nzelá eye mpé na ekólo ya Nzámbe, Israél.

6:17  Bandá leló moto mǒkó átungisa ngáí lisúsu té : nazalí na bilembo bya Yézu o nzóto ya ngáí.

6:18  Bandeko, ngrásya ya Mokonzi wa bísó Yézu Krístu ézala o mitéma mya bínó ! Amen.