Kapingamarangi - Habakkuk - 2

2:1  Au gaa-gaga gi tomo dogu hale hagaloohi, ga-talitali nia mee a Dimaadua ala ma-ga-hagi-mai gi-di-au belee helekai-iei au, mo nia helekai a-Maa mai gi agu helekai hagahuaidu.

2:2  Dimaadua ga-helekai-mai gi-di-au, “Hihia haga-madammaa gi-hongo nia baahi hadu agu mee ala ga-hagi-adu gi-di-goe, gi-dau-ngoohia go nia daangada.

2:3  Hihia gi-lala, idimaa ma digi dae-mai di madagoaa e-kila-ai nia maa. Gei di madagoaa e-limalima-hua di-dae-mai, gei agu mee ala ga-hagi-adu gi-di-goe la-ga-kila-aga. Ma e-aha ma-ga-duai, taalia-hua, idimaa maa e-kila-aga gii-hai be-di mee dela gu-haga-noho, gei hagalee duai.

2:4  Aanei nia helekai, ‘Digau huaidu la-hagalee haga-mouli, gei digau ala e-humalia le e-mouli, idimaa digaula e-manawa-dahi ang-gi Dimaadua.’ ”

2:5  Di maluagina la di mee halahalau-dangada. Digau ala e-hagagailaa le e-hagamuamua, hagalee noho deemuu. Di hagagailaa e-huge dono ngudu gadoo be taalunga, gei digi dohu ang-gi deia be-di made. Deenei di mee e-heheebagi-iei digaula gi-nia henua e-haga-magemagedaa digaula.

2:6  Digau ala ne-magedaa ga-haganneennee digau ala ne-haga-magedaa ginaadou, ga-hagahuaidu digaula, ga-helekai, “Goodou e-kae nia goloo ala hagalee nia mee ni goodou, gei goodou gaa-kae di hagaduadua! E-waalooloo behee go di-godou haga-maluagina goodou i di-godou hono digau ala e-boibana-adu gi goodou bolo digaula gi-huia-adu gi goodou nadau boibana?”

2:7  I-mua di-godou donu-adu gi goodou, gei goodou ala ne-kumi digau ala i-golo, la-gaa-dau gi-lodo di boibana, gaa-hono bolo gi-huia gii-hana laa-hongo godou boibana. Godou hagadaumee ga-lloomoi gaa-hai goodou gi-uli godou gai. Digaula gaa-kae godou goloo.

2:8  Goodou gu-gaiaa nia mee digau o-nia guongo e-logowaahee, gei dolomeenei, digau ala ne-dubu i-nia guongo aalaa, gaa-kae labelaa godou mee, idimaa goodou digau daaligi dangada ge e-hagahuaidu digau henuailala mo nadau waahale.

2:9  E-huaidu adu gi goodou! Goodou ne-haga-maluagina godou madahaanau gi-nia goloo gaiaa, gaa-hai bolo goodou e-duuli godou hale gi-dee-oho go nia daangada!

2:10  Gei-ogo godou madahaanau le e-langaadia i godou hangahaihai, i-di godou oho nia guongo e-logowaahee, malaa, goodou ne-bida gowadu-hua gi goodou di mooho.

2:11  Nia hadu hogi o-di abaaba di waahale e-wwolowwolo e-hai-baahi adu gi goodou, gei nia ogo o-di hale ga-wwolowwolo labelaa di lee deelaa.

2:12  E-huaidu adu gi goodou! Goodou ne-hagamau di-godou waahale gi-di huaidu, ga-haga-duu-aga di-maa gi taaligi nia daangada gii-mmade.

2:13  Digau nia guongo ala ne-kumi go goodou gu-huaidu ang-gi ginaadou i-di nadau ngalua deai ono hadinga ai, gei-ogo di ahi gaa-dudu nia mee huogodoo ala ne-haga-duu go digaula. Ma go Yihowah Koia e-Aamua dela ne-hai nia mee aanei.

2:14  Malaa, gei-ogo henuailala gaa-honu i-di kabemee o-di madamada o Dimaadua, gadoo be-di moana dela e-honu i-nia wai.

2:15  E-huaidu-adu gi goodou! Di-godou hagawelewele gu-haga-balumee ge-hagalangaadia digau ala i godou baahi. Goodou guu-hai digaula gi-heehee tibatiba be digau libaliba.

2:16  Gei di langaadia ga-haga-holi goodou, hagalee go di hagalaamua. Goodou gaa-bida inu gi-libaliba ga-heehee tibatiba. Dimaadua gaa-hai goodou gii-bida inu-mia di ibu o-di hagaduadua, gei Mee gaa-huli di-godou hagalabagau ang-gi di hagalangaadia.

2:17  Goodou guu-hele gi-daha nia waa-laagau o Lebanon, gei dolomeenei, go goodou ala gaa-hele gi-daha. Goodou gu-daaligi nia manu o-di gowaa deelaa, gei dolomeenei nia manu ga-hagamadagudagu goodou. Nia mee aanei la-gaa-hai, idimaa, goodou gu-daaligi godou daangada gii-mmade, gei goodou gu-haga-huaidu digau henuailala mo nadau waahale.

2:18  Dehee tahidamee o-di ada balu ieidu? Ma di mee hua ne-hai gi-nia lima o-nia daangada, gei di-maa e-deemee di-hagi-adu gi goodou nia mee donu. Ma nia humalia-aha ala ne-hai gi digau ala ne-hai eia, ga hidi-mai-iei digaula, ga-hagadagadagagee gi-di-maa, go di god dela e-deemee di-leelee!

2:19  E-huaidu-adu gi goodou! Goodou e-leelee gi-di bida laagau boloo, “Ala!” be e-helekai gi-di hadu boloo, “Du-gi-nua!” E-hai behee? Di ada balu-ieidu e-mee di-haga-modongoohia-adu gi-di-goe dahi mee? Maa e-hii dono gili gi-nia goolo mo nia silber, gei di-maa di mouli i-lodo di-maa ai.

2:20  Dimaadua le e-noho i-lodo dono Hale Daumaha dabu. Digau o henuailala huogodoo gii-noho deemuu i-mua ono hadumada.