CSlElizabeth - I Chronicles - 18

18:1  И бысть по сих, и порази Давид иноплеменники, и прогна их: и взя Геф и веси его от руки иноплеменничи.

18:2  И порази Давид Моава, и бяху Моавити раби Давиду приносяще ему дань.

18:3  И порази Давид Адраазара царя Сувска во Емафе, идущу ему поставити руку свою над рекою Евфратом:

18:4  и взя от него Давид тысящу колесниц и седмь тысящ конник и двадесять тысящ мужей пешцев, и разби Давид вся колесницы, и остави от них сто колесниц, (ихже удержа себе).

18:5  И прииде Сир от Дамаска, да помощь даст Адраазару царю Сувску, и порази Давид от Сировых двадесять две тысящы мужей:

18:6  и постави Давид стражу в Сирии, яже близ Дамаска, и бяху Давиду в рабы приносяще дани: и спасе Господь Давида во всех, в нихже хождаше.

18:7  И взя Давид гривны златыя, ихже имеша раби Адраазаровы, и принесе я во Иерусалим.

18:8  И из Метавефа и от избранных градов Адраазаровых взя Давид меди много зело, из неяже сотвори Соломон море медяно, и столпы, и сосуды медяныя.

18:9  И услыша Фоа царь Емафский, яко порази Давид всю силу Адраазара царя Сувска,

18:10  и посла Адурама сына своего к царю Давиду, да вопросит его, яже о мире, и благословити его о сем, яко победи Адраазара и порази его, понеже муж противен бяше Фоа Адраазару.

18:11  И вся сосуды златыя и сребряныя и медяныя, и сия освяти царь Давид Господу со сребром и златом, яже взя от всех язык, от Идумеи и Моава, и от сынов Аммоних и от иноплеменник и от Амалика.

18:12  Авесса же сын Саруиев порази Идумею во юдоли Сланей, осмьнадесять тысящ:

18:13  и постави во юдоли стражу, и беша вси Идумеане раби Давиду. И спасаше Господь Давида во всех, в нихже хождаше.

18:14  И воцарися Давид над всем Израилем, и бе творя суд и правду всем людем своим.

18:15  Иоав же сын Саруиев (бысть) над воинством, и Иосафат сын Ахилудов памятописец,

18:16  и Садок сын Ахитов и Авимелех сын Авиафаров священницы, и Суса книгочий,

18:17  и Ванеа сын Иодаев над Херефием и над Фелефием: сынове же Давидовы первии преемницы царевы.