CSlElizabeth - I Chronicles - 16

16:1  Принесоша убо кивот Божий и поставиша его посреде скинии, юже водрузи ему Давид, и принесоша всесожжения и спасителная пред Господем.

16:2  И соверши Давид вознося всесожжения и спасителная, и благослови люди во имя Господне,

16:3  и раздели всякому мужу Израилску, от мужа даже до жены, мужу хлеб един печеный, (и часть печена мяса,) и пряженый со елеем семидал:

16:4  постави же пред лицем кивота завета Господня от левит, еже служити и возглашати (дела Его), и исповедати и хвалити Господа Бога Израилева:

16:5  Асаф началник, и другий по нем Захариа, Иеиил и Семирамоф, и Иеиил и Маттафиа, и Елиав и Ванеа и Авдедом: Иеиил же во органех и псалтири и гуслех, Асаф же в кимвалех возглашая:

16:6  и Ванеа и Озиил священницы (трубиша) выну в трубы пред кивотом завета Божия.

16:7  В той день устрои Давид в начале хвалити Господа рукою Асафа и братии его.

16:8  Песнь. Исповедайтеся Господеви и призывайте Его во имени Его, знаема сотворите людем начинания Его:

16:9  пойте Ему и воспойте Ему, поведите вся чудеса Его, яже сотвори Господь:

16:10  хвалите имя святое Его, да возвеселится сердце ищущее благоволения Его:

16:11  взыщите Господа и укрепитеся, взыщите лица Его выну:

16:12  помяните чудеса Его, яже сотвори, знамения и судбы уст Его,

16:13  семя Израилево, раби Его, сынове Иаковли, избраннии Его.

16:14  Той Господь Бог наш, во всей земли судбы Его.

16:15  Помянем во век завет Его, слово Его, еже заповедал в тысящы родов,

16:16  еже завеща Аврааму, и клятву Свою Исааку:

16:17  и постави е Иакову в повеление, Израилю в завет вечен,

16:18  глаголя: тебе дам землю Ханааню, уже достояния вашего.

16:19  Внегда быти им малым числом, яко умалишася и преселишася в ню,

16:20  и преидоша от языка в язык и от царствия к людем иным,

16:21  не остави мужа обидети их, и обличи о них цари:

16:22  не прикасайтеся помазанным Моим, и во пророцех Моих не лукавнуйте.

16:23  Воспойте Господеви, вся земля, возвестите от дне на день спасение Его,

16:24  возвестите во языцех славу Его, во всех людех чудеса Его,

16:25  яко велий Господь и хвален зело, страшен есть над всеми боги.

16:26  Яко вси бози языков идоли: Господь же наш небеса сотвори.

16:27  Слава и величество пред лицем Его, крепость и похвала в месте Его святем.

16:28  Дадите Господеви, отечествия языков, дадите Господеви славу и крепость,

16:29  дадите Господеви славу имени Его: возмите дары и принесите пред лице Его, и поклонитеся Господеви во дворех святых Его.

16:30  Да убоится от лица Его вся земля, да исправится земля и да не подвижится:

16:31  да возвеселятся небеса и да возрадуется земля, и да рекут во языцех: Господь царствует.

16:32  Да возгласит море и исполнение его, и древа польская, и вся яже на них.

16:33  Тогда возвеселятся древа дубравная пред лицем Господним, яко прииде судити земли.

16:34  Исповедайтеся Господеви, яко благ, яко в век милость Его,

16:35  и глаголите: спаси ны, Боже, Спасителю наш, и собери нас, и изми нас от язык, да хвалим имя святое Твое, и хвалимся во хвалениих Твоих.

16:36  Благословен Господь Бог Израилев от века даже и до века. И рекут вси людие: аминь. И восхвалиша Господа.

16:37  И оставиша тамо пред кивотом завета Господня Асафа и братию его, да служат пред кивотом выну по вся дни:

16:38  и Авдедом и братия его, шестьдесят осмь: и Авдедом сын Идифунь и Осай (поставлени) во дверники:

16:39  Садока же священника и братию его священниками пред скиниею Господнею в вышних иже в Гаваоне,

16:40  да возносят всесожжения Господеви на олтари всесожжений выну утро и вечер, и по всем яже писана суть в законе Господни, елика повеле сыном Израилевым рукою Моисеа раба Божия:

16:41  и с ними Еман и Идифум и прочии избраннии кийждо званием своим еже хвалити Господа, яко в век милость Его:

16:42  и с ними трубы и кимвалы еже возглашати, и органы пений Божиих: сынове же Идифумли во вратех (стояху).

16:43  И идоша вси людие кийждо в дом свой, и Давид возвратися, да благословит дом свой.