Site uses cookies to provide basic functionality.

OK
JEREMIAH
Prev Up Next
Chapter 20
Jere Aleppo 20:1  וישמע פשחור בן אמר הכהן והוא פקיד נגיד בבית יהוה את ירמיהו נבא את הדברים האלה
Jere Aleppo 20:2  ויכה פשחור את ירמיהו הנביא ויתן אתו על המהפכת אשר בשער בנימן העליון אשר בבית יהוה
Jere Aleppo 20:3  ויהי ממחרת ויצא פשחור את ירמיהו מן המהפכת ויאמר אליו ירמיהו לא פשחור קרא יהוה שמך—כי אם מגור מסביב  {ס}
Jere Aleppo 20:4  כי כה אמר יהוה הנני נתנך למגור לך ולכל אהביך ונפלו בחרב איביהם—ועיניך ראות ואת כל יהודה אתן ביד מלך בבל והגלם בבלה והכם בחרב
Jere Aleppo 20:5  ונתתי את כל חסן העיר הזאת ואת כל יגיעה ואת כל יקרה ואת כל אוצרות מלכי יהודה אתן ביד איביהם ובזזום ולקחום והביאום בבלה
Jere Aleppo 20:6  ואתה פשחור וכל ישבי ביתך תלכו בשבי ובבל תבוא ושם תמות ושם תקבר—אתה וכל אהביך אשר נבאת להם בשקר  {פ}
Jere Aleppo 20:7  פתיתני יהוה ואפת חזקתני ותוכל הייתי לשחוק כל היום כלה לעג לי
Jere Aleppo 20:8  כי מדי אדבר אזעק חמס ושד אקרא  כי היה דבר יהוה לי לחרפה ולקלס כל היום
Jere Aleppo 20:9  ואמרתי לא אזכרנו ולא אדבר עוד בשמו והיה בלבי כאש בערת עצר בעצמתי ונלאיתי כלכל ולא אוכל
Jere Aleppo 20:10  כי שמעתי דבת רבים מגור מסביב הגידו ונגידנו כל אנוש שלמי שמרי צלעי אולי יפתה ונוכלה לו ונקחה נקמתנו ממנו
Jere Aleppo 20:11  ויהוה אותי כגבור עריץ על כן רדפי יכשלו ולא יכלו בשו מאד כי לא השכילו כלמת עולם לא תשכח
Jere Aleppo 20:12  ויהוה צבאות בחן צדיק ראה כליות ולב אראה נקמתך מהם כי אליך גליתי את ריבי  {ס}
Jere Aleppo 20:13  שירו ליהוה—הללו את יהוה  כי הציל את נפש אביון מיד מרעים  {ס}
Jere Aleppo 20:14  ארור היום אשר ילדתי בו  יום אשר ילדתני אמי אל יהי ברוך
Jere Aleppo 20:15  ארור האיש אשר בשר את אבי לאמר ילד לך בן זכר—שמח שמחהו
Jere Aleppo 20:16  והיה האיש ההוא כערים אשר הפך יהוה ולא נחם ושמע זעקה בבקר ותרועה בעת צהרים
Jere Aleppo 20:17  אשר לא מותתני מרחם ותהי לי אמי קברי ורחמה הרת עולם
Jere Aleppo 20:18  למה זה מרחם יצאתי לראות עמל ויגון ויכלו בבשת ימי  {פ}