HebModern - Titus - 2

2:1  ואתה דבר את הנאה ללקח הבריא׃

2:2  שיהיו הזקנים משלים ברוחם ומכבדים וצנועים ובריאים באמונה ובאהבה ובסבלנות׃

2:3  וכן הזקנות תהי הנהגתן כאשר נאוה לקדש לא תהיינה מלשינות ולא נכבשות לסבוא יין כי אם מלמדות טוב׃

2:4  ומישרות את הצעירות לאהב את בעליהן ולאהב את בניהן׃

2:5  ולהיות צנועות וטהרות צופיות הליכות ביתן וטבות ונכנעות לבעליהן למען לא יחלל דבר האלהים׃

2:6  ככה תזהיר גם את הבחורים שיהיו צנועים׃

2:7  ובכל דבר היה אתה למופת במעשים טובים בהוראה צרופה ונהדרה׃

2:8  ובדבר בריא ומום אין בו למען יבוש המתקומם ולא ימצא לדבר עליכם רע׃

2:9  העבדים יכנעו לאדניהם ויתרצו להם בכל דבר ולא ימרו את דבריהם׃

2:10  ולא ימעלו מעל כי אם יראו כל אמונה טובה למען יפארו בכל את לקח אלהינו מושיענו׃

2:11  כי הופיע חסד אלהים להושיע את כל בני האדם׃

2:12  וליסר אתנו אשר נתעב הרשע ותאות העולם ונחיה בעולם הזה בצניעות ובצדק ובחסידות׃

2:13  ונחכה לתקוה המאשרת ולהופעת כבוד אלהינו הגדול ומושיענו ישוע המשיח׃

2:14  אשר נתן את נפשו בעדנו לגאלנו מכל עול ולטהר לו עם סגלה הזריז במעשים טובים׃

2:15  את אלה תדבר ותזהיר ותוכיח בכל חזקה ואיש אל יבוז לך׃