LinVB - Zechariah - 1

1:1  O mobu mwa mibale mwa bokonzi bwa Dario, sanza ya mwambe, Yawe alobi na profeta Zakaria, mwana wa Berekya, nkoko wa Ido, maloba maye :

1:2  Yawe asiliki mingi na bankoko ba bino.

1:3  Loba mpe na bango : Yawe wa bokasi bonso alobi boye : Bozongela ngai, maloba ma Yawe wa bokasi bonso, mpe nakozongela bino, elobi bongo Yawe wa bokasi bonso.

1:4  Bozala lokola bankoko ba bino te, baye baprofeta ba kala bapalelaki na maloba maye : Yawe wa bokasi bonso alobi : Botika nzela ebe ya bino, botika misala mibe mya bino. Kasi baboyaki koyoka mpe batosaki ngai te. Maloba ma Yawe.

1:5  Ba­nkoko ba bino bazali wapi sikawa ? Baprofeta bazali tee lelo ?

1:6  Nzoka­nde maloba ma mibeko mya ngai, miye napesaki bango na monoko mwa baprofeta, basaleli ba ngai, mi­komaki epai ya bankoko ba bino ; o ntango ena babongolaki mitema mpe balobaki : « Yawe wa bokasi bo­nso asalaki na biso lokola akanaki, engebene na misala mya biso. »

1:7  O mobu mwa mibale mwa bokonzi bwa Dario, sanza zomi na yoko, sanza Sebat, o mokolo mwa ntuku ibale na minei mwa sanza, Yawe alobi na profeta Zakaria, mwa­na wa Berekya, nkoko wa Ido, malobamaye :

1:8  Na butu namoni limoni liye : Moto moko abuteli farasa etane, atelemi o kati ya nzete ya mapela o lobwaku ; nsima ya ye namoni farasa isusu itane, iindo mpe mpembe.

1:9  Natuni : « Mokonzi wa ngai, bango banani ? » Anzelu oyo azalaki koloba na ngai, azongiseli ngai : « Nakoyebisa yo bango banani. »

1:10  Moto oyo atelemi o kati ya mapela ayanoli : « Bazali bato baye Yawe atindi batambola o mokili mobimba. »

1:11  Na nsima bango balobi na anzelu wa Yawe, oyo atelemi o kati ya nzete ya mapela : « Touti kotambola o mokili mpe tomoni mokili mobimba mozali kimia mpe na boboto. »

1:12  Anzelu wa Yawe atuni lisusu : « Yawe wa bokasi bonso, okozila naino mikolo boni mpo ’te oyokela Yeruzalem na bingumba bya Yuda mawa ? Mibu ntuku nsa­mbo osili oyokeli bango nkanda. »

1:13  Yawe apesi anzelu, oyo azalaki ko­solola na ngai, eyano elamu, eye ekoki kobondo mitema mya bato.

1:14  Anzelu oyo azalaki kosolola na ngai, alobi na ngai : « Oyebisa ba­ngo : Yawe wa bokasi bonso alobi boye : Nazali koyokela Yeruzalem mpe Sion zuwa linene,

1:15  kasi nazali koyokela bikolo bisusu biye bifa­ndi kimia nkanda enene, zambi na mabe ma bango bakolisi nkanda ya ngai.

1:16  Yango wana Yawe alobi boye : Nakozongela Yeruzalem na mo­tema ngolu. Ndako ya ngai ekotongama wana lisusu ; maloba ma Yawe wa bokasi bonso ; bakotanda lisusu mokulu mwa batongi o Yeruzalem.

1:17  Sakola mpe boye : Yawe wa bokasi bonso alobi na bino : Ba­nda lelo bingumba bya ngai bikotonda na biloko ; Yawe akobondo Sion lisusu, akolinga Yeruzalem lisusu. »