ABPGRK - Hebrews - 6

6:1  διό αφέντες τον της αρχής του χριστού λόγον επί την τελειότητα φερώμεθα μη πάλιν θεμέλιον καταβαλλόμενοι μετανοίας από νεκρών έργων και πίστεως επί θεόν

6:2  βαπτισμών διδαχής επιθέσεως τε χειρών αναστάσεως τε νεκρών και κρίματος αιωνίου

6:3  και τούτο ποιήσομεν εάνπερ επιτρέπη ο θεός

6:4  αδύνατον γαρ τους άπαξ φωτισθέντας γευσαμένους τε της δωρεάς της επουρανίου και μετόχους γενηθέντας πνεύματος αγίου

6:5  και καλόν γευσαμένους θεού ρήμα δυνάμεις τε μέλλοντος αιώνος

6:6  και παραπεσόντας πάλιν ανακαινίζειν εις μετάνοιαν ανασταυρούντας εαυτοίς τον υιόν του θεού και παραδειγματίζοντας

6:7  γη γαρ η πιούσα τον επ΄ αυτής πολλάκις ερχόμενον υετόν και τίκτουσα βοτάνην εύθετον εκείνοις δι΄ ους και γεωργείται μεταλαμβάνει ευλογίας από του θεού

6:8  εκφέρουσα δε ακάνθας και τριβόλους αδόκιμος και κατάρας εγγύς ης το τέλος εις καύσιν

6:9  πεπείσμεθα δε περί υμών αγαπητοί τα κρείττονα και εχόμενα σωτηρίας ει και ούτω λαλούμεν

6:10  ου γαρ άδικος ο θεός επιλαθέσθαι του έργου υμών και του κόπου της αγάπης ης ενεδείξασθε εις το όνομα αυτού διακονήσαντες τοις αγίοις και διακονούντες

6:11  επιθυμούμεν δε έκαστον υμών την αυτήν ενδείκνυσθαι σπουδήν προς την πληροφορίαν της ελπίδος άχρι τέλους

6:12  ίνα μη νωθροί γένησθε μιμηταί δε των διά πίστεως και μακροθυμίας κληρονομούντων τας επαγγελίας

6:13  τω γαρ Αβραάμ επαγγειλάμενος ο θεός επεί κατ΄ ουδενός είχε μείζονος ομόσαι ώμοσε καθ΄ εαυτού

6:14  λέγων ημήν ευλογών ευλογήσω σε και πληθύνων πληθυνώ σε

6:15  και ούτω μακροθυμήσας επέτυχε της επαγγελίας

6:16  άνθρωποι μεν γαρ κατά του μείζονος ομνύουσι και πάσης αυτοίς αντιλογίας πέρας εις βεβαίωσιν ο όρκος

6:17  εν ω περισσότερον βουλόμενος ο θεός επιδείξαι τοις κληρονόμοις της επαγγελίας το αμετάθετον της βουλής αυτού εμεσίτευσεν όρκω

6:18  ίνα διά δύο πραγμάτων αμεταθέτων εν οις αδύνατον ψεύσασθαι θεόν ισχυράν παράκλησιν έχωμεν οι καταφυγόντες κρατήσαι της προκειμένης ελπίδος

6:19  ην ως άγκυραν έχομεν της ψυχής ασφαλή τε και βεβαίαν και εισερχομένην εις το εσώτερον του καταπετάσματος

6:20  όπου πρόδρομος υπέρ ημών εισήλθεν Ιησούς κατά την τάξιν Μελχισεδέκ αρχιερεύς γενόμενος εις τον αιώνα