CopSahBible2 - Hosea - 4

4:1  ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ ⲛϣⲏⲣⲉ ⲙⲡ ⲉⲃⲟⲗϫⲉ ⲡϩⲁⲡ ⲙⲡϫⲟⲉⲓⲥ ⲉϥϣⲟⲟⲡ ⲉϫⲛ ⲛⲉⲧⲟⲩⲏϩ ϩⲓϫⲙ ⲡⲕⲁϩ ϫⲉ ⲙⲛ ⲙⲉ ϩⲓϫⲙ ⲡⲕⲁϩ ⲟⲩⲇⲉ ⲛⲁ ⲟⲩⲇⲉ ⲥⲟⲟⲩⲛ ⲛⲛⲟⲩⲧⲉ

4:2  ⲁⲡⲥⲁϩⲟⲩ ⲡⲱⲣϣ ⲉⲃⲟⲗ ϩⲓϫⲙ ⲡⲕⲁϩ ⲁⲩⲱ ⲡϭⲟⲗ ⲙⲛ ⲡϩⲱⲧⲃ ⲙⲛ ⲡϫⲓⲟⲩⲉ ⲙⲛ ⲧⲙⲛⲧⲛⲟⲉⲓⲕ ⲁⲩⲱ ⲥⲉⲛⲁⲡⲉϩⲧ ⲥⲛⲟϥ ⲉⲃⲟⲗ ⲉϫⲛ ⲥⲛⲟϥ

4:3  ⲉⲧⲃⲉ ⲡⲁⲓ ⲡⲕⲁϩ ⲛⲁⲣϩⲏⲃⲉ ⲁⲩⲱ ⲥⲉⲛⲁⲥⲃⲟⲕ ⲛϭⲓ ⲛⲉⲧⲟⲩⲏϩ ⲧⲏⲣⲟⲩ ϩⲓϫⲙ ⲡⲕⲁϩ ⲙⲛ ⲛⲉⲑⲏⲣⲓⲟⲛ ⲛⲧⲥⲱϣⲉ ⲙⲛ ⲛϩⲁⲗⲁⲧⲉ ⲛⲧⲡⲉ ⲙⲛ ⲛⲧⲃⲧ ⲛⲑⲁⲗⲁⲥⲥⲁ ⲥⲉⲛⲁⲱϫⲛ

4:4  ϫⲉⲕⲁⲥ ⲛⲛⲉ ⲗⲁⲁⲩ ϫⲓ ϩⲁⲡ ⲟⲩⲇⲉ ⲛⲛⲉⲩϫⲡⲓⲉ ⲗⲁⲁⲩ ⲁⲩⲱ ⲡⲗⲁⲟⲥ ⲛⲁⲣ ⲑⲉ ⲙⲡⲟⲩⲏⲏⲃ ⲉⲧⲟⲩⲱϩⲙ ϩⲁⲣⲟϥ

4:5  ϥⲛⲁⲣ ϭⲱⲃ ϩⲙ ⲡⲉϩⲟⲟⲩ ⲁⲩⲱ ⲡⲕⲉⲡⲣⲟⲫⲏⲧⲏⲥ ⲛⲁⲣ ϭⲱⲃ ⲛⲙⲙⲁϥ ⲧⲉⲕⲙⲁⲁⲩ ⲛⲧⲁⲓⲧⲛⲧⲱⲛⲥ ⲉⲧⲉⲩϣⲏ

4:6  ⲁ ⲡⲁⲗⲁⲟⲥ ⲣ ⲑⲉ ⲙⲡⲉⲧⲉ ⲙⲛⲧϥ ⲥⲟⲟⲩⲛ ⲙⲙⲁⲩ ϫⲉ ⲛⲧⲟⲕ ⲁⲕⲛⲟⲩϫⲉ ⲉⲃⲟⲗ ⲙⲙⲟⲕ ⲙⲡⲥⲟⲟⲩⲛ ⲁⲛⲟⲕ ϩⲱ ϯⲛⲁⲛⲟϫⲕ ⲉⲃⲟⲗ ⲉⲧⲙϣⲙϣⲉ ⲛⲁⲓ ⲁⲩⲱ ⲁⲕⲣ ⲡⲱⲃϣ ⲙⲡⲛⲟⲙⲟⲥ ⲙⲡⲉⲕⲛⲟⲩⲧⲉ ⲁⲛⲟⲕ ϩⲱ ϯⲛⲁⲣ ⲡⲱⲃϣ ⲛⲛⲉⲕϣⲏⲣⲉ

4:7  ⲕⲁⲧⲁ ϣⲏ ⲧⲁⲓ ⲧⲉ ⲑⲉ ⲛⲧⲁⲩⲣ ⲛⲟⲃⲉ ⲉⲣⲟⲓ ϯⲛⲁⲕⲱ ⲙⲡⲉⲩⲉⲟⲟⲩ ⲉⲩⲥⲱϣ

4:8  ⲥⲉⲛⲁⲟⲩⲱⲙ ⲛⲛⲛⲟⲃⲉ ⲙⲡⲁⲗⲁⲟⲥ ⲁⲩⲱ ⲥⲉⲛⲁϫⲓ ⲛⲛⲉⲩⲯⲩⲭⲏ ϩⲛ ⲛⲉⲩϫⲓⲛϭⲟⲛⲥ

4:9  ⲁⲩⲱ ⲡⲟⲩⲏⲏⲃ ⲛⲁⲣ ⲑⲉ ⲙⲡⲗⲁⲟⲥ ⲁⲩⲱ ϯⲛⲁϫⲓ ⲕⲃⲁ ⲛⲛⲉϥⲁⲛⲟⲙⲓⲁ ⲉϩⲣⲁⲓ ⲉϫⲱϥ ⲁⲩⲱ ⲛⲉϥⲙⲉⲉⲩⲉ ⲛϩⲏⲧ ϯⲛⲁⲧⲟⲟⲃⲟⲩ ⲛⲁϥ

4:10  ⲥⲉⲛⲁⲟⲩⲱⲙ ⲁⲩⲱ ⲛⲥⲉⲛⲁⲥⲉⲓ ⲁⲛ ⲁⲩⲡⲟⲣⲛⲉⲩⲉ ⲁⲩⲱ ⲛⲥⲉⲛⲁⲥⲟⲟⲩⲧⲛ ⲁⲛ ⲉⲃⲟⲗ ϫⲉ ⲁⲩⲕⲁⲡⲉϫⲟⲉⲓⲥ ⲛⲥⲱⲟⲩ ⲉⲧⲣⲉⲩϩⲁⲣⲉϩ

4:11  ⲉⲧⲡⲟⲣⲛⲉⲓⲁ ⲁⲩⲱ ⲡϩⲏⲧ ⲙⲡⲗⲁⲟⲥ ⲁϥϣⲱⲡ ⲉⲣⲟϥ ⲛⲟⲩⲏⲣⲡ ⲙⲛⲟⲩϯϩⲉ

4:12  ⲁϥϣⲓⲛⲉ ⲙⲡⲉϥϣⲉ ⲁⲩⲱ ⲁϥⲣⲟⲩⲱ ⲛⲁϥ ϩⲛⲛⲉⲩϭⲉⲣⲟⲟⲃ ϫⲉ ⲁⲩⲡⲗⲁⲛⲁ ϩⲛⲟⲩⲡⲛⲁ ⲙⲡⲟⲣⲛⲓⲁ ⲁⲩⲱ ⲁⲩⲡⲟⲣⲛⲉⲩⲉ ⲁⲩⲕⲁⲡⲛⲟⲩⲧⲉ ⲛⲥⲱⲟⲩ

4:13  ⲁⲩⲧⲁⲗⲉⲑⲩⲥⲓⲁ ⲉϩⲣⲁⲓ ϩⲓϫⲛ ⲛⲕⲟⲟϩ ⲛⲛⲧⲟⲟⲩ ⲁⲩⲱ ⲁⲩϯϣⲟⲩϩⲏⲛⲉ ⲉϩⲣⲁⲓ ϩⲓϫⲛ ⲛⲃⲟⲩⲛⲟⲥ ϩⲁⲟⲩⲥⲓ ⲉⲙⲛⲟⲩⲗⲉⲩⲕⲏ ⲙⲛⲟⲩϣⲏⲛ ⲉϥⲣϩⲁⲓⲃⲉⲥ ϫⲉ ⲛⲁⲛⲟⲩⲧⲉϥϩⲁⲓ̈ⲃⲉⲥ ⲉⲧⲃⲉ ⲡⲁⲓ ⲥⲉⲛⲁⲡⲟⲣⲛⲉⲩⲉ ⲛϭⲓ ⲛⲉⲧⲛϣⲉⲉⲣⲉ ⲁⲩⲱ ⲛⲉⲧⲛϣⲉⲗⲉⲉⲧ ⲥⲉⲛⲁⲣⲙⲛⲧⲛⲟⲉⲓⲕ

4:14  ⲁⲩⲱ ϯⲛⲁϭⲙⲡϣⲓⲛⲉ ⲁⲛ ⲛⲛⲉⲧⲛϣⲉⲉⲣⲉ ⲉⲩϣⲁⲛⲡⲟⲣⲛⲉⲩⲉ ⲁⲩⲱ ⲛⲉⲧⲛϣⲉⲗⲉⲉⲧ ⲉⲩϣⲁⲛⲣⲙⲛⲧⲛⲟⲉⲓⲕ ϫⲉ ⲛⲧⲟⲟⲩ ⲁⲩⲧⲱϩ ⲙⲛⲙⲡⲟⲣⲛⲟⲥ ⲁⲩⲱ ⲁⲩϯϩⲏⲛⲉ ⲉϩⲣⲁⲓ ⲛⲛⲉⲧⲥⲟⲟϥ ⲁⲩⲱ ⲡⲗⲁⲟⲥ ⲉⲧⲉ ⲟⲩⲛⲥⲟⲟⲩⲛ ⲛϩⲏⲧϥ ⲁϥϭⲗⲟⲙⲗⲙ ⲉⲩⲡⲟⲣⲛⲏ

4:15  ⲛⲧⲟⲕ ⲇⲉ ⲡⲓⲏⲗ ⲙⲡⲣⲁⲧⲥⲟⲟⲩⲛ ⲁⲩⲱ ⲓⲟⲩⲇⲁ ⲙⲡⲣⲃⲱⲕ ⲉϩⲟⲩⲛ ⲉⲅⲁⲗⲇⲁⲗⲁ ⲟⲩⲇⲉ ⲙⲡⲣⲃⲱⲕ ⲉϩⲣⲁⲓ ⲉⲡⲏⲓ ⲙⲡϫⲓⲛϭⲟⲛⲥ ⲁⲩⲱ ⲙⲡⲣⲱⲣⲕ ⲙⲡϫⲟⲉⲓⲥ ⲉⲧⲟⲛϩ

4:16  ϫⲉ ⲛⲑⲉ ⲛⲟⲩⲃⲁⲥϩⲉ ⲉⲥⲛⲟⲩϣⲡ ⲧⲁⲓ ⲧⲉ ⲑⲉ ⲉⲛⲧⲁⲡ ⲛⲟⲩϣⲡ ⲧⲉⲛⲟⲩ ϥⲛⲁⲙⲟⲟⲛⲉ ⲙⲙⲟⲟⲩ ⲛϭⲓ ⲡϫⲟⲉⲓⲥ ⲛⲑⲉ ⲛⲟⲩϩⲓⲉⲓⲃ ϩⲛ ⲟⲩⲙⲁ ⲉϥⲟⲩⲟϣⲥ ⲉⲃⲟⲗ

4:17  ⲉⲫⲣⲁⲓⲙ ⲁϥⲱⲡ ⲉⲛⲉⲓⲇⲱⲗⲟⲛ ⲁϥⲕⲱ ⲛⲁϥ ⲉϩⲣⲁⲓ ⲛϩⲉⲛⲥⲕⲁⲛⲇⲁⲗⲟⲛ

4:18  ⲁϥⲕⲱϩ ⲉⲛⲉⲭⲁⲛⲁⲛⲁⲓⲟⲥ ϩⲛ ⲟⲩⲡⲟⲣⲛⲓⲁ ⲁⲩⲡⲟⲣⲛⲉⲩⲉ ⲉⲧⲃⲏⲏⲧ ⲁⲩⲙⲉⲣⲉⲡⲥⲱϣ ⲉⲃⲟⲗ ϩⲙ ⲡⲉϥϣⲟⲩϣⲟⲩ

4:19  ⲟⲩⲛⲟⲩϩⲁⲧⲏⲩ ⲛⲁⲱϣ ⲉⲃⲟⲗ ϩⲛ ⲛⲉϥⲧⲛϩ ⲁⲩⲱ ⲥⲉⲛⲁϫⲓϣⲓⲡⲉ ⲉⲃⲟⲗ ϩⲛ ⲛⲉⲩⲑⲩⲥⲓⲁⲥⲧⲏⲣⲓⲟⲛ