TpiKJPB - James - 4

4:1  ¶ Ol bikpela pait na ol pait namel long yupela i kam long we? Ating i yes long ol i kam long hia, yes, long dispela ol aigris bilong yupela i wokim ol bikpela pait insait long ol hap bilong bodi bilong yupela?

4:2  Yupela i aigris, na yupela i no gat. Yupela i kilim man, na gat laik long kisim, na yupela i no inap long kisim. Yupela i pait na wokim bikpela pait, tasol yupela i no gat, bilong wanem, yupela i no askim.

4:3  Yupela i askim, na yupela i no kisim, bilong wanem, yupela i askim rong, inap long yupela i ken kaikai dispela olgeta long ol aigris bilong yupela.

4:4  Yupela ol man na meri bilong bagarapim marit wantaim pamuk pasin, ating yupela i no save long pasin pren wantaim dispela graun em i pasin birua wantaim God? Olsem na husat man i gat laik long stap pren bilong dispela graun em i birua bilong God.

4:5  Yupela i ting long rait bilong God i tok nating, Dispela spirit husat i stap insait long yumi i aigris inap long mangal tingting?

4:6  Tasol em i givim marimari moa. Olsem na em i tok, God i sanap na birua long hambak man, tasol em i givim marimari long man bilong daunim em yet.

4:7  Olsem na putim yupela yet aninit long God. Sanap na birua long Seten, na em bai ranawe long yupela.

4:8  Go klostu long God, na em bai go klostu long yupela. Klinim ol han bilong yupela, yupela ol sinman. Na klinim ol bel bilong yupela, yupela ol man bilong tupela tingting.

4:9  Kisim hevi, na soim sori, na krai tru. Larim ol lap bilong yupela i tanim i kamap pasin bilong soim sori, na amamas tru bilong yupela i kamap pasin hevi.

4:10  Daunim yupela yet long ai bilong Bikpela, na em bai litimapim yupela.

4:11  ¶ No ken toktok nogut wanpela i go long sait bilong narapela, ol brata. Em husat i toktok nogut long sait bilong brata bilong em, na jasim brata bilong em, i toktok nogut long sait bilong lo, na jasim lo. Tasol sapos yu jasim lo, yu no stap wanpela man bilong bihainim lo, tasol wanpela jas.

4:12  I gat wanpela man bilong givim lo, husat em i inap long kisim bek na long bagarapim olgeta. Yu husat long yu jasim narapela?

4:13  Goan nau, yupela husat i tok, Tude o tumora mipela bai go insait long wanpela kain biktaun, na stap yet long dispela hap wanpela yia, na baim na salim samting, na kisim win samting,

4:14  We yupela i no save long wanem samting bai stap long de bihain. Long wanem, laip bilong yupela em i wanem samting? Yes, em i wanpela smuk wara, dispela i kamap ples klia long liklik taim tasol, na nau em i pinis olgeta i go.

4:15  Long wanem, em i gutpela moa long yupela i tok, Sapos Bikpela i laik, mipela bai stap laip, na mekim dispela, o dispela.

4:16  Tasol nau yupela i wokim amamas tru long ol tok hambak bilong yupela. Olgeta kain pasin bilong wokim amamas tru olsem em i nogut.

4:17  Olsem na long em husat i save long mekim gutpela, na em i no mekim, long em dispela em i sin.