CopSahBible2 - Jeremiah - 45

45:1  ⲁϥⲥⲱⲧⲙ ⲇⲉ ⲛϭⲓ ⲥⲁⲫⲁⲛⲓⲁⲥ ⲡϣⲏⲣⲉ ⲛⲛⲁⲑⲁⲛ ⲙⲛ ⲅⲟⲇⲟⲗⲓⲁⲥ ⲡϣⲏⲣⲉ ⲙⲡⲁⲥⲭⲱⲣ ⲙⲛ ⲓⲁⲭⲁⲗ ⲡϣⲏⲣⲉ ⲛⲥⲉⲗⲉⲙⲓⲁⲥ ⲉⲛϣⲁϫⲉ ⲉⲛⲧⲁϥϫⲟⲟⲩ ⲛϭⲓ ⲓⲉⲣⲉⲙⲓⲁⲥ ⲉϫⲙ ⲡⲗⲁⲟⲥ ⲉϥϫⲱ ⲙⲙⲟⲥ

45:2  ϫⲉ ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ⲡⲉⲧⲛⲁϩⲙⲟⲟⲥ ϩⲛ ⲧⲉⲓⲡⲟⲗⲓⲥ ϥⲛⲁⲙⲟⲩ ϩⲛ ⲧⲥⲏϥⲉ ⲙⲛ ⲡⲉϩⲕⲟ ⲡⲉⲧⲛⲁⲃⲱⲕ ⲇⲉ ⲉⲃⲟⲗ ϣⲁ ⲛⲉⲭⲁⲗⲇⲁⲓⲟⲥ ϥⲛⲁⲛⲟⲩϩⲙ ⲁⲩⲱ ⲧⲉϥⲯⲩⲭⲏ ⲛⲁϣⲱⲡⲉ ⲉⲩϩⲏⲩ ⲛϥⲟⲩϫⲁⲓ

45:3  ϫⲉ ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ϩⲛ ⲟⲩϯ ⲥⲉⲛⲁϯ ⲛⲧⲉⲓⲡⲟⲗⲓⲥ ⲉⲛϭⲓϫ ⲛⲧϭⲟⲙ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲛϥϫⲓⲧⲥ

45:4  ⲁⲩⲱ ⲡⲉϫⲁⲩ ⲙⲡⲣⲣⲟ ϫⲉ ⲙⲁⲣⲟⲩⲙⲉⲩⲧ ⲡⲣⲱⲙⲉ ⲉⲧⲙⲙⲁⲩ ϫⲉ ⲛⲧⲟϥ ⲉⲧⲃⲱⲗ ⲉⲃⲟⲗ ⲛⲛϭⲓϫ ⲛⲛⲣⲱⲙⲉ ⲉⲧⲙⲓϣⲉ ⲛⲁⲓ ⲉⲧϣⲟϫⲡ ϩⲛ ⲧⲡⲟⲗⲓⲥ ⲙⲛ ⲛϭⲓϫ ⲙⲡⲗⲁⲟⲥ ⲧⲏⲣϥ ⲉϥϣⲁϫⲉ ⲛⲙⲙⲁⲩ ⲕⲁⲧⲁ ⲛⲉⲓϣⲁϫⲉ ϫⲉ ⲡⲉⲓⲣⲱⲙⲉ ⲛϥϫⲉ ϣⲁϫⲉ ⲁⲛ ⲉⲛⲁⲛⲟⲩϥ ⲉⲩⲉⲓⲣⲏⲛⲏ ⲙⲡⲉⲓⲗⲁⲟⲥ ⲁⲗⲗⲁ ϩⲉⲛⲡⲉⲑⲟⲟⲩ ⲉⲧϥⲧⲁⲟⲩⲟ ⲙⲙⲟⲟⲩ ⲉⲣⲟⲟⲩ

45:5  ⲡⲉϫⲉⲡⲣⲣⲟ ⲛⲁⲩ ϫⲉ ⲉⲓⲥ ϩⲏⲏⲧⲉ ⲛⲧⲟϥ ϥϩⲛ ⲛⲉⲧⲛϭⲓϫ ⲉⲃⲟⲗ ϫⲉ ⲙⲡϥϣ ϭⲙ ϭⲟⲙ ⲉⲣⲟⲟⲩ ⲛϭⲓ ⲡⲣⲣⲟ

45:6  ⲁⲩⲱ ⲁⲩⲛⲟϫϥ ⲉϩⲣⲁⲓ ⲉⲡϣⲏⲓ ⲙⲙⲉⲗⲭⲓⲁⲥ ⲡϣⲏⲣⲉ ⲙⲡⲣⲣⲟ ⲡⲁⲓ ⲉⲧϩⲛⲧⲁⲩⲗⲏ ⲙⲡⲉϣⲧⲉⲕⲟ ⲁⲩⲱ ⲁϥⲭⲁⲗⲁ ⲙⲙⲟϥ ⲉϩⲣⲁⲓ ⲉⲡϣⲏⲓ ⲡϣⲏⲓ ⲇⲉ ⲛⲉⲙⲛⲙⲟⲟⲩ ⲛϩⲏⲧϥ ⲁⲗⲗⲁ ⲟⲩⲗⲟⲉⲓϩⲉ ⲡⲉ ⲁⲩⲱ ⲛⲉϥϩⲣⲁⲓ ϩⲙ ⲡⲗⲟⲉⲓϩⲉ ⲡⲉ

45:7  ⲁϥⲥⲱⲧⲙ ⲇⲉ ⲛϭⲓ ⲁⲃⲇⲉⲙⲉⲗⲉⲭ ⲡⲉϭⲱϣ ⲁⲩⲱ ⲛⲧⲟϥ ⲛⲉϥϩⲙ ⲡⲏⲓ ⲙⲡⲣⲣⲟ ⲡⲉ ϫⲉ ⲁⲩⲛⲉϫ ⲓⲉⲣⲉⲙⲓⲁⲥ ⲉϩⲣⲁⲓ ⲉⲡϣⲏⲓ ⲡⲣⲣⲟ ⲇⲉ ⲛⲉϥϩⲛ ⲧⲁⲩⲗⲏ ⲃⲃⲉⲛⲓⲁⲙⲉⲓⲛ

45:8  ⲁⲩⲱ ⲁⲃⲇⲉⲙⲉⲗⲉⲭ ⲁϥⲉⲓ ⲉⲃⲟⲗ ⲁϥϣⲁϫⲉ ⲙⲛ ⲡⲣⲣⲟ ⲉϥϫⲱ ⲙⲙⲟⲥ ⲛⲁϥ

45:9  ϫⲉ ⲁⲕⲣⲡⲉⲑⲟⲟⲩ ϩⲛ ⲛⲉⲛⲧⲁⲕⲁⲁⲩ ⲉⲧⲣⲉⲕⲙⲟⲩⲟⲩⲧ ⲙⲡⲣⲱⲙⲉ ⲙⲡⲛⲟⲩⲧⲉ ϩⲛ ⲟⲩϩⲕⲟ ϫⲉ ⲙⲛ ⲟⲉⲓⲕ ϫⲓⲛ ⲧⲉⲛⲟⲩ ϩⲛ ⲧⲡⲟⲗⲓⲥ

45:10  ⲁⲩⲱ ⲁϥϩⲱⲛ ⲛϭⲓ ⲡⲣⲣⲟ ⲉⲧⲟⲟⲧϥ ⲛⲁⲃⲇⲉⲙⲉⲗⲉⲭ ⲉϥϫⲱ ⲙⲙⲟⲥ ⲛⲁϥ ϫⲉ ϫⲓ ⲛⲙⲙⲁⲕ ⲙⲙⲁⲁⲃ ⲛⲣⲱⲙⲉ ⲉⲃⲟⲗ ϩⲙ ⲡⲉⲓⲙⲁ ⲛⲅⲛⲧϥ ⲉϩⲣⲁⲓ ϩⲙ ⲡϣⲏⲉⲓ ϫⲉ ⲛⲉϥⲙⲟⲩ

45:11  ⲁⲩⲱ ⲁϥϫⲓ ⲛϭⲓ ⲁⲃⲇⲉⲙⲉⲗⲉⲭ ⲛⲛⲣⲱⲙⲉ ⲁϥⲃⲱⲕ ⲉϩⲟⲩⲛ ⲉⲡⲏⲓ ⲙⲡⲣⲣⲟ ⲉⲧϩⲁⲡⲉⲥⲏⲧ ⲁϥϫⲓ ⲛϩⲉⲛⲡⲗϭⲉ ⲛⲧⲟⲉⲓⲥ ⲙⲡⲙⲁ ⲉⲧⲙⲙⲁⲩ ⲙⲛ ϩⲉⲛⲛⲟⲩϩ ⲙⲡⲗϭⲉ ⲁϥⲛⲟϫⲟⲩ ⲛⲓⲉⲣⲉⲙⲓⲁⲥ ⲉⲡⲉⲥⲏⲧ ⲉⲡϣⲏⲉⲓ

45:12  ⲡⲉϫⲁϥ ⲛⲁϥ ϫⲉ ⲛⲉϫ ⲛⲁⲓ ϩⲁⲣⲟⲟⲩ ⲛⲛⲛⲟⲩϩ ⲁϥⲉⲓⲣⲉ ⲛⲧⲉⲓϩⲉ ⲛϭⲓ ⲓⲉⲣⲉⲙⲓⲁⲥ

45:13  ⲁⲩⲥⲟⲕϥ ϩⲣⲁⲓ ϩⲛ ⲛⲛⲟⲩϩ ⲁⲩⲉⲓⲛⲉ ⲙⲙⲟϥ ⲉϩⲣⲁⲓ ϩⲙ ⲡϣⲏⲓ ⲁⲩⲱ ⲁϥϩⲙⲟⲟⲥ ⲛϭⲓ ⲓⲉⲣⲉⲙⲓⲁⲥ ϩⲛ ⲧⲁⲩⲗⲏ ⲙⲡⲉϣⲧⲉⲕⲟ

45:14  ⲁⲡⲣⲣⲟ ⲥⲉⲇⲉⲕⲓⲁⲥ ϫⲟⲟⲩ ⲁϥⲙⲟⲩⲧⲉ ⲉⲣⲟϥ ⲛⲁϥ ⲉϩⲣⲁⲓ ⲉⲡⲙⲉϩ ϣⲟⲙⲧ ⲛⲏⲓ ⲛⲧⲉ ⲥⲁⲗⲓⲥⲓⲏⲗ ⲉⲧϩⲙⲡⲏⲓ ⲙⲡϫⲟⲉⲓⲥ ⲡⲉϫⲉⲡⲣⲣⲟ ⲛⲁϥ ϫⲉ ϯϫⲛⲟⲩ ⲙⲙⲟⲕ ⲉⲩϣⲁϫⲉ ⲙⲡⲣϩⲉⲡⲗⲁⲁⲩ ⲉⲣⲟⲓ

45:15  ⲡⲉϫⲉⲓⲉⲣⲉⲙⲓⲁⲥ ⲙⲡⲣⲣⲟ ϫⲉ ⲉⲉⲓϣⲁⲛⲧⲁⲙⲟⲕ ⲟⲩϫⲓ ϩⲛ ⲟⲩⲙⲟⲩ ⲕⲛⲁⲙⲟⲟⲩⲧ ⲁⲩⲱ ⲉⲓϣⲁⲛϫⲓ ϣⲟϫⲛⲉ ⲛⲁⲕ ⲛⲅⲛⲁⲥⲱⲧⲙ ⲁⲛ ⲉⲣⲟⲓ

45:16  ⲁϥⲱⲣⲕ ⲛⲁϥ ⲛϭⲓ ⲡⲣⲣⲟ ⲉϥϫⲱ ⲙⲙⲟⲥ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ⲡⲁⲓ ⲉⲛⲧⲁϥⲧⲁⲙⲓⲟ ⲛⲁⲛ ⲛⲧⲉⲓⲯⲩⲭⲏ ϫⲉ ⲛϯⲛⲁⲙⲟⲟⲩⲧⲕ ⲁⲛ ⲁⲩⲱ ⲛϯⲛⲁⲧⲁⲁⲕ ⲁⲛ ⲉϩⲣⲁⲓ ⲉⲛϭⲓϫ ⲛⲛⲉⲓⲣⲱⲙⲉ

45:17  ⲁⲩⲱ ⲡⲉϫⲉⲓⲉⲣⲉⲙⲓⲁⲥ ⲛⲁϥ ϫⲉ ⲧⲁⲓ ⲧⲉ ⲑⲉ ⲉⲛⲧⲁⲡϫⲟⲉⲓⲥ ϫⲟⲟⲥ ϫⲉ ⲉϣⲱⲡⲉ ϩⲛ ⲟⲩⲉⲓ ⲉⲕϣⲁⲛⲉⲓ ⲉⲃⲟⲗ ϣⲁ ⲛϩⲏⲅⲉⲙⲱⲛ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲥⲛⲁⲱⲛϩ ⲛϭⲓ ⲧⲉⲕⲯⲩⲭⲏ ⲁⲩⲱ ⲧⲉⲓⲡⲟⲗⲓⲥ ⲛⲛⲉⲩⲣⲟⲕϩⲥ ϩⲛ ⲟⲩⲥⲁⲧⲉ ⲁⲩⲱ ⲕⲛⲁⲱⲛϩ ⲛⲧⲟⲕ ⲙⲛ ⲡⲉⲕⲏⲓ

45:18  ⲉϣⲱⲡⲉ ⲇⲉ ⲉⲕϣⲁⲛⲧⲙⲉⲓ ⲉⲃⲟⲗ ⲥⲉⲛⲁϯ ⲛⲧⲉⲓⲡⲟⲗⲓⲥ ⲉⲛϭⲓϫ ⲛⲛⲉⲭⲁⲗⲇⲁⲓⲟⲥ ⲛⲥⲉⲣⲟⲕϩⲥ ϩⲛ ⲟⲩⲥⲁⲧⲉ ⲁⲩⲱ ⲛⲧⲟⲕ ⲕⲛⲁⲛⲟⲩϩⲙ ⲁⲛ

45:19  ⲡⲉϫⲉⲡⲣⲣⲟ ⲛⲓⲉⲣⲉⲙⲓⲁⲥ ϫⲉ ⲁⲛⲟⲕ ⲟⲩⲛϯ ⲟⲩϣⲁϫⲉ ⲙⲙⲁⲩ ⲛⲧⲉ ⲛⲓⲟⲩⲇⲁⲓ ⲛⲁⲓ ⲉⲛⲧⲁⲩⲡⲱⲧ ϣⲁ ⲛⲉⲭⲁⲗⲇⲁⲓⲟⲥ ⲙⲏⲡⲱⲥ ⲛⲥⲉⲧⲁⲁⲧ ⲉϩⲣⲁⲓ ⲉⲛⲉⲩϭⲓϫ ⲁⲩⲱ ⲛⲥⲉⲥⲱⲃⲉ ⲛⲥⲱⲓ

45:20  ⲡⲉϫⲉⲓⲉⲣⲉⲙⲓⲁⲥ ⲛⲁϥ ϫⲉ ⲛⲥⲉⲛⲁⲧⲁⲁⲕ ⲁⲛ ⲥⲱⲧⲙ ⲉⲡϣⲁϫⲉ ⲙⲡϫⲟⲉⲓⲥ ⲡⲁⲓ ⲁⲛⲟⲕ ⲉϯⲛⲁϫⲟⲟϥ ⲛⲁⲕ ⲁⲩⲱ ⲟⲩⲛⲟⲩⲡⲉⲧⲛⲁⲛⲟⲩϥ ⲛⲁϣⲱⲡⲉ ⲛⲁⲕ ⲛⲥⲱⲛϩ ⲛϭⲓ ⲧⲉⲕⲯⲩⲭⲏ

45:21  ⲉϣϫⲉ ⲛⲅⲟⲩⲱϣ ⲇⲉ ⲁⲛ ⲛⲧⲟⲕ ⲉⲉⲓ ⲉⲃⲟⲗ ⲡⲁⲓ ⲡⲉ ⲡϣⲁϫⲉ ⲉⲛⲧⲁⲡϫⲟⲉⲓⲥ ⲧⲁⲙⲟⲓ ⲉⲣⲟϥ

45:22  ϫⲉ ⲉⲓⲥ ⲛⲉϩⲓⲟⲙⲉ ⲧⲏⲣⲟⲩ ⲉⲛⲧⲁⲩϣⲱϫⲡ ϩⲙ ⲡⲏⲓ ⲙⲡⲣⲣⲟ ⲛⲓⲟⲩⲇⲁ ⲥⲉⲛⲁⲛⲧⲟⲩ ⲉⲃⲟⲗ ϣⲁ ⲛⲁⲣⲭⲱⲛ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲛⲁⲓ ⲛⲉⲩϫⲱ ⲙⲙⲟⲥ ϫⲉ ⲁⲩⲁⲡⲁⲧⲁ ⲙⲙⲟⲕ ⲁⲩⲱ ⲥⲉⲛⲁϭⲙϭⲟⲙ ⲉⲣⲟⲕ ⲛϭⲓ ⲛⲣⲱⲙⲉ ⲛⲧⲉⲕⲉⲓⲣⲏⲛⲏ ⲛⲥⲉⲧⲁϫⲣⲟ ⲙⲡⲉⲥⲗⲁⲁⲧⲉ ⲛⲛⲉⲕⲟⲩⲉⲣⲏⲧⲉ

45:23  ⲛⲉⲕϩⲓⲟⲙⲉ ⲁⲉⲓⲕⲧⲟⲟⲩ ⲉⲃⲟⲗ ⲙⲙⲟⲕ ⲛⲉⲕϣⲏⲣⲉ ⲥⲉⲛⲁⲛⲧⲟⲩ ⲉⲃⲟⲗ ϣⲁ ⲛⲉⲭⲁⲗⲇⲁⲓⲟⲥ ⲛⲧⲟⲕ ⲇⲉ ⲛⲅⲛⲁⲟⲩϫⲁⲓ ⲁⲛ ϫⲉ ⲥⲉⲛⲁⲧⲁϩⲟⲕ ϩⲓⲧⲛ ⲛϭⲓϫ ⲙⲡⲣⲣⲟ ⲛⲧⲃⲁⲃⲩⲗⲱⲛ ⲁⲩⲱ ⲧⲉⲓⲡⲟⲗⲓⲥ ⲥⲉⲛⲁⲣⲟⲕϩⲥ ϩⲛ ⲟⲩⲥⲁⲧⲉ

45:24  ⲁⲩⲱ ⲡⲉϫⲉⲡⲣⲣⲟ ⲛⲁϥ ϫⲉ ⲙⲡⲣⲧⲣⲉⲣⲱⲙⲉ ⲉⲓⲙⲉ ⲉⲛⲉⲉⲓϣⲁϫⲉ ⲁⲩⲱ ⲛⲅⲛⲁⲙⲟⲩ ⲁⲛ

45:25  ⲉⲩϣⲁⲛⲥⲱⲧⲙ ⲇⲉ ⲛϭⲓ ⲛⲁⲣⲭⲱⲛ ϫⲉ ⲁⲉⲓϣⲁϫⲉ ⲛⲙⲙⲁⲕ ⲛⲥⲉⲉⲓ ϣⲁⲣⲟⲕ ⲛⲥⲉϫⲟⲟⲥ ⲛⲁⲕ ϫⲉ ⲙⲁⲧⲁⲙⲟⲛ ϫⲉ ⲟⲩ ⲡⲉⲛⲧⲁⲡⲣⲣⲟ ϫⲟⲟϥ ⲛⲁⲕ ⲙⲡⲣϩⲱⲡ ⲉⲣⲟⲛ ⲁⲩⲱ ⲛⲧⲛⲛⲁϩⲟⲧⲃⲉⲕ ⲁⲛ ⲟⲩ ⲡⲉⲛⲧⲁⲡⲣⲣⲟ ϫⲟⲟϥ ⲛⲁⲕ

45:26  ⲉⲕⲉϫⲟⲟⲥ ⲛⲁⲩ ϫⲉ ⲁⲛⲟⲕ ⲉⲉⲓⲡⲱϩⲧ ⲙⲡⲁⲛⲁ ⲛⲛⲁϩⲣⲙⲡϩⲟ ⲙⲡⲣⲣⲟ ⲉⲧⲙⲧⲣⲉϥⲕⲧⲟⲓ ⲉⲡⲏⲓ ⲛⲓⲱⲛⲁⲑⲁⲛ ⲉⲧⲣⲁⲙⲟⲩ ⲙⲙⲁⲩ

45:27  ⲁⲩⲉⲓ ⲇⲉ ⲛϭⲓ ⲛⲁⲣⲭⲱⲛ ⲧⲏⲣⲟⲩ ϣⲁ ⲓⲉⲣⲉⲙⲓⲁⲥ ⲁⲩϫⲛⲟⲩϥ ⲁⲩⲱ ⲁϥⲧⲁⲙⲟⲟⲩ ⲉⲛⲉⲓϣⲁϫⲉ ⲧⲏⲣⲟⲩ ⲉⲛⲧⲁⲡⲣⲣⲟ ϩⲟⲛⲟⲩ ⲉⲧⲟⲟⲧϥ ⲉⲧⲃⲉ ⲡⲁⲓ ⲁⲩⲕⲁⲣⲱⲟⲩ ϫⲉ ⲙⲡⲟⲩⲥⲉⲧⲙϣⲁϫⲉ ⲛⲧⲟⲟⲧϥ

45:28  ⲁϥϩⲙⲟⲟⲥ ⲛϭⲓ ⲓⲉⲣⲉⲙⲓⲁⲥ ϩⲛ ⲧⲁⲩⲗⲏ ⲙⲡⲉϣⲧⲉⲕⲟ ϣⲁ ⲡⲉⲩⲟⲉⲓϣ ⲉⲛⲧⲁⲩϫⲓ ⲑⲓⲏⲙ