Geez - Judges - 14

14:1  ወወረደ ፡ ሶምሶን ፡ ውስተ ፡ ተምናታ ፡ ወርእየ ፡ ብእሲተ ፡ በተምናታ ፡ እምነ ፡ አዋልደ ፡ አሎፍል ፡ ወአደመቶ ፡ ቅድሜሁ ።

14:2  ወዐርገ ፡ ወነገሮሙ ፡ ለአቡሁ ፡ ወለእሙ ፡ ወይቤሎሙ ፡ ርኢኩ ፡ ብእሲተ ፡ በተምናታ ፡ እምነ ፡ አዋልደ ፡ አሎፍል ፡ ወይእዜኒ ፡ ንሥእዋ ፡ ሊተ ፡ ብእሲተ ።

14:3  ወይቤልዎ ፡ አቡሁ ፡ ወእሙ ፡ ቦኑ ፡ አልቦ ፡ እምነ ፡ አዋልደ ፡ አኀዊከ ፡ ወበውስተ ፡ ኵሉ ፡ ሕዝብየ ፡ ብእሲተ ፡ ከመ ፡ ትሑር ፡ አንተ ፡ ወትንሣእ ፡ ብእሲተ ፡ እምነ ፡ አዋልደ ፡ አሎፍል ፡ ቈላፍያን ፡ ወይቤሎ ፡ ሶምሶን ፡ ለአቡሁ ፡ ኪያሃ ፡ ዳእሙ ፡ ንሥኡ ፡ ሊተ ፡ እስመ ፡ አደመተኒ ፡ ውስተ ፡ አዕይንትየ ።

14:4  ወኢያእመሩ ፡ አቡሁ ፡ ወእሙ ፡ ከመ ፡ እምኀበ ፡ እግዚአብሔር ፡ ውእቱ ፡ እስመ ፡ በቀለ ፡ ይፈቅድ ፡ ውእቱ ፡ እምነ ፡ አሎፍል ፡ ወበእማንቱ ፡ መዋዕል ፡ አሎፍል ፡ ይቀንይዎሙ ፡ ለእስራኤል ።

14:5  ወወረደ ፡ ሶምሶን ፡ ወአቡሁ ፡ ወእሙ ፡ ውስተ ፡ ተምናታ ፡ ወተግሕሠ ፡ ውስተ ፡ ዐጸደ ፡ ወይን ፡ ዘተምናታ ፡ ወናሁ ፡ አንበሳ ፡ ተቀበሎ ፡ እንዘ ፡ ይጥሕር ።

14:6  ወመጽአ ፡ ላዕሌሁ ፡ መንፈሰ ፡ እግዚአብሔር ፡ ወነፅኆ ፡ ከመ ፡ ዘይነፅኅ ፡ ማሕሥአ ፡ ጠሊ ፡ ወከመ ፡ ወኢምንተ ፡ ኮነ ፡ ውስተ ፡ እዴሁ ፡ ወኢያይድዐ ፡ ለአቡሁ ፡ ወለእሙ ፡ ዘገብረ ።

14:7  ወዐርጉ ፡ ወተናገሩ ፡ [በእንተ ፡ ብእሲት ፡] ወአደመቶ ፡ ቅድሜሁ ፡ ለሶምሶን ።

14:8  ወተመይጠ ፡ እምድኅረ ፡ መዋዕል ፡ ከመ ፡ ይንሥኣ ፡ ወተግሕሠ ፡ ከመ ፡ ይርአዮ ፡ ለዝክቱ ፡ በድነ ፡ አንበሳ ፡ ወናሁ ፡ ንህብ ፡ ውስተ ፡ አፉሁ ፡ ለውእቱ ፡ አንበሳ ፡ ኀደረ ፡ ወቦ ፡ መዓረ ።

14:9  ወነሥኦ ፡ ወበልዐ ፡ ወሖረ ፡ እንዘ ፡ ይበልዕ ፡ ወበጽሐ ፡ ኀበ ፡ አቡሁ ፡ ወእሙ ፡ ወወሀቦሙ ፡ ወበልዑ ፡ ወኢያይድዖሙ ፡ ከመ ፡ እምነ ፡ አፈ ፡ አንበሳ ፡ አውፅኦ ፡ ለውእቱ ፡ መዓር ።

14:10  ወወረደ ፡ አቡሁ ፡ ኀበ ፡ ይእቲ ፡ ብእሲት ፡ ወነበረ ፡ ህየ ፡ ሶምሶን ፡ ሰቡዐ ፡ መዋዕለ ፡ እስመ ፡ ከማሁ ፡ ይነብሩ ፡ ወራዙት ።

14:11  ወእምዝ ፡ ሶበ ፡ ፈርህዎ ፡ ሤሙ ፡ ላዕሌሁ ፡ ካልኣነ ፡ ሠላሳ ፡ ወነበሩ ፡ ምስሌሁ ።

14:12  ወይቤሎሙ ፡ ሶምሶን ፡ እሜስል ፡ ለክሙ ፡ አምሳለ ፡ ወእመ ፡ አይዳዕክሙኒ ፡ አምሳልየ ፡ በእላንቱ ፡ ሰቡዕ ፡ መዋዕል ፡ ዘበዓል ፡ ወረከብክሙ ፡ እሁበክሙ ፡ ፴ሰንዱናተ ፡ ወ፴አልባሰ ።

14:13  ወእመሰ ፡ ስእንክሙ ፡ አይድዖትየ ፡ ትሁቡኒ ፡ አንትሙ ፡ ሊተ ፡ ፴ሰንዱናተ ፡ ወ፴አልባሰ ፡ ወይቤልዎ ፡ ምስል ፡ አምሳሊከ ፡ ወንስማዕ ።

14:14  ወይቤሎሙ ፡ እምነ ፡ በላዒ ፡ ወፅአ ፡ መብልዕ ፡ ወእምነ ፡ ጽኑዕ ፡ ወጽአ ፡ ጥዑም ፡ ወስእኑ ፡ አይድዖቶ ፡ አምሳሊሁ ፡ እስከ ፡ ሠሉስ ፡ መዋዕል ።

14:15  ወእምዝ ፡ አመ ፡ ራብዕት ፡ ዕለት ፡ ይቤልዋ ፡ ለብእሲተ ፡ ሶምሶን ፡ አስፍጥዮ ፡ ለምትኪ ፡ ወይንግርኪ ፡ አምሳሊሁ ፡ ከመ ፡ ኢናውዒክሙ ፡ በእሳት ፡ ለኪ ፡ ወለቤተ ፡ አቡኪ ፡ አው ፡ ከመ ፡ ታንድዩነኑ ፡ ጸዋዕክሙነ ።

14:16  ወበከየት ፡ ላዕሌሁ ፡ ብእሲቱ ፡ ለሶምሶን ፡ ወትቤሎ ፡ ጸላእከኒ ፡ ወአታፈቅረኒ ፡ እስመ ፡ አምሳሊከ ፡ ዘመሰልከ ፡ ለደቂቀ ፡ ሕዝብየ ፡ ኢነገርከኒ ፡ ሊተ ፡ ወይቤላ ፡ ሶምሶን ፡ ናሁ ፡ ለአቡየ ፡ ወለእምየ ፡ ኢነገርክዎሙ ፡ ለኪኑ ፡ እንከ ፡ እንግርኪ ።

14:17  ወበከየት ፡ ላዕሌሁ ፡ ሰቡዐ ፡ መዋዕለ ፡ ዘበዓል ፡ ወእምዝ ፡ አመ ፡ ሳብዕት ፡ ዕለት ፡ ነገራ ፡ ሶበ ፡ አስርሐቶ ፡ ወአይድዐቶሙ ፡ ለደቂቀ ፡ ሕዝባ ።

14:18  ወይቤልዎ ፡ እሙንቱ ፡ ዕደው ፡ አመ ፡ ሳብዕት ፡ ዕለት ፡ እንበለ ፡ ትዕረብ ፡ ፀሐይ ፡ ምንት ፡ ይጥዕም ፡ እምነ ፡ መዓር ፡ ወምንት ፡ ይጸንዕ ፡ እምነ ፡ አንበሳ ፡ ወይቤሎሙ ፡ ሶምሶን ፡ ሶበ ፡ ኢያስራሕክምዋ ፡ ለእጐልትየ ፡ እምኢረከብክምዋ ፡ ለአምሳልየ ።

14:19  ወመጽአ ፡ መንፈሰ ፡ እግዚአብሔር ፡ [ላዕሌሁ ፡] ወወረደ ፡ ውስተ ፡ ኦስቀሎና ፡ ወቀተለ ፡ ፴ብእሴ ፡ ወሠለቦሙ ፡ አልባሲሆሙ ፡ ወወሀቦሙ ፡ ለእለ ፡ አይድዕዎ ፡ አምሳሊሁ ፡ ወተምዕዐ ፡ መዐተ ፡ ሶምሶን ፡ ወአተወ ፡ ቤተ ፡ አቡሁ ።

14:20  ወነበረት ፡ ብእሲተ ፡ ሶምሶን ፡ ምስለ ፡ መጋቤ ፡ መርዓሁ ፡ ካልኡ ።