Geez - Judges - 13

13:1  ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወአግብኦሙ ፡ ውስተ ፡ እደ ፡ አሎፍል ፡ ፵ዓመ ።

13:2  ወሀለወ ፡ ብእሲ ፡ ዘእምነ ፡ ሰራሕ ፡ ዘእምነ ፡ ነገደ ፡ ዳን ፡ ወስሙ ፡ መኖሔ ፡ ወብእሲቱሰ ፡ መካን ፡ ይእቲ ፡ ወኢትወልድ ።

13:3  ወአስተርአያ ፡ መልአከ ፡ እግዚአብሔር ፡ ለብእሲቱ ፡ ወይቤላ ፡ ናሁ ፡ መካን ፡ አንቲ ፡ ወኢወለድኪ ፡ ወትፀንሲ ፡ ወትወልዲ ፡ ወልደ ።

13:4  ወይእዜኒ ፡ ተዓቀቢ ፡ ወኢትስተዪ ፡ ወይነ ፡ ወሜሰ ፡ ወኢትብልዒ ፡ ኵሎ ፡ ዘርኩስ ።

13:5  እስመ ፡ ናሁ ፡ ትፀንሲ ፡ ወትወልዲ ፡ ወልደ ፡ ወኢይለክፎ ፡ ርእሶ ፡ ኀፂን ፡ እስመ ፡ ቅዱስ ፡ ውእቱ ፡ ናዝራዊ ፡ ለእግዚአብሔር ፡ ውእቱ ፡ ሕፃን ፡ እምነ ፡ ከርሠ ፡ እሙ ፡ ወውእቱ ፡ ይእኅዝ ፡ ያድኅኖሙ ፡ ለእስራኤል ፡ እምነ ፡ እደ ፡ አሎፍል ።

13:6  ወሖረት ፡ ይእቲ ፡ ብእሲት ፡ ወነገረቶ ፡ ለምታ ፡ ወትቤሎ ፡ ብእሴ ፡ እግዚአብሔር ፡ መጽአ ፡ ኀቤየ ፡ ወርእየቱ ፡ ከመ ፡ ርእየተ ፡ መልአከ ፡ እግዚአብሔር ፡ ወግሩም ፡ ውእቱ ፡ ጥቀ ፡ ወተስእልክዎ ፡ እምአይቴ ፡ ውእቱ ፡ ወኢያይድዐኒ ፡ ስሞ ።

13:7  ወይቤለኒ ፡ ናሁ ፡ ትፀንሲ ፡ ወትወልዲ ፡ ወልደ ፡ ወይእዜኒ ፡ ኢትስተዪ ፡ ወይነ ፡ ወሜሰ ፡ ወኢትብልዒ ፡ ኵሎ ፡ ዘርኩስ ፡ እስመ ፡ ናዝራዊ ፡ ውእቱ ፡ ሕፃን ፡ ለእግዚአብሔር ፡ እምነ ፡ ከርሠ ፡ እሙ ፡ እስከ ፡ አመ ፡ ይመውት ።

13:8  ወሰአለ ፡ መኖሔ ፡ ኀበ ፡ እግዚአብሔር ፡ ወይቤ ፡ እግዚኦ ፡ ብእሴ ፡ እግዚአብሔር ፡ ዘፈኖከ ፡ ኀቤነ ፡ ለይምጻእ ፡ ኀቤነ ፡ ወያለብወነ ፡ ምንተ ፡ ንገብር ፡ ለውእቱ ፡ ሕፃን ፡ ዘይትወለድ ።

13:9  ወሰምዖ ፡ እግዚአብሔር ፡ ቃሎ ፡ ለመኖሔ ፡ ወመጽአ ፡ መልአከ ፡ እግዚአብሔር ፡ ኀበ ፡ ብእሲቱ ፡ ዓዲ ፡ ደግመ ፡ እንዘ ፡ ትነብር ፡ ውስተ ፡ ገዳም ፡ ወኢሀለወ ፡ መኖሔ ፡ ምታ ፡ ምስሌሃ ።

13:10  ወሮጸት ፡ ብእሲቱ ፡ ወአፍጠነት ፡ ወነገረቶ ፡ ለምታ ፡ ወትቤሎ ፡ ናሁ ፡ ኦስተርአየኒ ፡ ዝክቱ ፡ ብእሲ ፡ ዘመጽአ ፡ ኀቤየ ፡ ቀዲሙ ።

13:11  ወተንሥአ ፡ መኖሔ ፡ ወሖረ ፡ ወተለዋ ፡ ለብእሲቱ ፡ ኀበ ፡ ውእቱ ፡ ብእሲ ፡ ወይቤሎ ፡ አንተኑ ፡ ውእቱ ፡ ዝክቱ ፡ ብእሲ ፡ ዘተናገርከ ፡ ምስለ ፡ ብእሲትየ ፡ ወይቤሎ ፡ ውእቱ ፡ መልአክ ፡ አነ ፡ ውእቱ ።

13:12  ወይቤሎ ፡ መኖሔ ፡ ይእዜ ፡ ሶበ ፡ በጽሐ ፡ ቃልከ ፡ ምንት ፡ ውእቱ ፡ ነገሩ ፡ ለውእቱ ፡ ሕፃን ፡ ወግብሩ ።

13:13  ወይቤሎ ፡ መልአከ ፡ እግዚአብሔር ፡ ለመኖሔ ፡ እምነ ፡ ኵሉ ፡ ዘእቤላ ፡ ለብእሲትከ ፡ ተዓቀቡ ።

13:14  እምነ ፡ ኵሉ ፡ ዘይወፅእ ፡ እምነ ፡ ወይን ፡ ኢይብላዕ ፡ ወወይነ ፡ ወሜሰ ፡ ኢይስተይ ፡ ወኵሎ ፡ ርኩሰ ፡ ኢይብላዕ ፡ ወኵሎ ፡ ዘአዘዝክዋ ፡ ተዓቀቡ ።

13:15  ወይቤሎ ፡ መኖሔ ፡ ለመልአከ ፡ እግዚአብሔር ፡ ናጌብረከ ፡ ወንግበር ፡ ለከ ፡ ማሕሥአ ፡ ጠሊ ፡ ቅድሜከ ።

13:16  ወይቤሎ ፡ መልአከ ፡ እግዚአብሔር ፡ ለመኖሔ ፡ እመሰ ፡ አገበርከኒ ፡ ኢይበልዕ ፡ እንከ ፡ እክለከ ፡ ወእመሰ ፡ ለእግዚአብሔር ፡ ገበርከ ፡ መሥዋዕተ ፡ ግበር ፡ ሎቱ ።

13:17  ወይቤሎ ፡ መኖሔ ፡ ለመልአከ ፡ እግዚአብሔር ፡ መኑ ፡ ስምከ ፡ ከመ ፡ አመ ፡ በጽሐ ፡ ቃልከ ፡ ንሰብሕከ ።

13:18  ወይቤሎ ፡ መልአከ ፡ እግዚአብሔር ፡ ለምንት ፡ ዝንቱ ፡ ዘትሴአል ፡ ስምየ ፡ ወመድምም ፡ ውእቱ ።

13:19  ወነሥአ ፡ መኖሔ ፡ ማሕሥአ ፡ ጠሊ ፡ ወመሥዋዕተ ፡ ወአዕረገ ፡ ውስተ ፡ ኰኵሕ ፡ ለእግዚአብሔር ፡ ዘይገብር ፡ መድምመ ፡ ለእግዚእ ፡ ወርእይዎ ፡ መኖሔ ፡ ወብእሲቱ ፡ ሶበ ፡ ዐርገ ፡ ነድ ፡ እመልዕልተ ፡ ምሥዋዕ ፡ ውስተ ፡ ሰማይ ።

13:20  ወዐርገ ፡ መልአከ ፡ እግዚአብሔር ፡ በነደ ፡ ምሥዋዕ ፡ ውስተ ፡ ሰማይ ፡ ወመኖሔሰ ፡ ወብእሲቱ ፡ ርእይዎ ፡ ወወድቁ ፡ በገጾሙ ፡ ውስተ ፡ ምድር ።

13:21  ወኢደገመ ፡ እንከ ፡ መልአከ ፡ እግዚአብሔር ፡ አስተርእዮቶ ፡ ለመኖሔ ፡ ወለብእሲቱ ፡ ወይእተ ፡ ጊዜ ፡ አእመረ ፡ መኖሔ ፡ ከመ ፡ መልአ[ከ ፡ እግዚአብሔር ፡] ውእቱ ።

13:22  ወይቤላ ፡ መኖሔ ፡ ለብእሲቱ ፡ ሞተ ፡ ንመውት ፡ እስመ ፡ ርኢናሁ ፡ ለእግዚአብሔር ።

13:23  ወትቤሎ ፡ ብእሲቱ ፡ ሶበ ፡ ፈቀደ ፡ ይቅትለነ ፡ እግዚአብሔር ፡ እምኢተመጠወ ፡ እምነ ፡ እዴነ ፡ መሥዋዕተነ ፡ ወቍርባነነ ፡ ወእምኢያለበወነ ፡ ኵሎ ፡ ዘንተ ፡ ወበከመሰ ፡ መዋዕሊሁ ፡ እምኢያስምዐነ ፡ ዘንተ ።

13:24  ወወለደት ፡ ወልደ ፡ ይእቲ ፡ ብእሲት ፡ ወሰመየት ፡ ስሞ ፡ ሶምሶን ፡ ወባረኮ ፡ እግዚአብሔር ፡ ወልህቀ ፡ ውእቱ ፡ ሕፃን ።

13:25  ወአሐዘ ፡ መንፈሰ ፡ እግዚአብሔር ፡ ይሑር ፡ ምስሌሁ ፡ ውስተ ፡ ትዕይንተ ፡ ዳን ፡ ማእከለ ፡ ሳራ ፡ ወማእከለ ፡ እስታሔል ።