Geez - Judges - 18

18:1  ወበእማንቱ ፡ መዋዕል ፡ አልቦሙ ፡ ንጉሠ ፡ እስራኤል ፡ ወበእማንቱ ፡ መዋዕል ፡ የኀሥሡ ፡ ሎሙ ፡ ሕዝበ ፡ ዳን ፡ ርስተ ፡ ኀበ ፡ ይነብሩ ፡ እስመ ፡ ኢረከቡ ፡ እስከ ፡ ይእቲ ፡ አሚር ፡ ርስተ ፡ በማእከለ ፡ ሕዝበ ፡ እስራኤል ።

18:2  ወፈነው ፡ ደቂቀ ፡ ዳን ፡ እምነ ፡ ሕዝቦሙ ፡ ኀምስተ ፡ ዕደወ ፡ እምነ ፡ መክፈልቶሙ ፡ ደቂቀ ፡ ኀይል ፡ እምነ ፡ ሰአራ ፡ ወአስታሖል ፡ ከመ ፡ ይርአይዋ ፡ ለምድር ፡ ወያእምርዋ ፡ ወይቤልዎሙ ፡ ሑሩ ፡ ርእዩ ፡ ለነ ፡ ምድረ ፡ ወበጽሑ ፡ ውስተ ፡ ደብረ ፡ ኤፍሬም ፡ ኀበ ፡ ቤተ ፡ ሚካ ፡ ወኀደሩ ፡ ህየ ፡ እሙንቱ ፡ ኀበ ፡ ቤተ ፡ ሚካ ።

18:3  ወአእመርዎ ፡ ቃሎ ፡ ለውእቱ ፡ ወልድ ፡ ወሬዛ ፡ ሌዋዊ ፡ ወቦኡ ፡ ህየ ፡ ወይቤልዎ ፡ መኑ ፡ አምጽአከ ፡ ዝየ ፡ ወምንተ ፡ ትገብር ፡ በዝየ ፡ ወምንተ ፡ ብከ ፡ በዝየ ።

18:4  ወይቤሎሙ ፡ ከመዝ ፡ ወከመዝ ፡ ረሰየኒ ፡ ሚካ ፡ ወዐሰበኒ ፡ ወኮንክዎ ፡ ካህነ ።

18:5  ወይቤልዎ ፡ ተሰአል ፡ ኀበ ፡ እግዚአብሔር ፡ እመ ፡ ይሴርሐነ ፡ ፍኖተነ ፡ እንተ ፡ ነሐውር ፡ ውስቴታ ፡ ንሕነ ።

18:6  ወይቤሎሙ ፡ ውእቱ ፡ ካህን ፡ ሑሩ ፡ በሰላም ፤ ይእቲ ፡ ፍኖትክሙ ፡ ቅድመ ፡ እግዚአብሔር ፡ እንተ ፡ ባቲ ፡ ተሐውሩ ።

18:7  ወሖሩ ፡ እሙንቱ ፡ ዕደው ፡ ወበጽሑ ፡ ውስተ ፡ ሌሳ ፡ ወርእዩ ፡ ሕዝበ ፡ እለ ፡ ይነብሩ ፡ ውስቴታ ፡ ተአሚኖሙ ፡ ይነብሩ ፡ በሕገ ፡ ሲዶና ፡ ህዱኣን ፡ ወዕሩፋን ፡ እንዘ ፡ ይትአመኑ ፡ ወኢክህሉ ፡ ነቢበ ፡ ቃ[ል] ፡ ውስተ ፡ ምድ[ር] ፡ ርስተ ፡ መዝገብ ፡ እስመ ፡ ርሑቃን ፡ እሙንቱ ፡ እምነ ፡ ሲዶና ፡ ወአልቦሙ ፡ ተልሓፈ ፡ ምስለ ፡ ሶርያ ።

18:8  ወገብኡ ፡ እልክቱ ፡ ኀምስቱ ፡ ዕደው ፡ ኀበ ፡ አኀዊሆሙ ፡ ውስተ ፡ ሶራሐ ፡ ወኤስታሖል ፡ ወይቤልዎሙ ፡ ምንት ፡ ያነብረክሙ ።

18:9  ተንሥኡ ፡ ወንሑር ፡ ላዕሌሃ ፡ እስመ ፡ ቦእናሃ ፡ ወአንሶሰውናሃ ፡ ለይእቲ ፡ ምድር ፡ እስከ ፡ አጽናፊሃ ፡ ወርኢነ ፡ ሕዝበ ፡ እለ ፡ ይነብሩ ፡ ውስቴታ ፡ በሕገ ፡ ሲዶና ፡ [ወርኁቃን ፡ እሙንቱ ፡ እምነ ፡ ሲዶና ፡] ወአልቦሙ ፡ ተልሓፈ ፡ ምስለ ፡ ሶርያ ፡ ወባሕቱ ፡ ተንሥኡ ፡ ወንዕረግ ፡ ላዕሌሆሙ ፡ እስመ ፡ ርኢናሃ ፡ ለይእቲ ፡ ምድር ፡ ሠናይት ፡ ጥቀ ፡ ወአንትሙሰ ፡ አርምሙ ፡ ወኢትትሀከዩ ፡ ሐዊረ ፡ ወበዊአ ፡ ከመ ፡ ትትዋረስዋ ፡ ለይእቲ ፡ ምድር ።

18:10  ወእምከመ ፡ ቦእክሙ ፡ ትበጽሑ ፡ ኀበ ፡ ሕዝብ ፡ እለ ፡ ተአሚኖሙ ፡ ይነብሩ ፡ ወምድርኒ ፡ ረኃብ ፡ እስመ ፡ አግብአ ፡ እግዚአብሔር ፡ ውስተ ፡ አዴክሙ ፡ ብሔረ ፡ ዘአልቦ ፡ ዘይትኀጣእ ፡ እምነ ፡ ኵሉ ፡ ቃል ፡ ዘተፈጥረ ፡ ውስተ ፡ ምድር ።

18:11  ወተንሥኡ ፡ እምነ ፡ ህየ ፡ አምነ ፡ ብሔረ ፡ ዳን ፡ እምነ ፡ ሰራሕ ፡ ወኤ[ስ]ታሖል ፡ ስድስቱ ፡ ምእት ፡ ብእሲ ፡ እ[ለ] ፡ ቅኑታኒሆሙ ፡ ይጸውሩ ፡ ንዋየ ፡ ሐቅሎሙ ።

18:12  ወዐርጉ ፡ ወኀደሩ ፡ ውስተ ፡ ቀርያት[ያ]ርም ፡ ውስተ ፡ ይሁዳ ፡ ወበእንተ ፡ ዝንቱ ፡ ተሰምየ ፡ ውእቱ ፡ መካን ፡ ትዕይንተ ፡ ዳን ፡ እስከ ፡ ዮም ፡ መንገለ ፡ ድኅሬሃ ፡ ለቀርያትያርም ።

18:13  ወኀሊፎሙ ፡ እምህየ ፡ በጽሑ ፡ ውስተ ፡ ደብረ ፡ ኤፍሬም ፡ ወመጽኡ ፡ እስከ ፡ ኀበ ፡ ቤተ ፡ ሚካ ።

18:14  ወይቤልዎሙ ፡ እልክቱ ፡ ኀምስቱ ፡ ዕደው ፡ እለ ፡ ሖሩ ፡ ከመ ፡ ይርአይዋ ፡ ለይእቲ ፡ ምድረ ፡ ሌሳ ፡ ወይቤልዎሙ ፡ ለአኀዊሆሙ ፡ ሶበ ፡ ታአምሩ ፡ ከመ ፡ ቦቱ ፡ ውስተ ፡ ዝንቱ ፡ አብያት ፡ ምስለ ፡ ወቴራፍን ፡ ወግልፎ ፡ ወስብኮ ፡ ወይእዜኒ ፡ አእምሩ ፡ ዘትገብሩ ።

18:15  ወገሐሡ ፡ ህየ ፡ ወቦኡ ፡ ውስተ ፡ ቤቱ ፡ ለውእቱ ፡ ወልድ ፡ ሌዋዊ ፡ ውስተ ፡ ቤተ ፡ ሚካ ።

18:16  ወተአምኅዎ ፡ እልክቱ ፡ ስድስቱ ፡ ምእት ፡ ብእሲ ፡ እንዘ ፡ ይጸውሩ ፡ ንዋየ ፡ ሐቅሎሙ ፡ ቅኑታኒሆሙ ፡ ወተጋብኡ ፡ ኀበ ፡ ኆኅተ ፡ አንቀጽ ፡ እለ ፡ እምነ ፡ ደቂቀ ፡ ዳን ።

18:17  ወዐርጉ ፡ እልክቱ ፡ ኀምስቱ ፡ ዕደው ፡ እለ ፡ ሖሩ ፡ ቀዲሙ ፡ ከመ ፡ ይርአዩ ፡ ምድረ ፡ ወቦኡ ፡ ህየ ፡ ወነሥኡ ፡ ዝክተ ፡ ምስለ ፡ ወግልፎ ፡ ወቴራፍን ፡ ወስብኮ ፡ ወዝክቱሰ ፡ ካህን ፡ ይቀውም ፡ ኀበ ፡ ኆኅተ ፡ አንቀጽ ፡ ወእልክቱኒ ፡ ፯፻ብእሲ ፡ ይጸውሩ ፡ ንዋየ ፡ ሐቅሎሙ ፡ ቅኑታኒሆሙ ።

18:18  ወቦኡ ፡ እሙንቱ ፡ ዕደው ፡ ውስተ ፡ ቤተ ፡ ሚካ ፡ ወነሥኡ ፡ ዝክተ ፡ ግልፎ ፡ ወምስለ ፡ ወቴራፍን ፡ ወስብኮ ፡ ወይቤሎሙ ፡ ዝክቱ ፡ ካህን ፡ ምንተ ፡ ትገብሩ ፡ አንትሙ ።

18:19  ወይቤልዎ ፡ አርምም ፡ ወደይ ፡ እዴከ ፡ ውስተ ፡ አፉከ ፡ ወነዓ ፡ ምስሌነ ፡ ወትከውነነ ፡ አቡነ ፡ ወካህነ ፡ ቦኑ ፡ ይኄይሰከ ፡ ትኩን ፡ ካህነ ፡ ለአሐዱ ፡ ብእሲ ፡ እምነ ፡ ትኩን ፡ ካህነ ፡ ለነገድ ፡ ወለሕዝበ ፡ እስራኤል ።

18:20  ወተፈሥሐ ፡ ልቡ ፡ ለውእቱ ፡ ካህን ፡ ወነሥአ ፡ ውእተ ፡ ምስለ ፡ ወቴራፍን ፡ ወግልፎ ፡ ወስብኮ ፡ ወቦአ ፡ ማእከለ ፡ ሕዝብ ።

18:21  ወተመይጡ ፡ ወሖሩ ፡ ወነሥኡ ፡ ኵሎ ፡ ቤቶ ፡ ወጥሪቶ ፡ ዘክብሩ ፡ ወነድኡ ፡ ቅድሜሆሙ ።

18:22  ወእንበለ ፡ ይርሐቁ ፡ እምነ ፡ ቤት ፡ መጽአ ፡ ሚካ ፡ ወዕደው ፡ ሕዝብ ፡ እለ ፡ ቅሩበ ፡ ቤቱ ፡ ለሚካ ፡ ወጸርኁ ፡ እምድኅሬሆሙ ፡ ለደቂቀ ፡ ዳን ፡ ወአውየው ፡ ሎሙ ፡ ለደቂቀ ፡ ዳን ።

18:23  ወተመይጡ ፡ ገጾሙ ፡ ደቂቀ ፡ ዳን ፡ ወይቤልዎ ፡ ለሚካ ፡ ምንተ ፡ ኮንከ ፡ ዘትጸርኅ ።

18:24  ወይቤሎሙ ፡ ሚካ ፡ ግልፎየ ፡ ዘገበርኩ ፡ ነሣእክሙኒ ፡ ወካህን[የ]ኒ ፡ ወሖርክሙ ፡ ወምንተ ፡ እንከ ፡ ኀደግሙ ፡ ሊተ ፡ ወትብሉኒ ፡ ምንተ ፡ ትጸርኅ ።

18:25  ወይቤልዎ ፡ ደቂቀ ፡ ዳን ፡ ኢይሰማዕ ፡ እንከ ፡ ቃልከ ፡ ምስሌነ ፡ ወእመአኮሰ ፡ ይትራከቡከ ፡ ዕደው ፡ መሪራነ ፡ ነፍስ ፡ ወተሐጕል ፡ ዓዲ ፡ ነፍስከ ፡ ወነፍሰ ፡ ቤትከ ።

18:26  ወሖሩ ፡ ደቂቀ ፡ ዳን ፡ ፍኖቶሙ ፡ ወርእየ ፡ [ሚካ ፡] ከመ ፡ ይጸንዕዎ ፡ ወተመይጠ ፡ ወአተወ ፡ ቤቶ ።

18:27  ወእሙንቱሰ ፡ ነሥኡ ፡ ኵሎ ፡ ዘገብረ ፡ ሚካ ፡ ወካህነኒ ፡ ወኵሎ ፡ ዘቦ ፡ ወሖሩ ፡ እስከ ፡ ሌሳ ፡ ላዕለ ፡ ሕዝብ ፡ ዕሩፍ ፡ ዘተአሚኖ ፡ ይነብር ፡ ወቀተልዎሙ ፡ በአፈ ፡ ኀፂን ፡ ወሀገሮሙኒ ፡ አውዐዩ ።

18:28  ወአልቦ ፡ ዘድኅነ ፡ እስመ ፡ ርኁቃን ፡ እሙንቱ ፡ እምነ ፡ ሲዶና ፡ ወአልቦሙ ፡ ተልሓፈ ፡ ምስለ ፡ ባዕድ ፡ ሰብእ ፡ ወይእቲሰ ፡ ውስተ ፡ ቈላት ፡ እንተ ፡ ቤተ ፡ ጦብ ፡ ወሐነጽዋ ፡ ለይእቲ ፡ ሀገር ፡ ወነበሩ ፡ ውስቴታ ።

18:29  ወሰመዩ ፡ ስማ ፡ ለይእቲ ፡ ሀገር ፡ ዳን ፡ በስመ ፡ አቡሆሙ ፡ ዳን ፡ ዘተወልደ ፡ ለእስራኤል ፡ ወስማሰ ፡ ለይእቲ ፡ ሀገር ፡ ቀዲሙ ፡ [ሌሳ] ።

18:30  ወአቀሙ ፡ ሎሙ ፡ ደቂቀ ፡ ዳን ፡ ግልፎ ፡ ዘሚካ ፡ ወዮናታን ፡ ወልደ ፡ ጌርሶም ፡ ወልደ ፡ ምናሴ ፡ ውእቱ ፡ ወደቂቁ ፡ ካህናት ፡ እሙንቱ ፡ ለሕዝቦ ፡ ዳን ፡ እስከ ፡ አመ ፡ ፈለሰት ፡ ምድሮሙ ።

18:31  ወአቀሙ ፡ ሎሙ ፡ ግልፎ ፡ ዘሚካ ፡ ዘገብረ ፡ በኵሉ ፡ መዋዕል ፡ አምጣነ ፡ ነበረ ፡ ቤተ ፡ እግዚአብሔር ፡ ውስተ ፡ ሴሎም ።