Geez - Judges - 3

3:1  ወኀደጎሙ ፡ እግዚአብሔር ፡ ለእሉ ፡ አሕዛብ ፡ ከመ ፡ ያመክሮሙ ፡ ቦሙ ፡ ለእስራኤል ፡ ኵሎሙ ፡ እለ ፡ ኢያእመሩ ፡ ኵሎ ፡ ፀብኦሙ ፡ ለከናአን ።

3:2  ዳእሙ ፡ በእንተ ፡ ትውልዶሙ ፡ ለደቂቀ ፡ እስራኤል ፡ ከመ ፡ ይምሀርዎሙ ፡ ቀትለ ፡ ወባሕቱ ፡ እለ ፡ እምቅድሜሆሙኒ ፡ ኢያአመርዎሙ ።

3:3  ለእሉ ፡ ኀምስቱ ፡ አሕዛበ ፡ አሎፍሊ ፡ ወኵሉ ፡ ከናአን ፡ ወሲዶና ፡ ወኤዌዎን ፡ እለ ፡ ይነብሩ ፡ ውስተ ፡ ኢባኖስ ፡ እምነ ፡ ደብረ ፡ ባላሄርሞን ፡ እስከ ፡ ሎቤመት ።

3:4  ወተርፉ ፡ ከመ ፡ ያመክሮሙ ፡ ቦሙ ፡ ለእስራኤል ፡ ከመ ፡ ያእምር ፡ እመ ፡ ይሰምዑ ፡ ትእዛዘ ፡ እግዚአብሔር ፡ ዘአዘዞሙ ፡ ለአበዊሆሙ ፡ በእደ ፡ ሙሴ ።

3:5  ወነበሩ ፡ ደቂቀ ፡ እስራኤል ፡ ማእከለ ፡ ከናኔዎን ፡ ወኬጤዎን ፡ ወአሞሬዎን ፡ ወፌሬዜዎን ፡ ወኤዌዎን ፡ ወኢያቡሴዎን ።

3:6  ወነሥኡ ፡ አዋልዲሆሙ ፡ አውሰቡ ፡ ወአዋልዲሆሙ ፡ ወሀቡ ፡ ለደቂቆሙ ፡ ወአምለኩ ፡ ለአማልክቲሆሙ ።

3:7  ወገብሩ ፡ ደቂቀ ፡ እስራኤል ፡ እኩየ ፡ ቅድመ ፡ እግዚአብሔር ፡ ወረስዕዎ ፡ ለእግዚአብሔር ፡ አምላኮሙ ፡ ወአምለኩ ፡ በዓልም ፡ ወአምሳሊሆሙ ።

3:8  ወተምዕዐ ፡ መዐተ ፡ እግዚአብሔር ፡ ላዕለ ፡ እስራኤል ፡ ወአግብኦሙ ፡ ውስተ ፡ እደ ፡ ኩሳ ፡ አርሳቴም ፡ ንጉሠ ፡ ሶርያ ፡ ዘሜሶጶጦምያ ፡ አፍላግ ፡ ወተቀንዩ ፡ ደቂቀ ፡ እስራኤል ፡ ለኩሳ ፡ አርሳቴም ፡ ሰማንተ ፡ ዓመተ ።

3:9  ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ ወአቀመ ፡ ሎሙ ፡ እግዚአብሔር ፡ መድኀኒተ ፡ ለእስራኤል ፡ ወአድኀኖሙ ፡ ጎቶንየል ፡ ወልደ ፡ ቄኔዝ ፡ እኁሁ ፡ ለካሌብ ፡ ዘይንእስ ፡ ወተአዘዙ ፡ ሎቱ ።

3:10  ወኮነ ፡ ላዕሌሁ ፡ መንፈሰ ፡ እግዚአብሔር ፡ ወኰነኖሙ ፡ ለእስራኤል ፡ ወወፅአ ፡ ፀብአ ፡ ወአግብኦ ፡ እግዚአብሔር ፡ ውስተ ፡ እዴሁ ፡ ለኩሳ ፡ አርሳቴም ፡ ንጉሠ ፡ ሶርያ ።

3:11  ወአዕረፈት ፡ ምድር ፡ ኀምሳ ፡ ዓመተ ፡ ወሞተ ፡ ጎቶኒየል ፡ ወልደ ፡ ቄኔዝ ።

3:12  ወደገሙ ፡ ደቂቀ ፡ እስራኤል ፡ ገቢረ ፡ እኩይ ፡ ቅድመ ፡ እግዚአብሔር ፡ ወአጽንዖ ፡ እግዚአብሔር ፡ ለኤግሎም ፡ ንጉሠ ፡ ሞአብ ፡ ላዕለ ፡ እስራኤል ፡ እስመ ፡ ገብሩ ፡ እኪተ ፡ ቅድመ ፡ እግዚአብሔር ።

3:13  ወኦስተጋብአ ፡ ላዕሌሆሙ ፡ ኵሎ ፡ ደቂቀ ፡ ዐሞን ፡ ወዐማሌቅ ፡ ወሖረ ፡ ወቀተሎሙ ፡ ለእስራኤል ፡ ወተወርሰ ፡ ሀገረ ፡ ፊኒቆን ።

3:14  ወተቀንዩ ፡ ደቂቀ ፡ እስራኤል ፡ ለኤግሎም ፡ ንጉሠ ፡ ሞአብ ፡ ዐሠርተ ፡ ወሰማንተ ፡ ዓመተ ።

3:15  ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ፡ ወአቀመ ፡ ሎሙ ፡ እግዚአብሔር ፡ መድኀኒተ ፡ ናኦድ ፡ ወልደ ፡ ጌራ ፡ ወልደ ፡ ኢያሜኒ ፡ ብእሲ ፡ ዘክልኤሆን ፡ እደዊሁ ፡ የማኑ ፡ ወፈነው ፡ ደቂቀ ፡ እስራኤል ፡ አምኃ ፡ ምስሌሁ ፡ ለዔግሎም ፡ ንጉሠ ፡ ሞአብ ።

3:16  ወገብረ ፡ ሎቱ ፡ ናኦድ ፡ መጥባሕተ ፡ እንተ ፡ ክልኤቱ ፡ አፈዊሃ ፡ እንተ ፡ ሥዝር ፡ ኑኃ ፡ ወቀነታ ፡ ታሕተ ፡ ቅናቱ ፡ ውስተ ፡ ሐቌሁ ፡ መንገለ ፡ የማኑ ።

3:17  ወአብአ ፡ ሎቱ ፡ አምኃሁ ፡ ለኤግሎም ፡ ንጉሠ ፡ ሞአብ ፡ ወኤግሎምሰ ፡ ቈጢጥ ፡ ብእሲ ፡ ውእቱ ፡ ጥቀ ።

3:18  ወእምዝ ፡ ሶበ ፡ ፈጸመ ፡ ናኦድ ፡ አብኦ ፡ ሎቱ ፡ አምኃሁ ፡ ፈነዎሙ ፡ ለእለ ፡ ጾሩ ፡ አምኃሁ ።

3:19  ወገብአ ፡ ኤግሎም ፡ እምነ ፡ ቤተ ፡ አማልክት ፡ ምስለ ፡ ገልገል ፡ ወይቤሎ ፡ [ናኦድ ፡] ብየ ፡ ነገረ ፡ ኀቤከ ፡ ንጉሥ ፡ እንተ ፡ ባሕቲትከ ፡ ወአዘዘ ፡ ዔግሎም ፡ ይፃእ ፡ ኵሉ ፡ እምኀቤሁ ፡ ወወፅኡ ፡ ኵሎሙ ፡ እለ ፡ ይቀውሙ ፡ ኀቤሁ ።

3:20  ወቦአ ፡ ናኦድ ፡ ኀቤሁ ፡ ወይነብር ፡ ውእቱ ፡ ባሕቲቱ ፡ ውስተ ፡ ጽርሑ ፡ ወሐጋይ ፡ ውእቱ ፡ ወይቤሎ ፡ ናኦድ ፡ ብየ ፡ ዘእነግረከ ፡ ንጉሥ ፡ ወተንሥአ ፡ ኤግሎም ፡ እምነ ፡ መንበሩ ፡ ወቀርቦ ።

3:21  ወሶበ ፡ ተንሥአ ፡ አልዐለ ፡ ናኦድ ፡ እዴሁ ፡ እንተ ፡ ፀጋም ፡ ወመልኀ ፡ መጥባሕቶ ፡ እምነ ፡ ገቦሁ ፡ ዘየማን ፡ ወረገዞ ፡ ውስተ ፡ ከርሡ ፡ ለኤግሎም ።

3:22  ወአብኣ ፡ ሎቱ ፡ እስከ ፡ ለዐታ ፡ ወበረሮ ፡ እስከ ፡ ዘባኑ ፡ ወመልኀ ፡ መጥባኅቶ ፡ እምነ ፡ ከርሡ ።

3:23  ወወፅአ ፡ ናዖድ ፡ ጸናፌ ፡ ወዐጸወ ፡ ኆኅተ ፡ ጽርሕ ፡ ላዕሌሁ ፡ ወቀተረ ።

3:24  ወወፂኦ ፡ ውእቱ ፡ ቦኡ ፡ ደቁ ፡ ወርእዩ ፡ ወረከቡ ፡ ኆኅተ ፡ ዘጽርሕ ፡ ዕጽወ ፡ ወይቤሉ ፡ ዮጊ ፡ ባሕቲቱ ፡ ይነብር ፡ ጽመ ፡ ውስተ ፡ ምግሓሠ ፡ ጽርሑ ፡ ቅስፈ ።

3:25  ወፀንሑ ፡ እስመ ፡ ኀፍሩ ፡ ወአልቦ ፡ ዘአርኀዎሙ ፡ ኆኅተ ፡ ጽርሕ ፡ ወነሥኡ ፡ መርኆ ፡ ወአርኀው ፡ ወረከብዎ ፡ ለእግዚኦሙ ፡ ውዱቀ ፡ ውስተ ፡ ምድር ፡ ምውተ ።

3:26  ወናኦድሰ ፡ አምሰጠ ፡ እስከ ፡ እሙንቱ ፡ ይትሀወኩ ፡ ወአልቦ ፡ ዘአእመሮ ፡ ወውእቱሰ ፡ ኀለፈ ፡ እምነ ፡ አማልክቲሆሙ ፡ ወአምሰጠ ፡ ውስተ ፡ ሴይሮታ ።

3:27  ወእምዝ ፡ ሶበ ፡ በጽሐ ፡ ውስተ ፡ ምድረ ፡ እስራኤል ፡ ወነፍኀ ፡ ቀርነ ፡ በውስተ ፡ ደብረ ፡ ኤፍሬም ፡ ወወረዱ ፡ ምስሌሁ ፡ እምነ ፡ ደብር ፡ ደቂቀ ፡ እስራኤል ፡ ወውእቱ ፡ ቅድሜሆሙ ።

3:28  ወይቤሎሙ ፡ ረዱ ፡ ትልውኒ ፡ እስመ ፡ አግብኦሙ ፡ እግዚአብሔር ፡ ለፀርነ ፡ ውስተ ፡ እዴነ ፡ ለሞአብ ፡ ወወረዱ ፡ ወተለውዎ ፡ ወበጽሑ ፡ ማዕዶተ ፡ ዮርዳንስ ፡ ዘሞአብ ፡ ወኢያብሑ ፡ ሰብእ ፡ ይዕዱ ።

3:29  ወቀተልዎሙ ፡ ለሞአብ ፡ በእማንቱ ፡ መዋዕል ፡ የአክል ፡ እልፈ ፡ ብእሴ ፡ ኵሎ ፡ መስተቃትላነ ፡ ወኵሎ ፡ ዕደወ ፡ ኀይሎሙ ፡ ወአልቦ ፡ ዘአምሰጠ ፡ እምኔሆሙ ፡ ወኢ፩ብእሲ ።

3:30  ወገብኡ ፡ ሞአብ ፡ በእማንቱ ፡ መዋዕል ፡ ውስተ ፡ እዴሆሙ ፡ ለእስራኤል ፡ ወአዕረፈት ፡ ምድር ፡ ሰማንያ ፡ ዓመተ ፡ ወኰነኖሙ ፡ ናኦድ ፡ እስከ ፡ ሞተ ።

3:31  ወእምድኅረ ፡ ዝንቱ ፡ ቆመ ፡ ሴሜገር ፡ ወልደ ፡ ሐነት ፡ ወቀተሎሙ ፡ ለአሎፊል ፡ ስድስተ ፡ ምእተ ፡ ብእሴ ፡ በኀበ ፡ ማሕረሰ ፡ ላህሙ ፤ ወውእቱኒ ፡ አድኀኖሙ ፡ [ለእስራኤል ፡]፡