Geez - Judges - 6

6:1  ወገብሩ ፡ ደቂቀ ፡ እስራኤል ፡ እኩየ ፡ ቅድመ ፡ እግዚአብሔር ፡ ወአግብኦሙ ፡ እግዚአብሔር ፡ ውስተ ፡ እደ ፡ ምድያም ፡ ሰብዐተ ፡ ዓመተ ።

6:2  ወጸንዐት ፡ እዴሆሙ ፡ ለምድያም ፡ ላዕለ ፡ እስራኤል ፡ ወገብሩ ፡ ሎሙ ፡ [ደቂቀ ፡ እስራኤል ፡ ቅድመ ፡] ምድያም ፡ በዐታተ ፡ ወአጽዋናተ ፡ ውስተ ፡ አድባር ፡ ወውስተ ፡ አጽዳፍ ።

6:3  ወእምዝ ፡ ሶበ ፡ ይዘርኡ ፡ ሰብአ ፡ እስራኤል ፡ የዐርጉ ፡ ምድያም ፡ ወዐማሌቅ ፡ ወደቀ ፡ ጽባሕ ፡ የዐርጉ ፡ ላዕሌሆሙ ።

6:4  ወይትዐየኑ ፡ ዲቤሆሙ ፡ ወያመስኑ ፡ ሎሙ ፡ ፍሬ ፡ ገራውሂሆሙ ፡ እስከ ፡ ይበጽሑ ፡ ውስተ ፡ ጋዛን ፡ ወኢያተርፉ ፡ ሎሙ ፡ ምንተኒ ፡ በዘ ፡ የሐይው ፡ ለእስራኤል ፡ ወመራዕይሆሙኒ ፡ ወላህሞሙ ፡ ወአድጎሙ ።

6:5  እስመ ፡ የዐርጉ ፡ ላዕሌሆሙ ፡ እሙንቱ ፡ ወእንስሳሆሙ ፡ ወተዓይኒሆሙ ፡ ያመጽኡ ፡ ወይበጽሕዎሙ ፡ ከመ ፡ አንበጣ ፡ ብዝኆሙ ፡ ወአልቦሙ ፡ ኍልቈ ፡ ኢእሙንቱ ፡ ወኢአግማላቲሆሙ ፡ ወይመጽኡ ፡ ውስተ ፡ ምድረ ፡ እስራኤል ፡ ከመ ፡ ያማስንዋ ።

6:6  ወነድዩ ፡ [ጥቀ ፡] እስራኤል ፡ እምቅድመ ፡ ምድያም ፡ ወገዐሩ ፡ ደቂቀ ፡ እስራኤል ፡ ኀበ ፡ እግዚአብሔር ።

6:7  ወሶበ ፡ ጸርሑ ፡ ደቂቀ ፡ እስራኤል ፡ ኀበ ፡ እግዚአብሔር ፡ በእንተ ፡ ምድያም ፤

6:8  ፈነወ ፡ ሎሙ ፡ እግዚአብሔር ፡ ብእሴ ፡ ነቢየ ፡ ለደቂቀ ፡ እስራኤል ፡ ወይቤሎሙ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ አነ ፡ ውእቱ ፡ ዘአውጻእኩክሙ ፡ እምነ ፡ ግብጽ ፡ እምነ ፡ ቤተ ፡ ቅኔት ።

6:9  ወአድኀንኩክሙ ፡ እምነ ፡ እዴሆሙ ፡ ለግብጽ ፡ ወእምነ ፡ ኵሉ ፡ [ዘ]ይሣቅዩክሙ ፡ ወአውፃእክዎሙ ፡ እምነ ፡ ቅድመ ፡ ገጽክሙ ፡ ወወሀብኩክሙ ፡ ምድሮሙ ።

6:10  ወእቤለክሙ ፡ አነ ፡ ውእቱ ፡ እግዚአብሔር ፡ (ወ)አምላክክሙ ፡ ወኢትፍርሁ ፡ እምነ ፡ አማልክተ ፡ አሞሬዎን ፡ እሉ ፡ እለ ፡ ትነብሩ ፡ ውስተ ፡ ምድሮሙ ፡ አንትሙ ፡ ወኢሰማዕክሙ ፡ ቃልየ ።

6:11  ወመጽአ ፡ መልአከ ፡ እግዚአብሔር ፡ ወነበረ ፡ ታሕተ ፡ ዕፅ ፡ እንተ ፡ ኤፍራታ(ስ) ፡ ዘኢዮአስ ፡ አቡሁ ፡ ለኢየዝሪ ፤ ወጌድዮን ፡ ወልዱ ፡ ይዘብጥ ፡ ስርናየ ፡ በውስተ ፡ ዐውዱ ፡ ከመ ፡ ያምስጥ ፡ እምነ ፡ ቅድሜሆሙ ፡ ለምድያም ።

6:12  ወአስተርአዮ ፡ መልአከ ፡ እግዚአብሔር ፡ ወይቤሎ ፡ እግዚአብሔር ፡ ምስሌከ ፡ ጽኑዐ ፡ ኀይል ።

6:13  ወይቤሎ ፡ ጌድዮን ፡ ኦሆ ፡ እግዚኦ ፡ እግዚእየ ፡ ወእመሰ ፡ ሀለወ ፡ እግዚአብሔር ፡ ምስሌነ ፡ ለምንት ፡ ረከበተነ ፡ ኵላ ፡ ዛቲ ፡ እኪት ፡ ወአይቴ ፡ ውእቱ ፡ ኵሉ ፡ ስብሐቲሁ ፡ ኵሉ ፡ ዘነገሩነ ፡ አበዊነ ፡ ወይቤሉነ ፡ እምነ ፡ ግብጽ ፡ አውጽኦሙ ፡ ለአበዊነ ፡ እግዚአብሔር ፡ ወይእዜሰ ፡ ኀደገነ ፡ እግዚአብሔር ፡ ወአግብአነ ፡ ውስተ ፡ እደ ፡ ምድያም ።

6:14  ወነጸሮ ፡ መልአከ ፡ እግዚአብሔር ፡ ወይቤሎ ፡ ሑር ፡ በኀይልከ ፡ ወታድኅኖሙ ፡ ለእስራኤል ፡ እምነ ፡ እደ ፡ ምድያም ፡ ወናሁ ፡ ፈኖኩከ ።

6:15  ወይቤሎ ፡ ጌድዮን ፡ ኦሆ ፡ እግዚኦ ፡ በምንት ፡ ኣድኅኖሙ ፡ ለእስራኤል ፡ ናሁ ፡ አእላፍየኒ ፡ ውሑዳን ፡ በውስተ ፡ መናሴ ፡ ወአነኒ ፡ ንዑስ ፡ በቤተ ፡ አቡየ ።

6:16  ወይቤሎ ፡ መልአከ ፡ እግዚአብሔር ፡ እስመ ፡ እግዚአብሔር ፡ ሀለወ ፡ ምስሌከ ፡ ወትቀትሎሙ ፡ ለምድያም ፡ ከመ ፡ አሐዱ ፡ ብእሲ ።

6:17  ወይቤሎ ፡ ጌድዮን ፡ እመ ፡ ረከብኩ ፡ ሞገሰ ፡ ቅድመ ፡ አዕይንቲከ ፡ ግበር ፡ ሊተ ፡ ተአምረ ፡ ከመ ፡ አንተ ፡ ውእቱ ፡ ዘትትናገር ፡ ምስሌየ ።

6:18  ኢትሑር ፡ እምዝየ ፡ እስከ ፡ እገብእ ፡ ኀቤከ ፡ ወኣመጽእ ፡ መሥዋዕትየ ፡ ወእሢም ፡ ቅድሜከ ፡ ወይቤሎ ፡ አነ ፡ ውእቱ ፡ ወእጸንሐከ ፡ እስከ ፡ ትገብእ ።

6:19  ወሖረ ፡ ጌድዮን ፡ ወገብረ ፡ ማሕሥአ ፡ ጠሊ ፡ ወዳፍንተ ፡ ናእት ፡ ወአንበረ ፡ ውእተ ፡ ሥጋ ፡ ውስተ ፡ ከፈር ፡ ወወደየ ፡ ዞሞ ፡ ውስተ ፡ መቅጹት ፡ ወወሰደ ፡ ሎቱ ፡ ኀበ ፡ ዕፅ ፡ ወሰገደ ፡ ሎቱ ።

6:20  ወይቤሎ ፡ መልአከ ፡ እግዚአብሔር ፡ ንሣእ ፡ ሥጋሁ ፡ ወኅብስተ ፡ ናእት ፡ ወሢም ፡ ላዕለ ፡ ኰኵሕ ፡ ወከዐው ፡ ዞሞ ፡ ወገብረ ፡ ከማሁ ።

6:21  ወአልዐለ ፡ መልአከ ፡ እግዚአብሔር ፡ በትሮ ፡ ወለከፎ ፡ ለውእቱ ፡ ሥጋ ፡ ወለውእቱ ፡ ናእት ፡ ወነደደት ፡ እሳት ፡ እምነ ፡ ይእቲ ፡ ኰኵሕ ፡ ወበልዐቶ ፡ ለውእቱ ፡ ሥጋ ፡ ወለውእቱ ፡ ናእት ፡ ወሖረ ፡ መልአከ ፡ እግዚአብሔር ፡ እምነ ፡ አዕይንቲሁ ።

6:22  ወአእመረ ፡ ጌድዮን ፡ ከመ ፡ መልአከ ፡ እግዚአብሔር ፡ ውእቱ ፡ ወይቤ ፡ ጌድዮን ፡ ኦሆ ፡ እግዚኦ ፡ እስመ ፡ ርኢኩ ፡ መልአከ ፡ እግዚአብሔር ፡ ገጸ ፡ ቦገጽ ።

6:23  ወይቤሎ ፡ እግዚአብሔር ፡ ሰላም ፡ ለከ ፡ ወኢትፍራህ ፡ ኢትመውት ።

6:24  ወነደቀ ፡ ጌድዮን ፡ በህየ ፡ ምሥዋዐ ፡ ለእግዚአብሔር ፡ ወሰመዮ ፡ ሰላመ ፡ እግዚአብሔር ፡ እስከ ፡ ዛቲ ፡ ዕለት ፡ ወእንዘ ፡ ዓዲሁ ፡ ሀለወ ፡ ውስተ ፡ ኤፍራታ ፡ አቡሁ ፡ ለኤዝሪ ።

6:25  ወእምዝ ፡ በይእቲ ፡ ሌሊት ፡ ወይቤሎ ፡ እግዚአብሔር ፡ ንሣእ ፡ ላህመ ፡ መግዝአ ፡ ዘአቡከ ፡ [ወ]ካልአ ፡ ላህመ ፡ ዘሰብዐቱ ፡ ዓመት ፡ ወንሥት ፡ ምሥዋዖ ፡ ለበዓል ፡ ዘአቡከ ፡ ወምስለ ፡ ዘላዕሌሁ ፡ ስብር ።

6:26  ወንድቅ ፡ ቦቱ ፡ ምሥዋዐ ፡ ለእግዚአብሔር ፡ አምላክከ ፡ ዘአስተርአየከ ፡ በውስተ ፡ ደብረ ፡ ማኦክ ፡ ዘበ ፡ ዝንቱ ፡ ደወል ፡ ወንሣእ ፡ ውእተ ፡ ካልአ ፡ ላህመ ፡ ወግበሮ ፡ መሥዋዕተ ፡ በውእቱ ፡ ዕፀው ፡ ዘሰበርከ ።

6:27  ወነሥአ ፡ ጌድዮን ፡ ዐሠርተ ፡ ወሠለስተ ፡ ዕደወ ፡ እምነ ፡ አግብርቲሁ ፡ ወገብረ ፡ በከመ ፡ ይቤሎ ፡ እግዚአብሔር ፡ ወእምዝ ፡ ሶበ ፡ ፈርሀ ፡ ቤተ ፡ አቡሁ ፡ [ወ]ሰብአ ፡ ሀገሩ ፡ በዊአ ፡ መዓልተ ፡ ወሌሊተ ፡ ይበውእ ።

6:28  ወጌሡ ፡ በጽባሕ ፡ ሰብአ ፡ ሀገር ፡ ወረከብዎ ፡ ንሡተ ፡ ለምሥዋዐ ፡ በዓል ፡ ወምስል ፡ ዘላዕሌሁ ፡ ስቡር ፡ ወላህም ፡ መግዝእ ፡ ግቡር ፡ ቦቱ ፡ መሥዋዕተ ፡ በውስተ ፡ ምሥዋዕ ፡ ዘነደቀ ።

6:29  ወተባሀሉ ፡ በበይናቲሆሙ ፡ መኑ ፡ ገብረ ፡ ዘንተ ፡ ግብረ ፡ ወሐሠሡ ፡ ወኀተቱ ፡ ወይቤሉ ፡ ጌድዮን ፡ ወልደ ፡ ዮአስ ፡ ገብረ ፡ ዘንተ ፡ ግብረ ።

6:30  ወይቤልዎ ፡ ሰብአ ፡ ሀገር ፡ ለዮአስ ፡ አምጽእ ፡ ወልደከ ፡ ይቅትልዎ ፡ እስመ ፡ ነሠተ ፡ ምሥዋዐ ፡ በዓል ፡ ወሰበረ ፡ ምስለ ፡ ዘላዕሌሁ ።

6:31  ወይቤሎሙ ፡ ዮአስ ፡ ለሰብእ ፡ እለ ፡ ቆሙ ፡ ላዕሌሁ ፡ አንትሙኑ ፡ ይእዜ ፡ ትትቤቀሉ ፡ ሎቱ ፡ ለበዓል ፡ አው ፡ አንትሙኑ ፡ ታድኅንዎ ፡ ከመ ፡ ትቅትሉ ፡ ዘገፍዖ ፡ ወእመሰ ፡ አምላክ ፡ ውእቱ ፡ እስከ ፡ ይጸብሕ ፡ ለይሙት ፡ ዘገፍዖ ፡ ወይትበቀል ፡ ለሊሁ ፡ ለዘ ፡ ነሠተ ፡ ምሥዋዒሁ ።

6:32  ወሰመዮ ፡ በይእቲ ፡ ዕለት ፡ ዐውደ ፡ በዓል ፡ እስመ ፡ ነሠቱ ፡ ምሥዋዖ ።

6:33  ወኵሉ ፡ ምድያም ፡ ወዐማሌቅ ፡ ወደቂቀ ፡ ጽባሕ ፡ ተጋብኡ ፡ ላዕሌሁ ፡ ወዐደው ፡ ወኀደሩ ፡ ውስተ ፡ ቈላተ ፡ ኢያዝራኤል ።

6:34  ወአጽንዖ ፡ መንፈሰ ፡ እግዚአብሔር ፡ ለጌድዮን ፡ ወነፍኀ ፡ ቀርነ ፡ ወወውዐ ፡ አቢየዜር ፡ በድኅሬሁ ።

6:35  ወፈነወ ፡ መ[ላ]እክተ ፡ ውስተ ፡ ኵሉ ፡ ምናሴ ፡ ወአውየወ ፡ ውእቱኒ ፡ እምድኅሬሁ ፡ ወፈነወ ፡ መ[ላ]እክተ ፡ ውስተ ፡ አሴር ፡ ወውስተ ፡ ዛቡሎን ፡ ወንፍታሌም ፡ ወዐርጉ ፡ ወተቀበልዎሙ ።

6:36  ወይቤሎ ፡ ጌድዮን ፡ ለእግዚአብሔር ፡ እመ ፡ ታድኅኖሙ ፡ ለእስራኤል ፡ በእዴየ ፡ በከመ ፡ ትቤ ፤

6:37  ናሁ ፡ አነ ፡ እሰፍሕ ፡ ፀምረ ፡ ብዙኀ ፡ ውስተ ፡ ዐውድ ፡ ወእመከመ ፡ ወረደ ፡ ጠል ፡ ውስተ ፡ ፀምር ፡ ባሕቲቱ ፡ ወኵሉ ፡ ምድር ፡ ይቡስ ፡ ኣአምር ፡ እንከ ፡ ከመ ፡ ታድኅኖሙ ፡ ለእስራኤል ፡ በእዴየ ፡ በከመ ፡ ትቤ ።

6:38  ወኮነ ፡ ከማሁ ፡ ወጌሠ ፡ ጌድዮን ፡ በሳኒታ ፡ ወዐጸሮ ፡ ለውእቱ ፡ ፀምር ፡ ወወፅአ ፡ ማይ ፡ እምነ ፡ ውእቱ ፡ ፀምር ፡ ወመልአ ፡ ዐይገን ።

6:39  ወይቤሎ ፡ ጌድዮን ፡ ለእግዚአብሔር ፡ ኢትትመዓዕ ፡ በመዐትከ ፡ ላዕሌየ ፡ ወእንግርከ ፡ ካዕበ ፡ አሐተ ፤ ፀምር ፡ ይኩን ፡ ይቡሰ ፡ እንተ ፡ ባሕቲቱ ፡ ወውስተ ፡ ኵሉ ፡ ምድር ፡ ይረድ ፡ ጠል ።

6:40  ወገብረ ፡ ከማሁ ፡ እግዚአብሔር ፡ በይእቲ ፡ ሌሊት ፡ ወኮነ ፡ ይቡሰ ፡ ፀምር ፡ ባሕቲቱ ፡ ወውስተ ፡ ኵሉ ፡ ምድር ፡ ወረደ ፡ ጠል ።