UyCyr - Malachi - 3

3:1  «Мана, әнди Мән Пәрвәрдигар Өз әлчимни әвәтимән. У Маңа йол һазирлайду. Андин силәр тәлмүрүватқан Егәңлар, йәни силәр төрт көз билән күтүватқан, келишим хәвирини йәткүзгүчи Әлчим тосаттин Өз ибадәтханисиға келиду, У чоқум келиду!» деди қудрәтлик Сәрдар Пәрвәрдигар.

3:2  «Амма У кәлгәндә кимму бәрдашлиқ берәләйду? У ашкарә болғанда кимму Униң алдида дәс туралайду? Чүнки У күмүч тавлайдиған отқа охшайду, У кирләрни жуюп ақартиветидиған күчлүк совунға охшайду.

3:3  У күмүчни отта тавлап әхлитидин айрийдиған адәмгә охшаш, лавийларниму алтун-күмүч тавлиғандәк тавлап паклайду. Шуниң билән улар Мән Пәрвәрдигарға, Мән қобул қилалайдиған һәдийәләрни суналайду.

3:4  Андин бурунқидәк, Йәһуда вә йерусалимлиқларниң сунған һәдийәлири Мән Пәрвәрдигарни хурсән қилидиған болиду.

3:5  Шу чағда Мән силәрни сораққа тартимән, Мәндин қорқмайдиған барлиқ бахшилар, нека садиқлиғини бузғучилар, сахта гувачилар, ишчиларниң иш һәққини йәвалидиғанлар, тул хотун, житим-йесирларни хорлайдиғанлар вә мусапирларни бозәк қилидиғанлардин һесап алимән. Мана булар Мән қудрәтлик Сәрдар Пәрвәрдигарниң сөзлиридур».

3:6  «Мән Пәрвәрдигар өзгәрмәстурмән. Шу сәвәптин Яқупниң әвлатлири болған силәр вәйран қилинмидиңлар.

3:7  Силәр әҗдадиңлар заманидин тартип Мениң әмир-пәрманлиримдин чәтнәп, униңға бойсунуштин баш тартип кәлдиңлар. Әнди силәр Мениң йолумға қайтип келиңлар, Мәнму силәргә қайта яр болай. Бирақ силәр: ‹Биз әзәлдин чәтнәп кәтмигән турсақ, қандақ қайтимиз?› дәп сорайсиләр.

3:8  Адәм Худаниңкидин оғрилиса боламду? Дәрһәқиқәт, силәр Мениңкидин оғрилидиңлар. Бирақ силәр: ‹Биз қандақларчә Сениңкидин оғрилалаймиз?› дәп сорайсиләр. Силәр Маңа тегишлик болған ондин бир үлүшни вә һәдийәләрни оғрилидиңлар.

3:9  Пүтүн хәлқиңлар Мениңкидин оғрилиғанлиғидин, силәргә ләнәт яғиду.

3:10  Ондин бир үлүшниң һәммисини ибадәтхана амбириға әкелиңлар, шунда ибадәтханамда йетәрлик ашлиқ болиду. Бу ишта Мени — қудрәтлик Сәрдар Пәрвәрдигарни синаңлар! Мениң силәр үчүн җәннәтниң дәрвазилирини ечип, силәргә мол бәхит-саадәт яғдурғанлиғимни көрисиләр.

3:11  Мән зираәтлириңларни зияндаш һашарәтләрниң вәйран қилишидин қоғдаймән. Силәрниң үзүмлириңлар пишқичә чүшүп кәтмәй сапиғида туриду», деди қудрәтлик Сәрдар Пәрвәрдигар.

3:12  «Зиминиңларниң үнүмлүгидин барлиқ милләтләр силәргә ‹бәхит қонупту› дейишиду! Мана булар Мән қудрәтлик Сәрдар Пәрвәрдигарниң сөзлиридур».

3:13  Пәрвәрдигар мундақ дәйду: «Силәр үстүмдин яман гәп қилдиңлар. Амма силәр Мәндин: ‹Бу немә дегиниң? Биз Саңа қандақ яман гәп қиптуқ?› дәп сорайсиләр.

3:14  Силәр йәнә: ‹Худаға хизмәт қилиш бекар, биз Униң әмирлиригә бойсунуп яки қудрәтлик Сәрдар Пәрвәрдигарниң алдида һәсрәт чекип, гуналиримизға товва қилип, немигә ериштуқ?

3:15  Һазир тәкәббурлар бәхит тепип, яманлиқ қилғучилар гүлләп яшнаватиду. Улар Худани синап туруп йәнә қечип қутулдиғу!› дәйсиләр».

3:16  Пәрвәрдигарға ихласмәнләр бу ишлар тоғрисида өз ара параңлашти. Пәрвәрдигар уларниң сөзлирини қулақ селип аңлиди. Пәрвәрдигарниң һозурида Униң ихласмәнлириниң вә Униң наминиң шан-шәривини издигүчиләрниң исми оралма хәткә ройхәт қилип йезилғандур.

3:17  Қудрәтлик Сәрдар Пәрвәрдигар шундақ дәйдуки: «Мән һөкүмүмни әмәлгә ашуридиған күндә улар Маңа мәнсүп болуп, Мениң қиммәтлик Өз хәлқим болиду. Худди ата өзиниң бойсунидиған балисиға рәһим қилғандәк, Мәнму уларға рәһим қилимән.

3:18  Шу чағда силәр Мениң һәққаний адәм билән яман адәмни, Маңа хизмәт қилған адәм билән қилмиған адәмни пәриқләндүридиғанлиғимни билип қалисиләр».