PohnOld - Psalms - 148

148:1  KOMAIL kapinga Ieowa nanlang, kapinga i nan wasa ileile!

148:2  Komail sapwilim a tounlang, karos kapinga i, komail sapwilim a men en kadar karos, kapinga i!

148:3  Koma katipin o saunipong, kapinga i, o komail usu piripir karos, kapinga i!

148:4  Komail lang pokon, o pil komail pil akan pon ira pan lang, kapinga i!

148:5  Irail en kapinga mar en Ieowa, pwe a me kotin pangok, ap miala.

148:6  Ap kotiki ong ir, ren mimieta kokolata, o kotiki ong ir kusoned eu, me re sota pan kawela.

148:7  Toun sappa, kapinga Ieowa, walros o man akan karos, o pil en madau kan karos.

148:8  O kisiniai, o akel, o sno, o tokoi, o melimel, me kin kaloki sili a kusoned akan,

148:9  Komail nana o dol akan karos, tuka me wa mau o seder karos;

148:10  Man laualo o mand akan karos, man korop o manpir akan,

148:11  Komail nanmarki en sappa o wei kan karos, saupeidi o saunkadeik kan,

148:12  Manakap o peinekap, me ma o seri kan,

148:13  Irail karos en kapinga mar en Ieowa; pwe i eta mar, me lapalap, a manaman mi pon angin sappa o lang.

148:14  A kotin sauasa os en sapwilim a kan. Sapwilim a lelapok kan en kapinga i, kadaudok en Israel, iei wei, me kin upa i. Aleluia!