PohnOld - Psalms - 119

119:1  RE meid pai, me sota kin sapung ni al arail, me kin weweid ni kapung en Ieowa!

119:2  Re meid pai, me kin kolekol a kadede akan, me kin rapaki i sang nan mongiong arail!

119:3  Me sota kin wia me sued, a weweid nan a al akan.

119:4  Pein komui kotikidar sapwilim omui kusoned akan, pwe sen porisok kapwaiada.

119:5  O ma al ai kan inen wei, pwen kapwaiada omui kusoned akan,

119:6  I ap sota pan sarodi, ni ai pan apapwali sapwilim omui kusoned akan karos.

119:7  I danke komui sang nan mongiong i melel, pwe kom kotin padaki dong ia duen omui masan pung.

119:8  I pan kanai ong sapwilim omui kusoned akan, kom der likidmaliela.

119:9  Iaduen, manakap amen pan kak weweid ni makelekel? Ma a pan wiawia duen ar masan akan.

119:10  I raparapa kin komui sang nan mongiong i; kom der kotin mueid ong, i en pup wei sang ni omui kusoned akan.

119:11  I kolekol omui masan nan mongiong i, pwe i ender wia dip ong komui.

119:12  Kaping en ko ong komui, Maing Ieowa! Kom kotin padaki dong ia omui kusoned akan.

119:13  I kasokasoi ki au ai duen kusoned en silang omui karos.

119:14  I kin peren kita al en omui kadede kan, dueta dipisou toto.

119:15  I pan madamadaua duen omui kusoned akan, o kanai ong omui al akan.

119:16  I kin peren kida omui kusoned akan, i sota pan monokela omui masan akan.

119:17  Kom kotin kamauiada sapwilim omui ladu, pwe i en memaur eta; i ap pan kapwaiada omui masan o.

119:18  Kom kotin kapad pasang mas ai, pwe i en kilang manaman akan nan sapwilim omui kapung o.

119:19  Ngai men kairu men nin sappa; kom der kotin karir sang mo i omui kusoned akan.

119:20  Ngen i okilar ai inong iong omui kusoned akan ansau karos.

119:21  Kom kotin ongiongi me aklapalap o, me pan wuki wei sang omui kusoned akan, en riala.

119:22  Kom kotin katoror sang ia namenok o me sued; pwe i kin apapwali ar kadede kan.

119:23  Pil saupeidi kan kin momod pena, kaokao ad ai; sapwilim omui ladu kin madamadaua duen omui kusoned akan.

119:24  Melel, i kin peren kida omui kadede kan, pwe ir me sauas pa i.

119:25  Ngen i onon nan pwel; kamanga ia duen omui masan.

119:26  I potoan ong komui duen al ai kan, komui ap kotin mangi ia er; kotin padaki ong ia omui kusoned akan.

119:27  Kom kotin padaki ong ia duen al en sapwilim omui kusoned akan, i ap pan madamadaua duen ar manaman akan.

119:28  Mongiong i luet kilar ai insensued; kom kotin kamanga ia da duen ar masan.

119:29  Re kotin pera wei sang ia al en likam, o kotiki ong ia ar masan.

119:30  I piladar al en melel; i kin madamadaua duen omui kusoned.

119:31  I kin tengeti ong omui kadede kan; Maing Ieowa, kom der mueid ong, i en namenokala.

119:32  Ma kom pan kotin kamaitala mongiong i, i pan tang wei nan al en omui kusoned akan.

119:33  Maing Ieowa, kom kotin kawewe ong ia al en omui kusoned akan, pwe i en apapwali lao lel imwi.

119:34  Kotin padaki ong ia, pwe i en kolekol omui kapung o peiki ong sang nan mongiong i.

119:35  Kalua ia nan al en omui kusoned akan, pwe i kin peren kin irail.

119:36  Kainongiong mongiong i omui kadede kan, a der norok moni.

119:37  Pirer wei mas ai, pwen der kilang me sued kot; a re kotin kakel ia da pon al omui.

119:38  Kolekol omui inau ong sapwilim omui ladu, pwe i en masak komui.

119:39  Kotiki sang ia namenok, me i suedeki; pwe omui kusoned akan me mau.

119:40  Kotin mangi, i kin inong iong ar masan akan; kakele kin ia omui pung.

119:41  Maing Ieowa, kom kotin maki ong ia, o kotin sauasa ia duen omui inau.

119:42  Pwe i en asa, sapeng ir, me mamale kin ia, pwe i kin liki omui masan.

119:43  O kom der kotiki sang au ai masan en omui melel; pwe i kaporoporeki omui kusoned akan.

119:44  I pan kolekol omui kapung o ansau karos kokolata.

119:45  I pan weweid ni peren, pwe i raparapaki omui kusoned akan ansau karos.

119:46  O i pan kasokasoi ong nanmarki kan duen omui kadede kan, ap sota namenok.

119:47  Pwe i kin peren kida omui kusoned akan, o i kin pok ong ir.

119:48  I kin pokadang pa i kat omui kusoned akan, me i pok ong, o i pan madamadaua duen omui kusoned akan.

119:49  Kotin tamanda sapwilim omui ladu, duen omui masan, me i kin kaporoporeki.

119:50  I me kin kamait ia la ni ai luet; omui ianu kan kin kakel ia da.

119:51  Me aklapalap akan kin mamale kin ia; ari so, i sota kin muei sang omui kapung o.

119:52  Maing Ieowa, ma i lamelame duen omui kusoned akan sang nin tapin sappa, i ap insenemau kila.

119:53  I makar kila me doo sang Kot akan, me kin muei sang sapwilim omui kapung o.

119:54  Omui kusoned akan, iei ai kaul en kaping nan ai im en kairu.

119:55  Maing Ieowa, ni pong i kin madamadaua duen mar omui, o peiki ong omui kapung.

119:56  Mepukat wiaui ong ia er, pweki ai peiki ong omui kusoned akan.

119:57  Maing Ieowa, iet pwais ai, en kolekol omui masan kan.

119:58  I kin ngidingid ong komui sang nan mongiong i; kom kotin maki ong ia duen omui inau o.

119:59  I kin madamadaua duen al ai, ap kainen wong omui kadede kan nä i kat.

119:60  I kin nantiong o sota pwapwand kolekol omui kusoned akan.

119:61  Pwin en me doo sang Kot akan kapil ia pena, ari so, i sota monokela omui kapung kan.

119:62  Ni ailep en pong i kin paurida, pwen danke komui, pweki omui kusoned pung.

119:63  I kin waroki ong ir karos, me masak komui o ir, me apapwali omui kusoned akan.

119:64  Maing Ieowa, sappa direki omui kalangan; padaki ong ia omui kusoned akan.

119:65  Maing Ieowa, komui me kotin wiai ong sapwilim omui ladu kamau kan duen omui inau o.

119:66  Padaki ong ia tiak mau o lolekong, pwe i kin liki omui kusoned akan.

119:67  Mon ai aktikitikala, i kin sapusapung, a met i kin apapwali omui masan.

119:68  Komui me mau o kapunglol, kotin padaki dong ia sapwilim omui kusoned akan.

119:69  Me aklapalap akan kin kalikama ia; a ngai kin apapwali omui kusoned akan sang nan mongiong i.

119:70  Mongiong arail masul kila wi; a i kin peren kida omui kapung.

119:71  Meid mau ong ia omui kaopampap ia la, pwe i en padakki omui kusoned akan.

119:72  Kapung sang nan silang omui mau ong ia, sang kold o silper kid toto.

119:73  Lim omui kan kapik o wia ia dar, padaki ong ia, pwe i en asa omui kusoned akan.

119:74  Me kin masak komui, pan kilang ia, ap peren kida, pwe i auiaui omui masan.

119:75  Maing Ieowa, i asa, me omui kadeik kan me pung, o kom kotin kaopampap ia la ni omui melel.

119:76  Omui mak pan kamait ia la, duen me kom kotin inauki ong sapwilim omui ladu.

119:77  Kom kotin kupura ia, i ap pan memaur eta, pwe i kin peren kida omui kapung.

119:78  Me aklapalap akan en sarodi, pwe re sapung ong ia ni sokarepa; a ngai madamadaua duen omui kusoned akan.

119:79  Me masak komui, ren waroki ong ia, o me asa duen omui kadede kan.

119:80  Mongiong i en pung ni omui kusoned akan, pwe i ender sarodi.

119:81  Ngen i kin inong iong omui dore ia la, i auiaui omui masan.

119:82  Por en mas ai kin anane omui inau, kalelapok: Iad me kom pan kotin kamait ia la?

119:83  Pwe i luetalar rasong deun pil eu nan adiniai, i sota monokela omui kusoned akan.

119:84  Arai da, sapwilim omui ladu pan memaurada? Iad me kom pan kotin kadeikada ai imwintiti kan?

119:85  Me aklapalap akan weiradang ia por akai, irail me sota kin duki ong sapwilim omui kapung o.

119:86  Sapwilim omui kusoned akan karos me melel. Irail raparapa kin ia ni sota karepa; kom kotin sauasa ia!

119:87  Me ekis, re pan kame ia la sang nin sappa, a ngai sota muei sang omui kusoned akan.

119:88  Kamaur ia da duen omui kalangan, a ngai pan kolekol kadede en silang omui.

119:89  Maing Ieowa, omui masan pan potopot eta nanlang.

119:90  Omui melel kin sang eu kainok lel eu; komui me kotin kasonedier sappa o a pan mimieta.

119:91  Irail karos mimieta lao lel ran wet, duen omui kusoned akan, pwe karos kin upa komui.

119:92  Ma omui kapung sota pan kaperen pa i, i pan mela ni ai luet.

119:93  I sota pan monokela omui kusoned akan kokolata, pwe ir me komui kakela kin ia da.

119:94  Ngai sapwilim omui, kom kotin sauasa ia! Pwe i inong iong sapwilim omui kusoned akan.

119:95  Me doo sang Kot akan masamasan ia, pwen kame ia la; i kin apwali omui kadede kan.

119:96  I kilanger imwin meakaros, a sapwilim omui kusoned pan mimieta.

119:97  Ia wan ai pok ong sapwilim omui kapung! Nin ran karos i kin kasokasoi due.

119:98  Kom kin kalolekong kin ia omui kusoned akan sang ai imwintiti kan, pwe irail pan ieiang ia kokolata.

119:99  Ngai lolekong sang ai saunpadak kan karos, pwe i kin madamadaua duen omui kadede kan.

119:100  Ngai lolekong sang me ma kan, pwe i kin apapwali sapwilim omui kusoned akan.

119:101  I sota mueid ong nä i, en weweid pon al sapung, pwe i en kolekol omui masan.

119:102  I sota wuki wei sang omui kusoned akan, pwe kom kotin padaki ong ia er.

119:103  Omui masan me iau sang onik nan au ai.

119:104  Omui kusoned akan kin kalolekong ia, i me i kin tataki al sapung karos.

119:105  Sapwilim omui masan me ser pan nä i, o kamarain pan al ai.

119:106  I kaukilar, me i pan kolekol omui kusoned pung kan, o i pan kapwaiada.

119:107  I insensued melel; Maing Ieowa, re kotin kamaur ia da duen omui inau.

119:108  Maing Ieowa, kom kotin kupura kisakis en au ai, o kotin padaki ong ia omui kusoned akan.

119:109  I kin wewa maur i nan pa i kat; i sota monokela omui kapung.

119:110  Me doo sang Kot akan insensare ia, a i sota wuki wei sang omui kusoned akan.

119:111  Omui kadede kan iei ai soso soutuk, pwe re kaperenda mongiong i.

119:112  Mongiong i kin inong iong kapwaiada omui kusoned akan ansau karos kokolata.

119:113  I kin kailongki me lol riapot, o i kin pok ong omui kapung.

119:114  Komui ai kadauk o pere pa i, i kaporoporeki omui masan.

119:115  Komail me sued akan en muei sang ia! I men apapwali kusoned en ai Kot akan.

119:116  Sauasa ia duen omui inau, i ap pan memaur eta; o kom der kotin mueid ong, i en namenokala ni ai kaporopor.

119:117  Kamanga ia da, i ap pan kelailada, i ap pan apapwali omui kusoned akan ansau karos.

119:118  Kom kin kotin tiakedi karos, me pan wuki wei sang omui kusoned akan; pwe arail sapung me dir en likam.

119:119  Kom kin kotin kase sang sappa me doo sang Kot akan karos dueta samit; i me i kin pok ong ki omui kadede kan.

119:120  I kin masak komui, i me i kin muserereki, o i kin masak omui kadeik kan.

119:121  I kin apapwali me inen o pung; kom der kotin pang ia lang ren me kin wia sued ong ia.

119:122  Sauasa sapwilim omui ladu o kamaitala i; me aklapalap akan ender sued ong ia.

119:123  Por en mas ai inong iong omui kamaur ia, o omui inau pung.

119:124  Wia ong sapwilim omui ladu duen omui kalangan, o kotin padaki ong ia omui kusoned akan.

119:125  Ngai sapwilim omui ladu; kotin padaki ong ia, pwe i en dedeki sapwilim omui kadede kan.

119:126  Ansau leler, me Ieowa pan kotin wiawia; pwe irail kawela sapwilim omui kapung.

119:127  I me i kin pok ki ong sapwilim omui kusoned akan, sang kold o kold lingan.

119:128  I me i kin kasampwaleki sapwilim omui kusoned akan karos, i tata ki al en likam karos.

119:129  Omui kadede kan meid kapuriamui, i me mongiong, i apapwali kin ir.

119:130  Ma omui masan pan sansalada, a pan kareda peren o lolekong ong me opampap akan.

119:131  Au ai kin sar pasang o inong iong sapwilim omui kusoned akan; pwe i kin anane ir.

119:132  Kom kotin wukedoke dong ia, o maki ong ia, duen me kom kin wiai ong ir, me pok ong mar omui.

119:133  Kotin kainenela al ai nan sapwilim omui masan, o der mueid ong, me sued kot en wiawia ia.

119:134  Kotin dore ia la sang mor sued en aramas akan, a i ap pan kolekol omui kusoned akan.

119:135  Kotin kamarainiki omui ladu silang omui, o kotin padaki ong ia duen omui kusoned akan.

119:136  Por en mas ai me dir en pil, pweki ar sota peiki ong omui kapung.

119:137  Maing Ieowa, komui me kotin pung, o omui kusoned akan me pung.

119:138  Komui me kotiki ong kit er kadede pan omui pung o melel, pwe i en nantiong kapwaiada.

119:139  I insensued melel, koren iong mela, pweki ai imwintiti kan monokela omui masan akan.

119:140  Omui masan meid makelekel, o sapwilim omui ladu kin pok ong.

119:141  Ngai me tikitik o me mal amen, a i sota kin monokela omui kusoned akan.

119:142  Omui pung me pung soutuk eu, o omui kapung me melel.

119:143  Masak o apwal lel dong ia; omui kusoned akan ai peren.

119:144  Pung en sapwilim omui kadede kan me soutuk, padaki ong ia, i ap pan memaur eta.

119:145  I ngidingid sang nan mongiong i; Ieowa kom kotin mangi ia! I pan apapwali omui kusoned akan.

119:146  I likwir wong komui, kom kotin sauasa ia, a i ap pan kolekol omui kadede kan.

119:147  Nin soran i kodo o ngidingid; i auiaui omui masan.

119:148  I kin pirida ni ailep en pong, pwen madamadaua duen omui masan.

119:149  Ereki ngil ai duen ar kalangan; Maing Ieowa, kamaur ia da duen omui kusoned akan.

119:150  Ai imwintiti sued akan koren iong ia, a re doo sang sapwilim omui kapung;

119:151  Maing Ieowa, komui me koren iong ia, o omui kusoned akan karos me melel.

119:152  I asa sang mas o, me komui kasonedier sapwilim omui kadede kan, pwen potopot eta.

119:153  Kom kotin irerong ai luet, o kamaio ia da! Pwe i sota monokela omui kapung.

119:154  Kotin apapwali ia, o dore ia la, o kamaur ia da duen omui inau.

119:155  Me doo sang Kot akan kin doo sang maur, pwe re sota kin isenoki omui kusoned akan.

119:156  Omui kalangan meid laud, Maing Ieowa; kom kotin kamaur ia da duen omui kusoned akan.

119:157  Me pakipaki ia, o palian ia me toto; ari so, i sota wuk wei sang omui kadede kan.

119:158  I kin kilekilang me mor sued akan, ap pokela, o i kin suedeki, pwe re sota kin peiki ong omui kusoned o.

119:159  Kotin masando, me i kin pok ong sapwilim omui kusoned akan; Maing Ieowa, kotin kakel ia da, duen omui kalangan.

119:160  Omui masan me dir en melel, o masan en omui kapung pan duedueta.

119:161  Saupeidi kan kin masamasan ia ni sokarepa; a mongiong i kin masak omui masan akan.

119:162  I kin peren kida omui inau dueta amen, me diaradar pai kasampwal eu.

119:163  I kailongki likam o suede kin irail, a i kin pok ong sapwilim omui kapung.

119:164  Pan ise pak i kin kapinga komui ni ran ta ieu, pweki kusoned en omui kapung kan.

119:165  Me kin pok ong sapwilim omui kapung, kin popol melel, re sota pan salongala.

119:166  Maing Ieowa, i kin auiaui omui kamaur, o i kin peiki ong sapwilim omui kusoned akan.

119:167  Mongiong i kin kolekol sapwilim omui kadede kan, o kin pok ong irail melel.

119:168  I kin kolekol sapwilim omui kusoned o kadede kan, pwe al ai kan karos me sansal mo ’mui.

119:169  Maing Ieowa, kotin mangi ai ngidingid, o kotin padaki ong ia duen omui masan.

119:170  Re kotin mangi ai kapakap, o dore ia la duen omui inau.

119:171  Komui lao padaki ong ia omui kusoned akan, kil en au ai ap pan kapinga komui.

119:172  Lo i pan kauleki duen omui masan, pwe omui kusoned akan karos me pung.

119:173  Lim omui en sauasa ia, pwe i piladar omui kusoned akan.

119:174  Maing Ieowa, i kin inong iong omui kamaur, o i kin peren kida omui kapung.

119:175  Kom kotin ieiang ngen i, pwen memaur eta ap kapinga komui, o lim omui pali maun en sauasa ia.

119:176  Ngai ras ong sip amen me sansalong sili o salongala; kom kotin rapaki sapwilim omui ladu, pwe i sota monokela omui kusoned akan.