Kapingamarangi - Revelation of John - 6

6:1  Nomuli, gei au gaa-mmada gi Tama-siibi e-huge tahi noo i-nia noo e-hidu aalaa, gei au ga-longono di manu e-dahi i-nia manu-mouli e-haa, e-helekai be-di lee-atili, “Hanimoi!”

6:2  Au gaa-mmada, ga-gidee di hoodo kene. Tangada dela i-hongo di-maa le e-daahi dana maalei, gei mee gaa-wanga ginai di hau-king. Mee gaa-hana be taane maaloo hai-heebagi belee haga-magedaa ono hagadaumee.

6:3  Nomuli, gei Tama-siibi gaa-huge di lua noo, gei au ga-longono di lua manu-mouli e-helekai, “Hanimoi!”

6:4  Di hoodo labelaa ga-hanimoi, di hoodo mmee. Tangada dela i-hongo di hoodo deelaa, la-guu-wanga ginai di mogobuna e-daamada dana dauwa i henuailala, e-hai nia daangada gi-hagadau dadaaligi ginaadou. Mee guu-wanga labelaa ginai tulumanu-dauwa damana.

6:5  Nomuli, gei Tama-siibi gaa-huge di tolu noo, gei au ga-longono di tolu manu-mouli e-helekai, “Hanimoi!” Au gaa-mmada, ga-gidee di hoodo luuli. Tangada dela i-hongo di-maa, e-daahi di mee pauna-mee i-lodo dono lima.

6:6  Au ga-longono di mee e-hai be-di lee e-hanimoi i-mehanga nia manu-mouli e-haa, e-helekai, “Nia pauna palaawaa-‘wheat’ e-lua, dela di hui-ngalua di laangi e-dahi, gei nia pauna palaawaa-‘barley’ e-ono, dela di hui-ngalua di laangi e-dahi. Hudee hunahuna-ina nia laagau-olib mo nia hadagee-waini!”

6:7  Nomuli, gei Tama-siibi gaa-huge di haa noo, gei au ga-longono di haa manu-mouli e-helekai, “Hanimoi!”

6:8  Au gaa-mmada, ga-gidee di hoodo gono-kene. Tangada dela i-hongo di maa, le e-haga-ingoo bolo “Made”. Gei di “Heidis”, e-daudali a-mee. Meemaa guu-wanga ginai di mogobuna e-daaligi dahi baahi e-haa o henuailala, e-daaligi gi tauwa, tau-magamaga, nia magi, mo nia manu lodo-geinga.

6:9  Nomuli, gei Tama-siibi gaa-huge di lima noo, gei au gaa-mmada gi-lala di gowaa hai-tigidaumaha gi-nia hagataalunga o digau ala ne-daaligi. Digaula ne-daaligi, idimaa, digaula nogo hagadele nnelekai a God, gei nogo manawa-dahi ang-gi nadau haga-modongoohia nnelekai a God.

6:10  Digaula gaa-wwolo gi-nua, ga-heeu, “Tagi Maaloo-dangihi, e-haga-madagu gei e-donu! E-waalooloo behee i-mua dau hagi-aga nia daangada i henuailala, ga-hagaduadua digau ala ne-daaligi gimaadou?”

6:11  Digaula huogodoo gaa-wanga ginai nia gahu-lloo-kene dagidahi, ga-helekai ginai bolo gi-taalia maalia, gaa-dae-loo gi-di hulu dogologo o nadau ihoo hai-hegau mo nadau ihoo dama Christ guu-dohu gu-dogomaalia di daaligi be di-nadau hai nogo hai.

6:12  Gei-au gaa-mmada gi Tama-siibi e-huge di ono noo. Gei tenua gu-ngalungalua damana, gei di laa ga-bouli dongoeho gadoo be-di gahu-luuli, gei di malama gaa-mmee hagatau be nia dodo.

6:13  Nia heduu ga-too-ia gi henuailala, gadoo be nia golee-modo o-di laagau-‘fig’ ne-lulu go di madangi maaloo.

6:14  Di langi ga-hagalee gadoo be-di lau-beebaa ne-wini, gei nia gonduu mo nia henua huogodoo ga-haga-mmaanege gi-daha mo nadau lohongo.

6:15  Nia king o henuailala, nia dagi, nia dagi-dauwa aamua, digau maluagina, digau mogobuna ge aamua, mo nia daangada huogodoo ala i-golo, nia hege mo digau moholo ang-gi ginaadou, gaa-pala hagammuni i-lodo nia lua mo i-lala nia hadugalaa o-nia gonduu.

6:16  Digaula gaa-wwolo gi-nia gonduu mo nia hadugalaa, “Too-ia gi madau nua, e-hagammuni gimaadou i-nia golomada Tangada dela e-noho i-hongo di lohongo-king, mo i-di hagawelewele o Tama-siibi!

6:17  Di laangi hagamadagudagu-dangada o nau hagawelewele la-gu-dau-mai, koai dela e-mee di-duu-aga e-hai-baahi gi di-maa?”