Kapingamarangi - Revelation of John - 9

9:1  Togolima dangada di-langi ga-ili dana buu-‘trumpet’. Gei-au gaa-mmada gi-di heduu dela ne-doo-ia gi henuailala, gaa-wanga ginai di gii o-di luwa dono dua-ai.

9:2  Di heduu gaa-huge di lua deelaa, gei nia huiahi ga-buu-aga, e-hai gadoo be nia huiahi mai di gowaa dudu-mee damana. Di maalama o-di laa mo-di ahiaalangi la-gu-haga-bouli go nia huiahi mai di luwa deelaa.

9:3  Nia manu-‘locust’ ga-lloomoi gi-hongo henuailala mai i-lodo nia huiahi aalaa, gaa-wanga ginai nia mogobuna e-hai be nia mogobuna o-nia manu-‘scorpion’.

9:4  Nia manu-‘locust’ ga-helekai ginai bolo ginaadou gi-hudee hunahuna-ina nia geinga be go nia laagau, be go di-ingoo-hua nia laagau ala i-golo. Digaula e-mee-hua di-hunahuna nia daangada ala digi maaga ginai di hagailongo o God i-hongo nadau lae.

9:5  Nia manu-‘locust’ la-digi dumaalia ginai gi-daaligidia nia daangada aanei gii-mmade, e-dumaalia-hua gi-haga-mmaemmae-ina digaula i-lodo nia malama e-lima. Di mmae o-di haga-mmaemmae deenei, le e-hai be-di mmae ne-hai go di manu-‘scorpion’.

9:6  I-lodo nia malama e-lima aalaa, gei nia daangada ga-halahala di-nadau hai gii-mmade-ai ginaadou, gei e-deemee. Digaula ga-hiihai bolo ginaadou gii-mmade, gei di made la-gaa-hana gi-daha mo digaula.

9:7  Nia manu-‘locust’ le e-hai gadoo be nia hoodo ala gu-togomaalia ang-gi tauwa. I-hongo nia libogo digaula, la nia mee e-hai gadoo be nia hau-goolo, nia hadumada digaula e-dina gi nnadumada-dangada.

9:8  Nadau ngaahulu le e-dina gi-nia ngaahulu-libogo ahina, nia niha digaula le e-dina gi-nia niha-laion.

9:9  Nadau hadahada le e-duuli gi-nia mee haaligi-hadahada baalanga, gei di lee ne-hai go nadau bakau le e-hai gadoo be-di lee o-nia waga hongo-henua logowaahee e-llele hagalimalima gi tauwa.

9:10  Digaula nadau hugu mo nadau mee dadaalo-dangada, gadoo be-di hugu-manu-‘scorpion’, aanei go nadau hugu e-mogobuna di-haga-mmaemmae nia daangada i-lodo nia malama e-lima.

9:11  Digaula di-nadau king e-dagi ginaadou dela go tangada di-langi e-dagi di luwa-dono-dua-ai. Di ingoo o-maa i telekai Hebrew bolo “Abaddon”, i telekai Greek bolo “Apollyon”, dono hadinga e-hai boloo, “Tangada-Oho-Mee”.

9:12  Di hagamadagudagu-dangada matagidagi la-guu-lawa, i-muli nia mee aanei nia hagamadagudagu-dangada e-lua e-lloomoi i-golo.

9:13  Togo-ono dangada di-langi ga-ili dana buu-‘trumpet’. Gei-au ga-longono di lee e-hanimoi i-nia madaaduge e-haa o-di gowaa dudu-tigidaumaha ne-hai gi-nia goolo, dela e-duu i-mua o God.

9:14  Di lee deelaa ga-helekai gi togo-ono dangada di-langi, “Haga-maahede-ina digau di-langi dogohaa ala e-lawalawa i taalinga di monowai damana go Euphrates!”

9:15  Digau-di-langi dogohaa la-gu-haga-maahede. Digaula ne-hagatogomaalia ang-gi di aawaa deenei, di laangi deenei, di malama deenei, mo-di ngadau deenei, belee daaligi dahi baahi e-dolu o-nia daangada huogodoo gii-mmade.

9:16  Au ne-haga-iloo ginai bolo di hulu gau-dauwa llele-hoodo la digau e-lua-lau-guli-(200,000,000).

9:17  I-lodo dagu moe, au ne-mmada gi-nia hoodo mo digau e-llele-ai. Nia baalanga ala e-haaligi nia hadahada digaula la-gu-mmee gadoo be-di ahi, e-halatee be-di hadu hagalabagau ‘sapphire’, gei e-loubuge be nia ‘sulfur’. Nia libogo o-nia hoodo le e-dina gi-nia libogo laion, gei nia ulaula-ahi, nia huiahi mo nia ‘sulfur’ e-lloomoi i-lodo nadau ngudu.

9:18  Dahi baahi e-dolu o-nia daangada la-ne-daaligi gii-mmade go nia hagaduadua e-dolu aanei: di ahi, di huiahi mo nia ‘sulfur’, ala nogo lloomoi i-lodo nia ngudu o-nia hoodo.

9:19  Nadau mahi la-i-lodo nadau ngudu mo i-lodo nadau hugu. Nia hugu le e-hai be nia gihaa ala nadau libogo, gei digaula e-haga-mmaemmae nia daangada gi nadau hugu.

9:20  Nia daangada ala i-golo, ala digi daaligidia go nia hagaduadua aanei, digaula digi huli gi-daha mo nadau mee ala ne-bida hai go ginaadou. Digaula digi dugua nadau hai-daumaha ang-gi nia hagataalunga huaidu, be go nia ada-balu-god ala ne-hai gi-nia goolo, silber, baalanga-mmee, hadu mo laagau, ala e-deemee di-mmada, hagalongo be taele.

9:21  Digaula digi dugua labelaa nadau dadaaligi-dangada, nadau haihai buubuu, nadau haihai be-di manu, be go nadau haihai gaiaa.