TpiKJPB - Revelation of John - 8

8:1  ¶ Na taim em i bin opim namba seven samting bilong pasim, i no gat nois long heven klostu olsem taim bilong namba tu hap bilong wanpela aua.

8:2  Na mi lukim sevenpela ensel husat i sanap long ai bilong God. Na long ol ol i givim sevenpela biugel.

8:3  Na narapela ensel i kam na sanap long alta, taim em i gat wanpela dis bilong insens gol. Na ol i givim em planti insens, inap long em i ken ofaim dispela wantaim ol beten bilong olgeta seint antap long dispela alta gol i stap long ai bilong sia king.

8:4  Na smuk bilong insens, dispela i kam wantaim ol beten bilong ol seint, i go antap long ai bilong God ausait long han bilong ensel.

8:5  Na ensel i kisim dis bilong insens, na pulimapim dispela wantaim paia bilong alta, na tromoi dispela i go long dispela graun. Na i gat ol nek, na ol klaut i pairap, na ol lait bilong klaut, na wanpela guria.

8:6  Na dispela sevenpela ensel husat i gat dispela sevenpela biugel i redim ol yet long winim ol biugel.

8:7  ¶ Namba wan ensel i winim biugel, na bihain long en i gat ren ais na paia i abusim wantaim blut, na ol i tromoi ol i go daun long dispela graun. Na namba tri hap bilong ol diwai i kuk olgeta, na olgeta gras i grin i kuk olgeta.

8:8  Na namba tu ensel i winim biugel, na samting olsem wanpela bikpela maunten i kuk wantaim paia ol i tromoi i go insait long biksi. Na namba tri hap bilong biksi i kamap blut.

8:9  Na namba tri hap bilong olgeta animal husat i stap insait long biksi, na i gat laip, i dai pinis. Na namba tri hap bilong olgeta sip i bagarap olgeta.

8:10  Na namba tri ensel i winim biugel, na i gat wanpela bikpela sta i pundaun long heven, i kuk samting olsem wanpela lam, na em i pundaun antap long namba tri hap bilong ol riva, na antap long ol ai bilong wara i sut bilong ol wara.

8:11  Na nem bilong dispela sta ol i kolim Womwut. Na namba tri hap bilong ol wara i kamap womwut. Na planti man i dai pinis long ol wara, bilong wanem, dispela sta i mekim ol wara i gat pait tru.

8:12  Na namba foa ensel i winim biugel, na ol i paitim namba tri hap bilong san, na namba tri hap bilong mun, na namba tri hap bilong ol sta, olsem inap long namba tri hap bilong ol i go tudak, na de i no lait long namba tri hap bilong en, na nait i wankain olsem.

8:13  Na mi lukim, na harim wanpela ensel i flai insait long namel bilong heven, i spik wantaim bikpela nek, Tok lukaut, tok lukaut, tok lukaut, i go long ol lain i stap long dispela graun bikos ol arapela nek bilong biugel bilong dispela tripela ensel i stap, husat i no winim biugel yet!