LinVB - Zechariah - 7

7:1  O mobu mwa minei bwa bokonzi bwa Dario, o sanza ya libwa, sanza Kisleu, mokolo mwa minei mwa sanza, Yawe alobi na Za­karia.

7:2  Betel atindi Sareser (Regem-Melek) elongo na bato ba ye babo­ndela Yawe,

7:3  mpe batuna banganga Nzambe ba Yawe wa bokasi bonso, na mpe baprofeta : « Nasengeli kolela mpe kolala nzala o sanza ya itano lokola nazalaki kosala kala ? »

7:4  Yawe wa bokasi bonso alobi na ngai maloba maye :

7:5  Tuna bato ba­nso mpe banganga Nzambe boye : « Mibu ntuku nsambo bozalaki kolala nzala mpe kolela o sanza ya itano mpe o sanza ya nsambo ; bozalaki nde kosala bongo mpo bozalaki kolingangai ?

7:6  Ntango bozalaki ko­lia mpe komele, bozalaki kosala yango te mpo bino moko bolingaki bongo ?

7:7  Bobosani nde maloba ma Yawe, maye alobaki na monoko mwa baprofeta ba kala ? O ntango ena Yeruzalem ezalaki kimia mpe na boyokani na bato banso ba bi­ngumba bya penepene, ntango Negeb mpe ekolo epai ya mbu bizalaki na bato baike. »

7:8  Yawe alobi na Zakaria maloba maye :

7:9  Yawe wa bokasi bonso alobaki boye : « Bokata makambo manso na bosembo bwa solo. Bolakisana bondeko mpe boyokelana ngolu.

7:10  Bonyokolo ba­si bazenge te, bana bitike, bauta na babola mpe te. Bokana kosala moninga mabe te. »

7:11  Kasi baboyaki kotia matoi, batombolaki mapeke ; bakangaki matoi mpo bayoka te.

7:12  Bakomisaki mitema mya bango lokola libanga lya diama mpo ’te bayoka malako ma Yawe wa bokasi bonso te, na maye elimo ya ye atindaki na monoko mwa baprofeta ba kala. Bongo Yawe wa bokasi bonso asilikelaki bango mingi mpe­nza.

7:13  Esalemaki boye : Yawe wa bo­kasi bonso alobaki : « Bakobyanga ngai, kasi nakondima bango te, se lokola baboyaki ngai ntango na­bya­ngaki bango.

7:14  Napanzaki ba­ngo o bikolo biike biye bayebaki libo­so te ; nsima ya bango ekolo ebebaki : moto moko azalaki kolongwa to kokende lisusu kuna te. Ekolo ya esengo ekomaki bongo mopotu. »