Kapingamarangi - Amos - 9

9:1  Au guu-mmada gi Tagi e-duu i-baahi di gowaa dudu-tigidaumaha. Gei Mee ga-hagadaba au, ga-helekai, “Haga-mamaawadia nia ulu o-nia duludulu o-di Hale Dabu deenei gi-ngalua di hagamau o di-maa. Haga-mooho-ina nia maa gi-lala, gii-doo-iha gi-hongo nia libogo o nia daangada. Au ga-daaligi digau huogodoo ala ne-dubu i tauwa. Tangada e-hai gi-mouli ai, tangada e-lele gi-daha ai.

9:2  Ma e-aha maa digaula gaa-geli di-nadau ala e-hula-ai ginaadou gi-lala henuailala gi-di gowaa o-di made, gei Au gaa-kumi digaula. Ma e-aha maa digaula gaa-kaga gi-nua gi-di langi, gei Au ga-laha-iha digaula gi-lala.

9:3  Ma e-aha maa digaula ga-palapala hagammuni i-tomo di Gonduu Carmel, gei Au ga-halahala digaula, gaa-kumi digaula. Ma e-aha maa digaula gaa-pala hagammuni i-tua di moana, gei Au ga-helekai gi-di manu hagamadagudagu-dangada o lodo di moana gi-geina digaula.

9:4  Ma e-aha maa digaula gaa-lahi gi-daha mo nadau henua gaa-hege i-lala nadau hagadaumee, gei Au gaa-hai nadau hagadaumee gi-daaligidia digaula gii-mmade. Deenei dagu mee guu-lawa-ai di-haganoho bolo Au e-daaligi digaula, Au hagalee dumaalia gi digaula.”

9:5  Tagi go Yihowah Koia e-Aamua ma-gaa-bili gi henuailala, gei henuailala ga-ngalungalua. Digau huogodoo ala e-noho i-no-lodo le e-tangitangi. Henuailala hagatau e-nnoo-aga gi-nua, ga-nnoo-ia gi-lala, gadoo be-di monowai Nile.

9:6  Dimaadua guu-hai dono lohongo i-di langi, gaa-dugu-mai di aholi o-di langi gi-hongo henuailala. Mee e-gahigahi-mai nia wai o-di moana gi-lloomoi, ga-haga-doo-iha gi-hongo henuailala. Dono ingoo dela go Yihowah!

9:7  Dimaadua ga-helekai, “Nia daangada Israel, Au gu-hagalabagau huoloo digau Ethiopia gadoo be dagu hagalabagau goodou. Ko-Au dela ne-laha-mai digau Philistia i Crete, mo digau Syria i Kir, gadoo be dagu hai dela ne-laha-mai goodou i Egypt.

9:8  Au go Tagi go Yihowah dela e-madamada humalia i tenua Israel huaidu deenei, gei Au ga-haga-mmaa di-maa gi-daha mo henuailala. Gei Au ga-hagalee haga-mmaa gi-daha di madawaawa Jacob hagatau.

9:9  “Au ga-hagadaba, ga-haga-madammaa digau Israel gadoo be nia golee-laagau ala ma-gaa-lulu i-lodo di mee hili-mee. Au ga-haga-madammaa digaula i-lodo nia henua huogodoo, belee haga-madammaa gi-daha digau ala nadau hadinga ai.

9:10  Digau huaidu ala i-lodo agu daangada le e-daaligi gii-mmade i-lodo tauwa, go digau huogodoo ala e-helekai boloo, ‘Dimaadua hagalee dumaalia gi-nia mee huaidu gi-tale-mai gi gidaadou.’ ”

9:11  Dimaadua ga-helekai, “Di laangi ga-dau-mai, gei Au ga-haga-hoou-aga di lohongo-king o David, dela e-hai gadoo be-di hale ne-meheu gi-daha. Au ga-haga-duu-aga ono abaaba ga-haga-hoou nia mee huogodoo. Au ga-haga-duu-aga di-maa, ga-ngalua ginai gii-hai gadoo be di-maa i-mua.

9:12  Gei digau Israel ga-haga-magedaa nia henua ala e-dubu i tenua go Edom, mo nia henua huogodoo ala nogo hai-mee ginai Au i-mua.” Aanei nnelekai mai baahi Dimaadua dela ga-haga-gila-aga nia mee aanei.

9:13  Dimaadua ga-helekai, “Nia laangi ga-dau-mai, gei nia huwa-laagau ga-tomo-aga hagalimalima, koia e-limalima i di-maa dela ma-gaa-hadi. Nia ‘grape’ ga-tomo-aga koia e-tomo limalima i-nia waini ala ma-gaa-hai. Nia gonduu ga-haga-hali-iha nia waini kala, gei nia gowaa nnoonua ga-haga-hali-mai nia waini.

9:14  Au ga-laha-mai agu daangada gi di-nadau henua. Digaula ga-haga-hoou nadau hale ala ne-mooho, gaa-noho i-lodo nia maa. Digaula gaa-dogi nadau hadagee-waini, ga-inuinu nadau waini. Digaula gaa-dogi nadau huwa-laagau i-lodo nadau hadagee, ga-miami mai i-nia huwa o nadau gowaa.

9:15  Au gaa-dogi agu daangada gi lodo tenua dela ne-wanga gi digaula, gei digaula ga-hagalee-loo e-daa gi-daha labelaa mo di-nadau henua.” Dimaadua dela go di-godou God deenei e-helehelekai.