SP - Deuteronomy - 16

16:1  שמור את חדש האביב ועשית פסח ליהוה אלהיך כי בחדש האביב הוציאך יהוה אלהיך ממצרים לילה

16:2  וזבחת פסח ליהוה אלהיך צאן ובקר במקום אשר בחר יהוה אלהיך לשכן את שמו שם

16:3  לא תאכלו עליו חמץ שבעת ימים תאכלו עליו מצות לחם עני כי בחפזון יצאת מארץ מצרים למען תזכר את יום צאתך מארץ מצרים כל ימי חייך

16:4  ולא יראה לך שאר בכל גבולך שבעת ימים ולא ילין מן הבשר אשר תזבח בין הערבים ביום הראישון לבקר

16:5  ולא תוכל לזבח את הפסח באחת שעריך אשר יהוה אלהיך נתן לך

16:6  כי אם . במקום אשר בחר יהוה אלהיך . לשכן את שמו שם שם תזבח את הפסח בערב כבוא השמש מועד . צאתך ממצרים

16:7  ובשלת ואכלת במקום אשר בחר יהוה אלהיך בו ופנית בבקר והלכת לאהליך

16:8  ששת ימים תאכל מצות וביום השביעי חג ליהוה אלהיך לא תעשה . כל מלאכת עבדה

16:9  שבעה שבעות תספר לך מהחלך חרמש בקמה תחל לספר שבעה שבעות

16:10  ועשית חג שבעות ליהוה אלהיך מסת נדבת ידיך אשר תתן כאשר ברכך יהוה אלהיך

16:11  ושמחת לפני יהוה אלהיך אתה ובנך ובתך עבדך ואמתך והלוי אשר בשעריך והגר והיתום והאלמנה אשר בקרבך במקום אשר בחר יהוה אלהיך לשכן את שמו שם

16:12  וזכרת כי עבד היית בארץ מצרים ושמרת ועשית את החקים האלה

16:13  חג הסכות תעשה לך שבעת ימים באספך מגרנך ומיקבך

16:14  ושמחת בחגך אתה ובנך ובתך עבדך ואמתך והלוי והגר והיתום והאלמנה אשר בשעריך

16:15  שבעת ימים תחג ליהוה אלהיך במקום אשר בחר יהוה אלהיך כי יברכך יהוה אלהיך בכל תבואתך ובכל מעשה ידיך והיית אך שמח

16:16  שלש פעמים בשנה יראה כל זכורך את פני יהוה אלהיך במקום אשר בחר בו בחג המצות ובחג השבעות ובחג הסכות ולא יראו את פני יהוה ריקם

16:17  איש כמתנת ידו כברכת יהוה אלהיך אשר נתן לך

16:18  שפטים ושטרים תתן לך בכל שעריך אשר יהוה אלהיך נתן לך לשבטיך ושפטו את העם משפט צדק

16:19  לא תטה משפט ולא תכיר פנים ולא תקח שחד כי השחד יעור עיני חכמים ויסלף דברי צדקים

16:20  צדק צדק תרדף למען תחיה וירשת את הארץ אשר יהוה אלהיך נתן לך

16:21  לא תטע לך אשרה כל עץ אצל מזבח יהוה אלהיך אשר תעשה לך

16:22  ולא תקים לך מצבה אשר שנאה יהוה אלהיך