Kapingamarangi - Ecclesiastes - 8

8:1  Ma go digau kabemee le e-iloo di hagamodongoohia o-nia mee. Di kabemee e-hai digaula gi gono gada, e-haga-ngala nadau golomada de-hiihai.

8:2  Daudalia nia helekai o-di king. Hudee hai balu hagababa ang-gi God.

8:3  Hagatanga gi-daha mo-di gowaa dela e-noho-ai di king. Hudee noho i-baahi o-mee, idimaa, di king e-mee di-hai dana mee e-hiihai ginai.

8:4  Di king e-ngalua gi ono mogobuna, deai tangada i-golo e-mee di-hai-baahi gi ana mee ala e-hai ai.

8:5  Goe e-tanga gi-daha mo nia haingadaa i-di waalooloo o taudali ana helekai, gei tangada kabemee e-iloo be ma-gaa-hee di madagoaa humalia e-daudali a-mee.

8:6  Di madagoaa donu i-golo mo-di ala e-donu i-golo belee hai nia mee huogodoo, di mee deenei le e-donu, malaa, gidaadou e-iloo dulii-loo!

8:7  Tangada i-golo ai e-iloo nia mee ala e-gila-aga maalia, tangada i-golo ai e-mee di-hagamodongoohia nia mee ala e-gila-aga maalia.

8:8  Tangada i-golo ai e-mee di-hagatanga gi-daha mo-di made, be e-mee di-dugu gi-daha di laangi o dono made. Teebagi deenei e-deemee di-tanga gi-daha mo gidaadou. Gidaadou e-deemee di-tanga gi-daha mo-di made i tadau halahalau dangada.

8:9  Au gu-gidee nia mee huogodoo aanei i dogu madagoaa nogo mamaanadu i-nia mee ala e-hai i henuailala. Hunu daangada la-iai nadau mogobuna i-golo i henuailala, hunu daangada e-hai gi-duadua i-lala nia daangada ala i-golo.

8:10  Au gu-gidee digau huaidu e-danu gi-lodo nadau luwa. I-di madagoaa nia daangada e-hula gi-daha mo-di waa-daalunga deelaa, digaula e-hagahagaamu digau huaidu i-lodo di waahale hua dela nogo hai di huaidu. Ma e-maa gi-daha.

8:11  Nia daangada le e-aha ala e-hai di huaidu ngoohia? Idimaa di huaidu la hagalee limalima dono hagaduadua.

8:12  Tangada huaidu e-mee-hua di-hai ana hala haga-lau gei mee e-mouli hua igolo. Au e-iloo nnelekai nia daangada e-hai boloo: “Maa goe ga-daudali a God, nia mee huogodoo gaa-gila humalia,

8:13  malaa, ma e-hagalee hagahumalia digau huaidu. Nadau mouli le e-hai be-di malu, gei digaula ga-mmade-hua i-di madagoaa ginaadou e-lligi, idimaa digaula e-hagalee daudali nnelekai a God.”

8:14  Malaa, di mee deenei le e-maa gi-daha. Mmada malaa gi-nia mee ala e-gila-aga i-hongo o henuailala: Hunu madagoaa digau ala e-donu le e-kae di hagaduadua o digau huaidu, gei digau huaidu e-kae nia hui o digau ala e-donu. Au e-hai bolo ma e-maa gi-daha.

8:15  Au gu-modongoohia bolo deenei di mee belee hai go gidaadou: Gidaadou gi-tenetene idimaa di tenetene hua e-dahi dela e-hai-mee ginai gidaadou i-lodo di mouli dolomeenei la-go di miamiami, inuinu, tenetene. Deenei di mee e-mee tadau hai i-di madagoaa gidaadou e-ngalua i-lodo di mouli a God ne-gaamai gi gidaadou i-hongo o henuailala nei.

8:16  Dogu madagoaa nogo hagamada au e-kabe mo-di iloo nia mee ala e-kila-aga i henuailala, au gu-modongoohia bolo goe e-mee di-haga-ala i-di boo mo-di aa,

8:17  gei e-deemee di-iloo nia mee a God ala e-hai. Ma e-aha maa goe e-duadua behee dau halahala, goe e-deemee di-gidee. Digau kabemee e-hai bolo ginaadou e-iloo, gei digaula e-de-iloo.