TpiKJPB - II Chronicles - 27

27:1  ¶ Jotam i gat 25 krismas taim em i stat long bosim kingdom, na em i bosim kingdom 16 yia long Jerusalem. Nem bilong mama bilong em tu em Jerusa, pikinini meri bilong Sadok.

27:2  Na em i mekim dispela samting i stretpela long ai bilong BIKPELA, bilong bihainim olgeta samting papa bilong em Usaia i mekim. Tasol em i no go insait long tempel bilong BIKPELA. Na ol manmeri i mekim pasin i paul yet.

27:3  Em i wokim dua bilong banis antap bilong haus bilong BIKPELA, na antap long banis bilong Ofel em i wokim planti samting.

27:4  Na moa tu em i wokim ol biktaun long ol maunten bilong Juda. Na long ol bikbus em i wokim ol haus king na ol taua.

27:5  Em i pait tu wantaim king bilong ol lain Amon, na winim ol. Na ol pikinini bilong Amon i givim em, long dispela yia stret, 100 talen silva, na 10,000 hap skel bilong wit, na 10,000 bilong bali. Ol pikinini bilong Amon i bin baim hamas olsem long em, long namba tu yia, na namba tri wantaim.

27:6  Olsem na Jotam i kamap strongpela, bilong wanem, em i redim ol pasin bilong em long ai bilong BIKPELA, God bilong em.

27:7  Nau olgeta arapela wok bilong Jotam, na olgeta bikpela pait bilong em, na ol pasin bilong em, harim, ol i raitim ol long buk bilong ol king bilong Isrel na Juda.

27:8  Em i gat 25 krismas taim em i stat long bosim kingdom, na em i bosim kingdom 16 yia long Jerusalem.

27:9  Na Jotam i slip wantaim ol tumbuna papa bilong em, na ol i planim em long biktaun bilong Devit. Na Ehas, pikinini man bilong em, i kisim ples bilong em na bosim kingdom.