Azeri - Jeremiah - 35

35:1  يهودا پادشاهي يوشئيا اوغلو يِهوياقئمئن دؤورونده ربدن اِرِميايا بو سؤز نازئل اولدو:

35:2  "رِکابلي‌لارين اِوئنه گت و اونلاري ربّئن معبدئنئن اوتاقلاريندان بئرئنه دعوت ات و اونلارا ائچمک اوچون شراب ور."

35:3  بونون اوچون خَبَصّئنيا اوغلو اِرِميا اوغلو يَعه‌زَنيانين، اونون قارداشلارينين، بوتون اؤولادلارينين يعني رِکاب عايئله‌سئنئن هاميسينين يانينا گتدئم کي، اونلاري دعوت اِدئم.

35:4  اونلاري ربّئن معبدئنه، تاري آدامي يئگدَليا اوغلو خانانين اوغوللارينين اوتاغينا آپارديم. بو اوتاق شَلّوم اوغلو قاپي گؤزَتچئسي مَعَسِيانين اوتاغي اوستونده، هم ده باشچيلار اوتاغينين يانيندا ائدي.

35:5  من رِکاب عايئله‌سئنئن آداملاري قاباغينا شراب دولو جاملار و کاسالار قويوب "بويورون، شراب ائچئن" ددئم.

35:6  لاکئن اونلار ددئلر: "بئز شراب ائچمئرئک. چونکي آتاميز رِکاب اوغلو يوناداب بئزه بله امر اتدي: «سئز و نسلئنئز گرک هچ واخت شراب ائچميه‌‌‌سئنئز!

35:7  اؤزونوز اوچون اِو تئکميه‌‌سئنئز، توخوم اَکميه‌سئنئز، اوزوم باغي سالماياسينيز. بو شيلري گرک هچ واخت مالئک اولماياسينيز، عؤمرونوز بويو گرک چاديرلاردا ياشاياسينيز. بله اده‌سئنئز، کؤچ اتدئيئنئز تورپاقلاردا اوزون مودّت ياشايارسينيز.»

35:8  آتاميز رِکاب اوغلو يونادابين بئزه امر اتدئيي هر شيه قولاق آسميشيق. بئز، آروادلاريميز، و اوغوللاريميز-قيزلاريميز هچ بئر زامان شراب ائچمه‌‌مئشئک.

35:9  ياشاماق اوچون اِولر ده تئکمه‌مئشئک، اوزوم باغلارينا، زَمئلره و اَکئنلره ده مالئک اولماميشيق.

35:10  چاديرلاردا ياشاميشيق. آتاميز يوناداب نه امر ادئب، هاميسينا قولاق آسيب عمل اتمئشئک.

35:11  آمّا بابئل پادشاهي نِبوکَدنِصّر بو اؤلکه‌يه هوجوم ادن زامان ددئک: «گلئن، کَلده و اَرام قوشونلاريندان قاچماق اوچون اورشَلئمه گِدَک.» بونا گؤره ده اورشَلئمده قالميشيق."

35:12  بوندان سونرا اِرِميايا ربّئن بو سؤزو نازئل اولدو:

35:13  "ائسرايئلئن تاريسي اولان قوشونلار ربّی بله ديئر: گت، يهودا آداملارينا و اورشلئمده ياشايانلارا بونلاري دِه: «سئز هچ بئر درس آلماياجاقسينيز، سؤزلرئمه قولاق آسماياجاقسينيز؟» رب بويورور.

35:14  «رِکاب اوغلو يوناداب اؤز نسلئنه شراب ائچمه‌مه‌لرئني امر اتدي، نسلی ده اونون امرئنه عمل ادئب و بو گونه قدر ده شراب ائچمه‌يئب. چونکي آتالارينين امرئنه قولاق آسيبلار. آمّا من سئزئنله دفه‌لرله دانيشميشام، آمّا سئز منه قولاق آسماييبسينيز.

35:15  اؤز قوللاريم اولان بوتون پيغمبرلري دفه‌لرله سئزئن يانينيزا گؤنده‌ردئم. اونلار سئزه ددئلر: ‹هر بئرئنئز گرک اؤز پئس يولونوزدان دؤنه‌سئنئز، عمل‌لرئنئزي گرک ائصلاح اده‌سئنئز؛ باشقا آللاهلارين دالينجا گدئب اونلارا قوللوق اتمه‌يئن. او واخت سئزه و آتالارينيزا وردئيئم بو اؤلکه‌ده ياشايارسينيز.› آمّا سؤزومه اهمئيّت ورمه‌يئب اونا قولاق آسمادينيز.

35:16  رِکاب اوغلو يونادابين اؤولادلاري آتالارينين امر اتدئيئنه عمل ادئبلر، آمّا بو خالق منه قولاق آسماييب.»

35:17  بونا گؤره ده ائسرايئلئن تاريسي اولان قوشونلار تاريسي رب بله ديئر: «من، دِدئيئم بوتون فلاکتلري، يهودا خالقينين و اورشَلئمده ياشايان هر کسئن باشينا گتئره‌جيم. اونلارلا دانيشديم، آمّا اونلار قولاق آسماديلار؛ اونلاري چاغيرديم، آمّا اونلار جاواب ورمه‌دئلر.»"

35:18  او واخت اِرِميا رِکاب نسلئنه ددي: "ائسرايئلئن تاريسي اولان قوشونلار ربّی بله ديئر: «سئز آتانيز يونادابين امرئنه قولاق آسيبسينيز، اونون بوتون امرلرئنه عمل ادئبسئنئز، سئزه امر اتدئيي هر شيي يرئنه يتئرئبسئنئز.

35:19  بونا گؤره ده ائسرايئلئن تاريسي اولان قوشونلار ربّی بله ديئر: «رِکاب اوغلو يونادابين نسلئندن منه خئدمت ادن بئر آدام هچ واخت اَسکئک اولماياجاق.»"