Azeri - Jeremiah - 38

38:1  مَتّان اوغلو شِفَطيا، پَشخور اوغلو گِدَليا، شِلِميا اوغلو يَهوکال و مَلکئيا اوغلو پَشخور اِرِميا‌نين بوتون خالقا ددئيي بو سؤزلري اشئتدئلر:

38:2  "رب بله ديئر: «بو شهرده قالان آدام قيلينجدان، آجليقدان و وبادان اؤله‌جک. لاکئن کَلدانئلره تسلئم اولان ياشاياجاق؛ اؤز جا‌نيني قورتاريب صاغ قالاجاق.»

38:3  رب بله ديئر: «بو شهر قطعن بابئل پادشاهينين قوشونونا تسلئم ادئله‌جک و او بو شهري اَله کچئرده‌جک.»"

38:4  او واخت باشچيلار پادشاها ددئلر: "بو آدام گرک اؤلومه ورئلسئن. او بو سؤزلرله شهرده قالان دؤيوشچولرئن و خالقين اورَکلرئني اوزور. يقئن بو آدام خالقا ياخشيليق ديئل، پئسلئک آرزولايير."

38:5  صئدقئيا پادشاه ددي: "اونو سئزئن اَلئنئزه ورئرم، چونکي پادشاه سئزئن ضئدّئنئزه بئر ائش گؤره بئلمز."

38:6  او زامان اونلار اِرِمياني توتوب پادشاهين اوغلو مَلکئيانين کشئکچئلر حيطئنده اولان قويوسونا آتديلار. اِرِمياني ائپله اورايا سالديلار. قويودا سو يوخ ائدي، فقط پالچيق وار ائدي. اِرِميا پالچيغا باتدي.

38:7  پادشاه ساراييندا وظئفه‌لي اولان کوشلو عِبِدمِلِک اشئتدي کي، اِرِميا‌ قويويا آتيليب. بو زامان پادشاه بِنيامئن دروازاسيندا اوتورموشدو.

38:8  عِبِدمِلِک پادشاه ساراييندان چيخيب پادشاها ددي:

38:9  "آغام پادشاه، بو آداملارين اِرِميا پيغمبره بوتون اتدئکلري پئسدئر. اونو قويويا آتيبلار او اورادا آجيندان اؤله‌جک، چونکي داها شهرده چؤرک قالماييب."

38:10  پادشاه کوشلو عِبِدمِلِکه امر ادئب ددي: "اؤزونله اوتوز نفر گؤتور و اِرِميا پيغمبري اؤلمه‌مئشدن قاباق قويودان چيخارت."

38:11  عِبِدمِلِک اؤزو ائله آداملار گؤتوروب ساراي خزئنه‌سئنئن آلتيندا اولان بئر اوتاغا گئردي و اورادان ييرتيق پالتارلار، جيريق اَسکئلر گؤتوردو. سونرا اونلاري ائپلرله قويودا اولان اِرِميايا ساللاديلار.

38:12  کوشلو عِبِدمِلِک اِرِميايا ددي: "ييرتيق پالتارلاري و اَسکئلري قولتوقلارينين آلتينا قوي و ائپلري اونلارين اوستوندن کچئرت." اِرِميا بله ده اتدي.

38:13  اِرِمياني ائپلرله چکئب قويودان چيخارتديلار. اِرِميا کشئکچئلر حيطئنده قالدي.

38:14  صئدقئيا پادشاه آدام گؤنده‌رئب اِرِميا پيغمبري اؤز يانينا-ربّئن معبدئنئن اوچونجو گئرئشئنه گتئرتدي. پادشاه اِرِميايا ددي: "سندن بئر شي سوروشاجاغام، مندن هچ نه گئزلَتمه."

38:15  اِرِميا صئدقئيايا ددي: "اگر سنه بئلدئرسم، آيا منی اؤلدورميه‌جکسن؟ حتّا اگر سنه نصئحت ده ورسم، منه قولاق آسماياجاقسان."

38:16  لاکئن صئدقئيا پادشاه اِرِميايا گئزلئجه آند ائچئب ددي: "بئزه نفس ورن، وار اولان تارييا آند اولسون کي، نه سني اؤلدوره‌جيم، نه ده سني، جا‌نيني آلماق ائسته‌ين آداملارا تسلئم اده‌جيم."

38:17  اِرِميا صئدقئيايا ددي: "ائسرايئلئن تاريسي اولان قوشونلار تاريسي رب بله ديئر: «اگر سن بابئل پادشاهينين باشچيلارينا تسلئم اولاسان، جانين قورتاراجاق و بو شهر ده اوددا يانماياجاق؛ عايئلَنله بئرلئکده صاغ قالاجاقسان.

38:18  لاکئن اگر بابئل پادشاهينين باشچيلارينا تسلئم اولماياسان، بو شهر کَلدانئلره تسلئم ادئله‌جک و اونو يانديراجاقلار؛ سن اؤزون ده اونلارين اَلئندن قاچيب قورتارا بئلميه‌جکسن.»"

38:19  صئدقئيا پادشاه اِرِميايا ددي: "کَلدانئلرئن طرفئنه کچن يهودئلردن قورخورام. کَلدانئلر منی اونلارين اَلئنه وره بئلرلر، اونلار دا منئمله پئس رفتار اِدَرلر."

38:20  اِرِميا ددي: "سني اونلارين اَلئنه ورمزلر. ربدن ائطاعت ات و سنه دِدئيئم سؤزلری يرئنه يتئر. او واخت خيئر تاپارسان، جانين دا آماندا قالار.

38:21  لاکئن اگر تسلئم اولماقدان ائمتئناع اده‌سن، رب منه بونو گؤرسه‌دئر:

38:22  يهودا پادشاهينين ساراييندا قالان بوتون آروادلار بابئل پادشاهينين باشچيلارينا تسلئم ادئله‌جک. او آروادلار سنه دئيه‌جکلر: «اِعتئماد اتدئيئن دوستلار سني آلداديب مغلوبئيّته دوچار اتدئلر. آياقلارين پالچيغا باتيب، دوستلارين سني قويوب قاچيبلار.»

38:23  سنئن بوتون آروادلارين و اوغوللارين کَلدانئلره تسلئم ادئله‌جک. سن اؤزون ده اونلارين اَلئندن قاچيب قورتارا بئلميه‌جکسن، بابئل پادشاهي سني اَله کچئرده‌جک؛ بو شهر ده يانديريلاجاق."

38:24  او واخت صئدقئيا اِرِميايا ددي: "بو صؤحبتي هچ کسه بئلدئرمه، يوخسا اؤله بئلرسن.

38:25  اگر باشچيلار اشئتسه‌لر کي، سنئنله دانيشميشام و سنئن يانينا گلئب دِسه‌لر: «پادشاها نه ددئن و پادشاه سنه نه ددی، بئزه بئلدئر، بئزدن گئزلَتمه، يوخسا سني اؤلدوره‌رئک.»

38:26  اونلارا دِه: «پادشاها يالواريرديم کي، منی يوناتانين اِوئنه قايتارماسين و اورادا اؤلمه‌يئم.»"

38:27  بوتون باشچيلار اِرِميا‌نين يانينا گلئب اوندان سوروشدولار. او دا پادشاهين امر اتدئيي کئمي بوتون بو سؤزلري اونلارا ددی. داها اونا بئر سؤز دِمه‌دئلر، چونکي بو صؤحبتي هچ کس اشئتمه‌مئشدي.

38:28  بلجه اورشَلئمئن اَله گِچئرئلدئيي گونه‌جک، اِرِميا کشئکچئلر حيطئنده قاليردي.