TpiKJPB - Joshua - 11

11:1  ¶ Na em i kamap olsem, taim Jebin, king bilong Hesor, i bin harim ol dispela samting, long em i salim tok long Jobap, king bilong Madon, na long king bilong Simron, na long king bilong Aksap,

11:2  Na long ol king husat i stap long hap not bilong ol maunten, na bilong ol ples stret bilong hap saut bilong Kinerot, na long ples daun, na long ol hap arere bilong Dor long hap wes,

11:3  Na long lain Kenan long hap is na long hap wes, na long lain Amor, na lain Hit, na lain Peris, na lain Jebus long ol maunten, na long lain Hiv aninit long Hermon long dispela hap bilong Mispa.

11:4  Na ol i go ausait, ol na olgeta ami bilong ol wantaim ol, planti lain manmeri, yes, olsem wesan i stap long nambis bilong biksi i planti tru, wantaim ol hos na ol karis, planti tru.

11:5  Na taim olgeta dispela king i bung wantaim, ol i kam na sanapim ol haus sel wantaim long ol wara bilong Merom, long pait birua long Isrel.

11:6  Na BIKPELA i tokim Josua, No ken pret taim yu tingim ol. Long wanem, tumora, klostu olsem dispela taim, bai Mi kilim ol i dai na givim ol long ai bilong Isrel. Yu bai katim rop bilong lek bilong ol hos bilong ol, na kukim ol karis bilong ol wantaim paia.

11:7  Olsem na Josua i kam, na olgeta lain bilong bikpela pait wantaim em, na birua long ol klostu long ol wara bilong Merom wantu. Na ol i pundaun antap long ol.

11:8  Na BIKPELA i givim ol i go long han bilong Isrel, husat i paitim ol, na ranim ol i go long bikpela Saidon, na i go long Misrepot-maim, na i go long ples daun bilong Mispa i go long hap is. Na ol i paitim ol, inap long ol i no lusim wanpela i stap yet.

11:9  Na Josua i mekim long ol olsem BIKPELA i tok strong long em. Em i katim rop bilong lek bilong ol hos bilong ol, na kukim olgeta ol karis bilong ol wantaim paia.

11:10  ¶ Na Josua, long dispela taim, i tanim i go bek, na kisim Hesor, na paitim king bilong en wantaim bainat. Long wanem, long taim bipo Hesor em i het bilong olgeta ol dispela hap bilong ol king.

11:11  Na ol i paitim olgeta tewel husat i stap insait long en wantaim sap bilong bainat, ol i bagarapim ol olgeta. I no gat wanpela i stap yet long pulim win. Na em i kukim Hesor olgeta wantaim paia.

11:12  Na olgeta biktaun bilong ol dispela king, na olgeta king bilong ol, Josua i bin kisim, na paitim ol wantaim sap bilong bainat, na em i bagarapim ol olgeta, olsem Moses, wokboi bilong BIKPELA, i tok strong.

11:13  Tasol long sait bilong ol dispela biktaun i sanap yet long strong bilong ol, Isrel i no kukim wanpela bilong ol, Hesor wanpela tasol. Dispela Josua i bin kukim.

11:14  Na olgeta kago bilong pait bilong ol dispela biktaun, na ol bulmakau samting, ol pikinini bilong Isrel i kisim bilong wanpela prais bilong pait i kam long ol yet. Tasol olgeta wan wan man ol i paitim wantaim sap bilong bainat, inap long ol i bin bagarapim ol olgeta, na tu ol i no lusim wanpela i stap long pulim win.

11:15  ¶ Olsem BIKPELA i tok strong long Moses, wokboi bilong Em, olsem tasol Moses i bin tok strong long Josua, na olsem tasol Josua i mekim. Em i no lusim wanpela samting we em i no mekim bilong olgeta samting BIKPELA i tok strong long Moses.

11:16  Olsem na Josua i kisim olgeta dispela hap, ol liklik maunten, na olgeta hap bilong hap saut, na olgeta hap bilong Gosen, na ples daun, na ples stret, na maunten bilong Isrel, na ples daun bilong dispela stret.

11:17  Yes, i stat long maunten Halak, dispela i go antap long Seir, yes, i go inap long Beal-gat long ples daun bilong Lebanon aninit long maunten Hermon. Na olgeta king bilong ol em i kisim, na paitim ol, na kilim ol i dai.

11:18  Josua i wokim bikpela pait longpela taim wantaim olgeta dispela king.

11:19  I no gat wanpela biktaun husat i wokim bel isi wantaim ol pikinini bilong Isrel, ol lain Hiv tasol husat i stap long Gibion. Olgeta arapela ol i kisim long pait.

11:20  Long wanem, dispela em i bilong BIKPELA long mekim ol bel bilong ol i kamap strong, inap long ol i ken kam na pait birua long Isrel long pait, inap long em i ken bagarapim ol olgeta, na long ol i no ken painim gutpela amamas long ai bilong em, tasol long em i ken bagarapim ol olgeta, olsem BIKPELA i tok strong long Moses.

11:21  Na long dispela taim Josua i kam, na rausim olgeta ol lain Anak long ol maunten, long Hibron, long Debir, long Anap, na long olgeta maunten bilong Juda, na long olgeta maunten bilong Isrel. Josua i bagarapim ol olgeta wantaim ol biktaun bilong ol.

11:22  I no gat wanpela bilong ol lain Anak i stap yet long hap bilong ol pikinini bilong Isrel. Long Gasa, long Gat, na long Asdot tasol, i gat i stap yet.

11:23  Olsem na Josua i kisim olgeta dispela hap graun, bilong bihainim olgeta samting BIKPELA i tokim Moses. Na Josua i givim dispela bilong wanpela samting papa i givim pikinini i go long Isrel bilong bihainim ol bruk bilong ol lain bilong ol. Na dispela hap i gat malolo long bikpela pait.