Geez - Joshua - 5

5:1  ወእምዝ ፡ ሶበ ፡ ሰምዑ ፡ ኵሉ ፡ ነገሥተ ፡ አሞሬዎን ፡ እለ ፡ ሀለው ፡ ማዕዶተ ፡ ዮርዳንስ ፡ መንገለ ፡ ባሕር ፡ ወኵሉ ፡ ነገሥተ ፡ ፊንቄስ ፡ እለ ፡ መንገለ ፡ ባሕር ፡ ከመ ፡ አይበሶ ፡ እግዚአብሔር ፡ ለተከዜ ፡ ዮርዳንስ ፡ እምቅድሜሆሙ ፡ ለደቂቀ ፡ እስራኤል ፡ ከመ ፡ ይዕድው ፡ እሙንቱ ፡ ተመስወ ፡ ልቦሙ ፡ ወተሰጥየ ፡ ወኀጥኡ ፡ እንተ ፡ ይሔልዩ ፡ እምቅድመ ፡ ገጾሙ ፡ ለደቂቀ ፡ እስራኤል ።

5:2  ወእምድኅረ ፡ እማንቱ ፡ መዋዕል ፡ ይቤሎ ፡ እግዚአብሔር ፡ ለኢየሱስ ፡ ግበር ፡ ለከ ፡ መጣብኀ ፡ ዘእብን ፡ እምውስተ ፡ እብነ ፡ እዝሕ ፡ ወንበር ፡ ወግዝሮሙ ፡ ለደቂቀ ፡ እስራኤል ፡ ዳግመ ።

5:3  ወገብረ ፡ ሎቱ ፡ ኢየሱስ ፡ መጣብኀ ፡ ዘእብነ ፡ እዝኅ ፡ ወገዘሮሙ ፡ ለደቂቀ ፡ እስራኤል ፡ በውስተ ፡ መካን ፡ ዘስሙ ፡ ወግረ ፡ ቍልፈታት ።

5:4  ወበበይነ ፡ ዝንቱ ፡ ገዘሮሙ ፡ ኢየሱስ ፤ (ለ)ኵሉ ፡ ሕዝብ ፡ እለ ፡ ወፅኡ ፡ እምነ ፡ ግብጽ ፡ ኵ[ሉ] ፡ ተባዕቶሙ ፡ ዕደው ፡ መስተቃትላን ፡ እለ ፡ ሞቱ ፡ በገዳም ፡ በፍኖት ፡ ወፂኦሙ ፡ እምነ ፡ ግብጽ ፡ [ኮኑ ፡ ግዙራነ ፡] ፡ ወኵሉ ፡ ሕዝብ ፡ እለ ፡ ተወልዱ ፡ በፍኖት ፡ በገዳም ፡ ወፂኦሙ ፡ እምነ ፡ ምድረ ፡ ግብጽ ፡ እስመ ፡ ኢኮነት ፡ ግዝረቶሙ ።

5:5  በከመ ፡ ያነጽሖሙ ፡ ኢየሱስ ፡ ለደቂቀ ፡ እስራኤል ፡ ለኵሎሙ ፡ እለ ፡ ተወልዱ ፡ በፍኖት ፡ ወለኵሎሙ ፡ እለ ፡ ኢኮኑ ፡ ግዙራነ ፡ አመ ፡ ወፅኡ ፡ እምነ ፡ ግብጽ ።

5:6  ወገዘሮሙ ፡ ኢየሱስ ፡ ለኵሎሙ ፡ እሉ ፡ እስመ ፡ አርብዓ ፡ ዓመ ፡ ኦዱ ፡ እስራኤል ፡ ውስተ ፡ ገዳም ፡ ዘመድብራ ፤ ወመብዝኅቶሙ ፡ ኢኮኑ ፡ ግዙራነ ፡ እምውስተ ፡ መስተቃትላን ፡ እለ ፡ ወፅኡ ፡ እምነ ፡ ምድረ ፡ ግብጽ ፡ እለ ፡ ክህዱ ፡ በትእዛዘ ፡ እግዚአብሔር ፡ ወይቤሎሙ ፡ እግዚአብሔር ፡ ከመ ፡ ኢትሬእይዋ ፡ ለይእቲ ፡ ምድር ፡ እንተ ፡ መሐለ ፡ እግዚአብሔር ፡ ለአበዊነ ፡ ከመ ፡ የሀበነ ፡ ምድረ ፡ እንተ ፡ ትውሕዝ ፡ ሐሊበ ፡ ወመዓረ ።

5:7  ወህየንተ ፡ ዚአሆሙ ፡ አቀመ ፡ ውሉዶሙ ፡ እለ ፡ ገዘሮሙ ፡ ኢየሱስ ፡ እስመ ፡ ኢኮኑ ፡ ግዙራነ ፡ እስመ ፡ በፍኖት ፡ ተወልዱ ፡ ወኢተገዝሩ ።

5:8  ወአመ ፡ ተገዝሩ ፡ ነበረ ፡ ትዕይንት ፡ ውዑል ፡ እስከ ፡ አመ ፡ ሐይው ።

5:9  ወይቤሎ ፡ እግዚአብሔር ፡ ለኢየሱስ ፡ ናሁ ፡ ዮም ፡ በዛቲ ፡ ዕለት ፡ አውፃእ[ኩ] ፡ ትዕይርቶሙ ፡ ለግብጽ ፡ እምኔክሙ ፡ ወሰመየ ፡ ስሞ ፡ ለውእቱ ፡ መካን ፡ ገልጋላ ፡ እስከ ፡ ዮም ፡ ወእስከ ፡ ዛቲ ፡ ዕለት ።

5:10  ወኀደሩ ፡ ደቂቀ ፡ እስራኤል ፡ [ውስተ ፡] ገልጋላ ፡ ወገብሩ ፡ ደቂቀ ፡ እስራኤል ፡ ፋስካ ፡ አመ ፡ ዐሡሩ ፡ ወረቡዑ ፡ ለሠርቀ ፡ ወርኅ ፡ እምነ ፡ ሰርክ ፡ በዐረቢሃ ፡ ለኢያሪኮ ፡ በማዕዶተ ፡ ዮርዳንስ ፡ በውስተ ፡ ገዳም ።

5:11  ወበልዑ ፡ እምውስተ ፡ እክ[ለ ፡ ምድር ፡] ናእተ ፡ ወሐዲሰ ።

5:12  ወበይእቲ ፡ ዕለት ፡ ኀልቀ ፡ መና ፡ በሳኒተ ፡ በልዑ ፡ እክለ ፡ ምድር ፡ ወኢረከቡ ፡ እንከ ፡ መና ፡ ደቂቀ ፡ እስራኤል ፡ ዳግመ ፡ እስመ ፡ አረሩ ፡ ብሔረ ፡ ፊንቆን ፡ በውእቱ ፡ ዓመት ።

5:13  ወኮነ ፡ እንዘ ፡ ሀለወ ፡ ኢየሱስ ፡ ውስተ ፡ ኢያሪኮ ፡ ወነጸረ ፡ በአዕይንቲሁ ፡ ወርእየ ፡ ብእሲ ፡ ይቀውም ፡ ቅድሜሁ ፡ ወሰይፍ ፡ ምሉኅ ፡ ውስተ ፡ እዴሁ ፡ ወቀርቦ ፡ ኢየሱስ ፡ ወይቤሎ ፡ እምነ ፡ ሰብአ ፡ ዚአነኑ ፡ አንተ ፡ አው ፡ እምነ ፡ ፀርነ ።

5:14  ወይቤሎ ፡ አንሰ ፡ መልአከ ፡ ኀይሉ ፡ ለእግዚአብሔር ፡ ወይእዜ ፡ በጻሕኩ ፡ ወወድቀ ፡ ኢየሱስ ፡ በገጹ ፡ ወሰገደ ፡ ሎቱ ፡ ውስተ ፡ ምድር ፡ ወይቤሎ ፡ ምንተ ፡ ቆምከ ፡ ኀበ ፡ ገብርከ ።

5:15  ወይቤሎ ፡ መልአከ ፡ ኀይሉ ፡ ለእግዚአብሔር ፡ ለኢየሱስ ፡ ፍታሕ ፡ አሣእኒከ ፡ እምውስተ ፡ እገሪከ ፡ እስመ ፡ መካን ፡ ኀበ ፡ ትቀውም ፡ ምድር ፡ ቅድስት ፡ ይእቲ ፡ ወገብረ ፡ ኢየሱስ ፡ ከማሁ ።