Geez - Judges - 12

12:1  ወተጋብኡ ፡ ደቂቀ ፡ ኤፍሬም ፡ ወመጽኡ ፡ ውስተ ፡ ሴፊና ፡ ወይቤልዎ ፡ ለይፍታሔ ፡ ለምንት ፡ ሖርከ ፡ ትትቃተሎሙ ፡ ለደቂቀ ፡ ዐሞን ፡ ወኢጸዋዕከነ ፡ ከመ ፡ ንሑር ፡ ምስሌከ ፤ ናውዒ ፡ ቤተከ ፡ ላዕሌከ ፡ በእሳት ።

12:2  ወይቤሎሙ ፡ ይፍታሔ ፡ ብእሲ ፡ ግፉዕ ፡ አነ ፡ ወሕዝብየ ፡ ወደቂቀ ፡ ዐሞን ፡ ሣቀዩነ ፡ ጥቀ ፡ ወጸራኅነ ፡ ለክሙ ፡ ወኢያድኀንክሙነ ፡ እምነ ፡ እዴሆሙ ።

12:3  ወሶበ ፡ ርኢኩ ፡ ከመ ፡ አልቦ ፡ ዘያድኅን ፡ አግባእክዋ ፡ ለነፍስየ ፡ ውስተ ፡ እዴየ ፡ ወዐደውኩ ፡ ኀበ ፡ ደቂቀ ፡ ዐሞን ፡ ወአግብኦሙ ፡ እግዚአብሔር ፡ ቅድሜየ ፡ ወለምንት ፡ ዐረግሙ ፡ ኀቤየ ፡ ዮም ፡ ትትቃተሉኒ ።

12:4  ወአስተጋብኦሙ ፡ ይፍታሔ ፡ ለኵሉ ፡ ሰብአ ፡ ገላአድ ፡ ወተቃተሎሙ ፡ ለኤፍሬም ፡ ወቀተልዎሙ ፡ ሰብአ ፡ ገላአድ ፡ ለኤፍሬም ፤ እስመ ፡ ይቤልዎሙ ፡ ድኁናነ ፡ ኤፍሬም ።

12:5  ወበጽሕዎሙ ፡ በማእከለ ፡ መናሴ ፡ ሰብአ ፡ ገላአድ ፡ በውስተ ፡ ማዕዶተ ፡ ዮርዳንስ ፡ ዘኤፍሬም ፡ ወእምዝ ፡ ሶበ ፡ ይቤሉ ፡ ድኁናነ ፡ ኤፍሬም ፡ ንዕዱ ፡ ይቤልዎሙ ፡ ሰብአ ፡ ገላአድ ፡ አንትሙኒ ፡ ቦኑ ፡ እምነ ፡ ኤፍሬም ፡ አንትሙ ፡ ወይቤሉ ፡ ኢኮነ ።

12:6  ወይቤልዎሙ ፡ በሉ ፡ ማሕፀን ፡ ወአበዩ ፡ ብሂለ ፡ ወአኀዝዎሙ ፡ ወቀተልዎሙ ፡ በውስተ ፡ ማዕዶተ ፡ ዮርዳንስ ፡ ወወድቁ ፡ እምነ ፡ ኤፍሬም ፡ ይእተ ፡ አሚረ ፡ አርባዕቱ ፡ እልፍ ፡ ወዕሥራ ፡ ምእት ።

12:7  ወኰነኖሙ ፡ ለእስራኤል ፡ ይፍታሔ ፡ ስድስተ ፡ ዓመተ ፡ ወሞተ ፡ ይፍታሔ ፡ ገለአዳዊ ፡ ወተቀብረ ፡ ውስተ ፡ ህገሩ ፡ ገላአድ ።

12:8  ወኰነኖሙ ፡ ለእስራኤል ፡ እምድኅሬሁ ፡ ሔሴቦን ፡ ዘእምነ ፡ ቤተ ፡ ልሔም ።

12:9  ወወለደ ፡ ፴ደቂቀ ፡ ወ፴አዋልደ ፡ እለ ፡ አስተዋሰበ ፡ አፍአ ፡ ወ፴አንስተ ፡ ነሥአ ፡ ለደቂቁ ፡ እምነ ፡ አፍአ ፡ ወኰነኖሙ ፡ ለእስራኤል ፡ ፯ዓመተ ።

12:10  ወሞተ ፡ ሔሴቦን ፡ ወተቀብረ ፡ ውስተ ፡ ቤተ ፡ ልሔም ።

12:11  ወኰነኖሙ ፡ እምድኅሬሁ ፡ ለእስራኤል ፡ ኤሎም ፡ ዛቡሎናዊ ፡ ወኰነኖሙ ፡ ለእስራኤል ፡ ፲ዓመተ ።

12:12  ወሞተ ፡ ኤሎም ፡ ዛቡሎናዊ ፡ በኤሎም ፡ ወቀበርዎ ፡ ውስተ ፡ ምድረ ፡ ዛቡሎን ።

12:13  ወኰነኖሙ ፡ ለእስራኤል ፡ እምድኅሬሁ ፡ ለቦን ፡ ኤፍራታዊ ።

12:14  ወተወልዱ ፡ ሎቱ ፡ ፵ደቂቅ ፡ ወ፴ደቂቀ ፡ ደቂቁ ፡ ወይጼዐኑ ፡ ላዕለ ፡ ፸አዕዱግ ፡ ወኰነኖሙ ፡ ለእስራኤል ፡ ሰመንተ ፡ ዓመተ ።

12:15  ወሞተ ፡ ለቦን ፡ ወልደ ፡ ኤሎም ፡ ኤፍራቶናዊ ፡ ወቀበርዎ ፡ ውስተ ፡ ኤፍራት ፡ ውስተ ፡ ምድረ ፡ ኤፍሬም ፡ ውስተ ፡ ደብረ ፡ ለነቅ ።