CopSahBible2 - Micah - 7

7:1  ⲟⲩⲟⲓ ⲛⲁⲓ ϫⲉ ⲁⲓⲣ ⲑⲉ ⲙⲡⲉⲧⲥⲉⲩϩ ⲣⲟⲟⲩⲉ ⲉϩⲟⲩⲛ ϩⲙ ⲡⲱϩⲥ ⲁⲩⲱ ⲛⲑⲉ ⲙⲡⲉⲧⲕⲉⲧϥ ϫⲉⲗⲗⲉ ϩⲙ ⲡϫⲱⲱⲗⲉ ⲉⲙⲛ ⲥⲙⲁϩ ϣⲟⲟⲡ ⲉⲟⲩⲱⲙ ⲛⲛⲧⲁⲩⲡⲱϩ ⲛϣⲟⲣⲡ. ⲟⲩⲟⲓ ⲛⲁⲓ ⲧⲁⲯⲩⲭⲏ

7:2  ϫⲉ ⲁ ⲡⲣϥⲣⲛⲟⲃⲉ ⲧⲁⲕⲟ ϩⲓϫⲙ ⲡⲕⲁϩ ⲁⲩⲱ ⲡⲉⲧⲥⲟⲩⲧⲱⲛ ϩⲛ ⲛⲣⲱⲙⲉ ⲉⲛϥϣⲟⲟⲡ ⲁⲛ ⲥⲉϭⲟⲣϭ ⲧⲏⲣⲟⲩ ⲉϩⲛⲥⲛⲟϥ ⲡⲟⲩⲁ ⲡⲟⲩⲁ ϩⲟϫϩⲉϫ ⲙⲡⲉⲧϩⲓⲧⲟⲩⲱϥ ϩⲛ ⲟⲩϩⲟϫϩⲉϫ

7:3  ⲥⲉⲥⲟⲃⲧⲉ ⲛⲛⲉⲩϭⲓϫ ⲉⲡⲡⲉⲑⲟⲟⲩ ⲡⲁⲣⲭⲱⲛ ϥⲁⲓⲧⲉⲓ ⲁⲩⲱ ⲡⲉⲕⲣⲓⲧⲏⲥ ϥϫⲓ ϩⲛ ϩⲛⲧⲟⲩⲓⲟ ϥϫⲱ ⲁⲩⲱ ϥⲧⲁⲩⲟ ⲛϩⲛϣⲁϫⲉ ⲛⲉⲓⲣⲏⲛⲓⲕⲟⲛ ⲁⲩⲱ ⲡϫⲱⲱⲣⲉ ⲁϥϣⲁϫⲉ ⲉⲡⲟⲩⲱϣ ⲡⲉ ⲛⲧⲉϥⲯⲩⲭⲏ ⲁⲩⲱ ϯⲛⲁϥⲓ ⲛⲛⲉⲩⲁⲅⲁⲑⲟⲛ

7:4  ⲛⲑⲉ ⲛⲟⲩϩⲟⲟⲗⲉ ⲉⲥⲟⲩⲱⲙ ⲁⲩⲱ ⲉⲥⲙⲟⲟϣⲉ ϩⲓϫⲛ ⲟⲩⲕⲁⲛⲱⲛ ϩⲙ ⲡⲉϩⲟⲟⲩ ⲙⲡϭⲱϣⲧ ⲉⲃⲟⲗ ⲟⲩⲟⲓ ⲟⲩⲟⲓ ⲛⲕⲃⲁ ⲁⲩⲉⲓ ⲧⲉⲛⲟⲩ ⲥⲉⲛⲁϣⲱⲡⲉ ⲛϭⲓ ⲛⲉⲩⲣⲓⲙⲉ

7:5  ⲙⲡⲣⲧⲁⲛϩⲉⲧ ⲧⲏⲩⲧⲛ ⲙⲛ ⲛⲉⲧⲛϣⲃⲉⲉⲣⲉ ⲟⲩⲇⲉ ⲙⲡⲣⲕⲁ ϩⲧⲏⲧⲛ ⲉⲛⲉⲧϩⲓϫⲱⲧⲛ ϩⲁⲣⲉϩ ⲉⲣⲟⲕ ⲉⲧⲉⲕⲥϩⲓⲙⲉ ⲉⲧⲙⲧⲁⲙⲟⲥ ⲉⲗⲁⲁⲩ

7:6  ⲉⲃⲟⲗϫⲉ ⲟⲩⲛ ⲟⲩϣⲏⲣⲉ ⲛⲁⲥⲉϣ ⲡⲉϥⲓⲱⲧ ⲁⲩⲱ ⲟⲩⲛ ⲟⲩϣⲉⲉⲣⲉ ⲛⲁⲧⲱⲟⲩⲛ ⲉϫⲛ ⲧⲉⲥⲙⲁⲁⲩ ⲁⲩⲱ ⲟⲩϣⲉⲗⲉⲉⲧ ⲉϫⲛ ⲧⲉⲥϣⲱⲙⲉ ⲛϫⲓⲛϫⲉⲉⲩⲉ ⲙⲡⲣⲱⲙⲉ ⲉⲛⲛⲣⲱⲙⲉ ⲧⲏⲣⲟⲩ ⲉⲧϩⲙ ⲡⲉϥⲏⲓ

7:7  ⲁⲛⲟⲕ ⲇⲉ ϯⲛⲁϭⲱϣⲧ ⲉϩⲣⲁⲓ ⲉⲡϫⲟⲉⲓⲥ ϯⲛⲁϩⲩⲡⲟⲙⲟⲛⲏ ⲉⲡⲛⲟⲩⲧⲉ ⲡⲁⲥⲱⲧⲏⲣ ⲡⲁⲛⲟⲩⲧⲉ ϥⲛⲁⲥⲱⲧⲙ ⲉⲣⲟⲓ

7:8  ⲧⲁⲙⲛⲧϫⲁϫⲉ ⲙⲡⲣⲣⲁϣⲉ ⲉϩⲣⲁⲓ ⲉϫⲱⲓ ϫⲉ ⲁⲓϩⲉ ϯⲛⲁⲧⲱⲟⲩⲛ ⲟⲛ ϫⲉ ⲉⲓϣⲁⲛϩⲙⲟⲟⲥ ϩⲙ ⲡⲕⲁⲕⲉ ⲡϫⲟⲉⲓⲥ ⲛⲁⲣⲟⲩⲟⲉⲓⲛ ⲉⲣⲟⲓ

7:9  ⲧⲟⲣⲅⲏ ⲙⲡϫⲟⲉⲓⲥ ϯⲛⲁϥⲓ ϩⲁⲣⲟⲥ ϫⲉ ⲁⲓⲣⲛⲟⲃⲉ ⲉⲣⲟϥ ϣⲁⲛⲧⲉϥⲧⲙⲁⲉⲓⲉ ⲡⲁ … ⲧ ⲉϥⲛⲁⲉⲓⲣⲉ … ⲕⲃⲁ ⲉϥⲛⲁ … ⲗ ⲉⲡⲟⲩⲟ[ⲉⲓⲛ ϯⲛⲁ]ⲛⲁⲩ ⲉⲧⲉϥⲇⲓ[ⲕⲁⲓ]ⲟⲥⲩⲛⲏ

7:10  ⲁⲩⲱ [ⲥⲛ]ⲁⲛⲁⲩ ⲉⲣⲟⲓ ⲛϭⲓ [ⲧⲁ]ⲙⲛⲧϫⲁϫⲉ [ⲁⲩⲱ] ⲥϭⲟⲟⲗⲉⲥ ⲙⲡ[ϣⲓ]ⲡⲉ ⲧⲉⲧϫⲱ [ⲙⲙ]ⲟⲥ ⲛⲁⲓ ϫⲉ ⲉϥ ⲧⲱⲛ ⲡϫⲟⲉⲓⲥ ⲛⲉⲕⲛⲟⲩⲧⲉ ⲁⲩⲱ ⲛⲁⲃⲁⲗ ⲥⲉⲛⲁⲙⲉϩ ⲉⲓⲁⲧⲟⲩ ⲙⲙⲟⲥ ⲧⲉⲛⲟⲩ ⲥⲉⲛⲁϩⲱⲙ ⲉϫⲱⲥ ⲛⲑⲛⲟⲩⲟⲙⲉ ϩⲛ ⲛⲉϩⲓⲟⲟⲩⲉ

7:11  ⲟⲩϩⲟⲟⲩ ⲛⲕⲱϩⲧ ⲉⲧⲟⲩϫⲟ ⲡⲉ ⲡⲉϩⲟⲟⲩ ⲉⲧⲙⲙⲁⲩ ⲉϥⲛⲁⲧⲁⲕⲟ ⲛⲛⲛⲟⲙⲓⲙⲟⲛ ⲙⲡⲁⲗⲁⲟⲥ

7:12  ⲁⲩⲱ ⲛⲉⲕⲡⲟⲗⲓⲥ ⲥⲉⲛⲁϣⲁϣⲟⲩ ⲙⲛ ⲡⲕⲁϩ ⲛⲧⲉ ⲛⲁⲥⲥⲩⲣⲓⲟⲥ ⲡⲟϣⲟⲩ ⲉϩⲣⲁⲩ ⲁⲩⲱ ⲛⲉⲕⲡⲟⲗⲓⲥ ⲥⲉⲛⲁⲡⲟϣⲟⲩ ϫⲓⲛ ⲧⲩⲣⲟⲥ ϣⲁ ⲡⲉⲓⲉⲣⲟ ⲛⲧⲥⲩⲣⲓⲁ ⲁⲩⲱ ϫⲓⲛ ⲑⲁⲗⲁⲥⲥⲁ ϣⲁ ⲑⲁⲗⲁⲥⲥⲁ ⲁⲩⲱ ϫⲓⲛ ⲡⲧⲟⲟⲩ ϣⲁ ⲡⲧⲟⲟⲩ

7:13  ⲁⲩⲱ ⲡⲕⲁϩ ⲉϥⲛⲁϣⲱⲡⲉ ⲉⲩⲧⲁⲕⲟ ⲙⲛ ⲛⲉⲧⲟⲩⲏϩ ⲛϩⲏⲧϥ ⲉⲃⲟⲗ ϩⲙ ⲡⲕⲁⲣⲡⲟⲥ ⲛⲛⲉϩⲃⲏⲩⲉ ⲛⲧⲉⲩⲡⲟⲛⲏⲣⲓⲁ

7:14  ⲙⲟⲟⲛⲉ ⲙⲡⲉⲕⲗⲁⲟⲥ ϩⲙ ⲡⲉⲕϭⲉⲣⲱⲃ ⲧⲉⲕⲫⲩⲗⲏ ⲛⲉⲥⲟⲟⲩ ⲛⲧⲉⲕⲕⲗⲏⲣⲟⲛⲟⲙⲓⲁ ⲉⲩⲟⲩⲏϩ ϩⲁⲣⲓϩⲁⲣⲟⲟⲩ ϩⲙ ⲡⲉⲇⲣⲩⲙⲟⲥ ϩⲛ ⲧⲙⲏⲧⲉ ⲙⲡⲕⲁⲣⲙⲉⲗⲟⲥ ⲥⲉⲛⲁⲙⲟⲟⲛⲉ ⲙⲙⲟⲟⲩ ϩⲛ ⲧⲃⲁⲥⲁⲛ ⲙⲛ ⲅⲁⲗⲁⲁⲇ ⲛⲑⲉ ⲛⲛⲉϩⲟⲟⲩ ⲙⲡⲁⲓⲱⲛ

7:15  ⲁⲩⲱ ⲕⲁⲧⲁ ⲛⲉϩⲟⲟⲩ ⲙⲡⲉⲕⲉⲓ ⲉⲃⲟⲗ ϩⲙ ⲡⲕⲁϩ ⲛⲕⲏⲙⲉ ϯⲛⲁⲧⲁⲩⲟⲟⲩ ⲉϩⲉⲛϣⲡⲏⲣⲉ

7:16  ⲥⲉⲛⲁⲛⲁⲩ ⲛϭⲓ ⲛϩⲉⲑⲛⲟⲥ ⲛⲥⲉϫⲓ ϣⲓⲡⲉ ⲉⲃⲟⲗ ϩⲛ ⲧⲉⲩϭⲟⲙ ⲧⲏⲣⲥ ⲥⲉⲛⲁⲕⲁ ⲧⲟⲟⲧⲟⲩ ϩⲓⲣⲛ ⲣⲱⲟⲩ ⲛⲥⲉϩⲱϫⲡ ⲛⲛⲉⲩⲙⲁⲁϫⲉ

7:17  ⲥⲉⲛⲁⲗⲱϫϩ ⲙⲡⲕⲁϩ ⲛⲑⲉ ⲛⲛϩⲟϥ ⲉⲩⲥⲱϣ ϩⲓⲡⲉⲥⲏⲧ ⲥⲉⲛⲁⲥⲱⲟⲩϩ ⲉϩⲟⲩⲛ ⲉⲟⲣⲃⲟⲩ ⲉϩⲟⲩⲛ ⲥⲉⲛⲁⲣϣⲡⲏⲣⲉ ⲇⲉ ⲟⲛ ⲉϫⲙ ⲡϫⲟⲉⲓⲥ ⲡⲉⲛⲛⲟⲩⲧⲉ ⲛⲥⲉⲣϩⲟⲧⲉ ϩⲁ ⲧⲉϥϩⲏ

7:18  ⲛⲓⲙ ⲡⲉ ⲡⲕⲉⲛⲟⲩⲧⲉ ⲛⲃⲗⲗⲁⲕ ⲉⲕϥⲓ ⲙⲙⲁⲩ ⲛⲛⲁⲛⲟⲙⲓⲁ ⲁⲩⲱ ⲉϥⲱⲃϣ ⲙⲙⲟϥ ⲙⲙⲛⲧϣⲁϥⲧⲉ ⲛⲛⲥⲉⲉⲡⲉ ⲛⲧⲉϥⲕⲗⲏⲣⲟⲛⲟⲙⲓⲁ ⲁⲩⲱ ⲙⲡⲉϥⲁⲙⲁϩⲧⲉ ⲛⲧⲉϥⲟⲣⲅⲏ ⲉⲕⲁⲁⲥ ⲉⲩⲙⲛⲧⲙⲛⲧⲣⲉ ⲉⲃⲟⲗ ϫⲉ ⲉⲣⲉ ⲡⲉϥⲟⲩⲱϣ ϣⲟⲟⲡ ϩⲙ ⲡⲛⲁ

7:19  ⲛⲧⲟϥ ⲉϥⲛⲁⲕⲧⲟϥ ⲛⲉϥϣⲛ ϩⲧⲏϥ ⲉϫⲱⲛ ⲁⲩⲱ ϥⲛⲁϩⲱⲡ ⲛⲛⲉⲛⲛⲟⲃⲉ- ⲛⲉⲛⲕⲉⲁⲛⲑⲙⲓⲁ ⲧⲏⲣⲟⲩ ⲉϥⲛⲁⲛⲟϫⲟⲩ ⲉϩⲣⲁⲓ ⲛϣⲓⲕ ⲛⲧⲉⲑⲁⲗⲁⲥⲥⲁ

7:20  ⲉⲕⲛⲁϯ ⲛⲧⲙⲉ ⲛⲓⲁⲕⲱⲃ ⲁⲩⲱ ⲡⲛⲁ ⲛⲁⲃⲣⲁϩⲁⲙ ⲙⲡⲉⲥⲙⲟⲧ ⲛⲧⲁⲕⲱⲣⲕ ⲛⲛⲉⲕⲉⲓⲟⲧⲉ ϫⲓⲛ ⲛⲉϩⲟⲟⲩ ⲛϣⲟⲣⲡ