Geez - Psalms - 148

148:1  ሰብሕዎ ፡ ለእግዚአብሔር ፡ እምሰማያት ፤ ይሴብሕዎ ፡ በአርያም ።

148:2  ይሴብሕዎ ፡ ኵሎሙ ፡ መላእክቲሁ ፤ ይሴብሕዎ ፡ ኵሉ ፡ ኀይሉ ።

148:3  ይሴብሕዎ ፡ ፀሓይ ፡ ወወርኅ ፤ ይሴብሕዎ ፡ ኵሉ ፡ ከዋክብት ፡ ወብርሃን ።

148:4  ይሴብሕዎ ፡ ሰማያተ ፡ ሰማያት ፤ ወማይኒ ፡ ዘመልዕልተ ፡ ሰማያት ። ይሴብሕዎ ፡ ለስመ ፡ እግዚአብሔር ፤

148:5  እስመ ፡ ውእቱ ፡ ይቤ ፡ ወኮኑ ፡ ወውእቱ ፡ አዘዘ ፡ ወተፈጥሩ ።

148:6  ወአቀሞሙ ፡ ለዓለም ፡ ወለዓለመ ፡ ዓለም ፤ ትእዛዘ ፡ ወሀቦሙ ፡ ወኢኀለፉ ።

148:7  ሰብሕዎ ፡ ለእግዚአብሔር ፡ እምድር ፤ አክይስትኒ ፡ ወኵሉ ፡ ቀላያት ።

148:8  እሳት ፡ ወበረድ ፡ አስሐትያ ፡ ወሐመዳ ፤ መንፈሰ ፡ ዐውሎ ፡ ዘይገብር ፡ ነቢቦ ።

148:9  አድባርኒ ፡ ወኵሉ ፡ አውግር ፤ ዕፀውኒ ፡ ዘይፈሪ ፡ ወኵሉ ፡ አርዝ ።

148:10  አራዊትኒ ፡ ወኵሉ ፡ እንስሳ ፤ ዘይትሐወስኒ ፡ ወአዕዋፍ ፡ ዘይሠርር ።

148:11  ነገሥተ ፡ ምድርኒ ፡ ወኵሉ ፡ አሕዛብ ፤ መላእክትኒ ፡ ወኵሉ ፡ መኳንንተ ፡ ምድር ።

148:12  ወራዙትኒ ፡ ወደናግል ፤ ሊቃናትኒ ፡ ወመሐዛት ። ይሰብሑ ፡ ለስመ ፡ እግዚአብሔር ፡ እስመ ፡ ተለዐለ ፡ ስሙ ፡ ለባሕቲቱ ፤

148:13  ይገንዩ ፡ ሎቱ ፡ በሰማይ ፡ ወበምድር ። ወያሌዕል ፡ ቀርነ ፡ ሕዝቡ ፡

148:14  ወስብሐተ ፡ ኵሉ ፡ ጻድቃኑ ፤ ለደቂቀ ፡ እስራኤል ፡ ሕዝብ ፡ ዘቅሩብ ፡ ሎቱ ።