LinVB - Zechariah - 10

10:1  Bosenge Yawe mbula ya nsuka enoka. Yawe moto akobimisaka mompepe mwa ekumbaki, akonokisela bato mbula enene mpe akopesaka bilanga milona miike.

10:2  Bikeko bikosakolaka se na bokosi, bamoni-makambo bakomonoko bimonela bya lokuta, ndimbola ya ndoto ya bango ezali na ntina te, bakobondoko bato na makambo ma lokuta. Yango wana bato bakendeki lokola mpata, na mpasi mpenza, mpo bazangaki mokengeli.

10:3  Nayokeli bakengeli nkanda enene, nakotumbola ntaba babali. Kasi Yawe wa bokasi bonso akoya kotala etonga ya ye, bato ba Yuda, akokomisa bango farasa ileki bokasi o bitumba.

10:4  Libanga lya litumu, likonzi lya ema na litimbo lya etumba makozwama o mboka ye, na mpe bayangeli.

10:5  Banso elongo bakozala lokola bilombe, bakonyata potopoto ya balabala o etumba. Bakobunda makasi, zambi Yawe akosalisa bango ; bakoyokisa basoda ba farasa nsoni.

10:6  Nakopesa bato ba libota lya Yuda mpiko, nakobikisa libota lya Yozefu. Nakokamba bango, zambi nayokeli bango mawa, bakozala lokola bato naboyaki mokolo moko te, mpo nazali Yawe Nzambe wa bango, nakondimela bango.

10:7  Bato ba Efraim bakozala lokola bilombe, bakosepela mingi lokola bato bameli vino. Ntango bana bakomono bango bakosepela, mpo ya Yawe bakotonda na ese­ngo o mitema.

10:8  Nakobete mondule mpe nakosa­ngisa bango, mpo nasikoli bango ; bakozala ebele lokola kala.

10:9  Baye napanzaki o bikolo bisusu bakokanisa ngai o mikili mosika ; bakobokolo bana ba bango mpe bakozonga.

10:10  Nakolongola bango o mokili mwa Ezipeti, nakosangisa bango ut’o Asur. Nakokamba bango o Galaad mpe o Libano, mikili miye minso mikokoka na bango te.

10:11  Bakokatisa mbu ya Ezipeti, Yawe akopesa mbonge ya mai etinda, ebale Nil ekokauka tee o bozindo bwa yango ; lofundo la bato ba Asur lokosila, bakolongola montongo mwa bokonzi o Ezipeti.

10:12  Nakolendisa bango mpo ya Yawe, bakokende etumba o nkombo ya ye. Maloba ma Yawe.